Oen jongoewan, de progressief ini na diniwroko
1 „Prijse Jehovah . . . , oen jongoeman ma ooktoe oen wenke, oen owroe man makandra nanga den boi” (Ps. 148:7, 12). Jongoesma kan prijse Jehovah foe di den e leri na waarheid. Disi wani taki dati den moe poti kristen gronprakseri ini den libi, foe teki prati na den gemeente komakandra èn foe abi wan prati dorodoro na a velddienst. Den moe go doe den sani disi foe di den papa ofoe mama foe den ofoe den mati e froewakti disi foe den.
2 Teki na kristen libifasi e bigin nanga a teki foe sabi foe Gado ini joe. Disi kan meki wan persoonlek matifasi nanga Jehovah doe kon (Ps. 71:5). Te wan sma gi ensrefi abra na Gado foe dini en ini a tra pisi foe en libi èn e teki dopoe, dan wan matifasi nanga Gado e doe kon. Sowan matifasi nanga Gado pe jongoewan de na ini, e jepi den ’foe lon komoto gi den lostoe di de foe den jongoewan’ èn foe tan farawe foe grontapoe demakandra nanga na fasi foe loekoe sani di no de fanowdoe (2 Timotéus 2:22). Jongoe nanga owroewan sa kon tranga èn kon moro krosbé na Jehovah te den poti theokratis marki na den fesi soleki na pionierdienst, na Betheldienst ofoe na zendingsdienst, èn foe feti moro fara na den baka. — Odo 16:3.
SAN JONGOEWAN KAN DOE
3 A e gi wi prisiri foe si den jongoewan foe wi di sabi den jeje nowtoe èn di e feni en wan switi sani foe fisiti gemeente komakandra èn foe teki prati na den (Matt. 5:3, 6). Oen kristen jongoewan, oen kan gi tranga na trawan ini na gemeente te oenoe e gi tapoe den komakandra alaten opbouwend kommentaar. Te joe e kweki wan waran banti nanga ala sma foe ala sortoe jari ini na gemeente, dan joe kan njan boen bifo èn baka den komakandra nanga ala foe wan demakandra di e boe joe. — 1 Tim. 4:16; teki gersi nanga Odo 18:1.
4 Jehovah e gebroiki ooktoe jongoesma foe meki na boen njoensoe préki (Matt. 21:16). Foeroe sma ben si dati den ben go kisi moro prisiri na ini na prékiwroko foe di den ben teki ala wiki wan prati na en. Sonwan e gebroiki den okasi na skoro foe taki foe den prakseri foe Jehovah (Ps. 71:17; 145:21). Den sortoe activiteit dati e meki na ati foe Jehovah prisiri séker.
5 Oen jongoesma, de netleki trawan ini na kristen gemeente progressief na ini joe jeje gro. Te joe e poti joesrefi alaten foe meki joe theokratis activiteit kon moro boen, dan joe e meki a waarheid de wan pisi foe joe. Sofasi oenoe kan abi na overtoigi dati Jehovah sa blesi oenoe. — Fil. 3:16; 2 Tim. 2:15.