Yepi trawan fu warderi yeye sani
1 Fa na Memrefesa e sori taki a de wan sani di e waran ati! Ibri yari a e memre wi na a waarde fu Kristus Yesus srakti-ofrandi fu na bun fu na heri libisma-famiri. Na spesrutu fesa disi e gi wi na okasi fu yepi nyun sma fu warderi moro furu den yeye sani di Gado ben seti nanga yepi fu en lobi Manpikin (Mark. 9:7). Fa wi kan yepi den sma di e fisiti na Memrefesa fu abi alaten demakandra nanga na gemeente?
2 Sondro degedege a moro bigi pisi fu den di e fisiti na Memrefesa, srefi den sma di e du disi fu na fositron, e si na den srefi wan yeye angri di mu kowru (Matt. 5:3). San wi kan du fu gi den tranga fu sorgu gi den yeye fanowdu?
3 Wán sani ben sa de fu fisiti den so esi leki a kan. Sori persoonlek belangstelling èn pristeri den fu yepi den fu go na fesi na yeyefasi. Furu sma di ben fisiti na Memrefesa no abi wan persoonlek osobijbelstudi. Yepi den fu frustan dati wan geregelde bijbelstudi de fanowdu fu nyanbun fu Kristus srakti-ofrandi èn fu kisi Yehovah bunati. Proberi fu seti sani gi sowan yeye programma tapu wan ten di fiti.
GI KARI FU GI KOTOIGI
4 Fa a de nanga den sma di e studeer kaba èn kande tapu regelmatige basis e fisiti den komakandra? Sortu tra go a fesi den mu meki? Yu ben gi den na rai fu pruberi fu gi okasi preiki na den mati, den famirman, wrokoman èn tra sma? Disi sa yepi den na yeyefasi fu go a fesi. Den sa sori dan a tangi fu den gi Yesus srakti-ofrandi èn gi na waarheid di den e leri.
5 Na bijbelstudenti e draidrai kande fu taki nanga tra sma, fudi a e prakseri, dati den sma no sa arki na waarheid. Kande a mu leri dati ibri aparti sma de prenspari gi Gado, di e si na ati èn e sabi te wan sma de klarklari fu teki na bun nyunsu. Yepi na studenti fu frustan dati a de na wani fu Gado „dati ala sortu fu sma kisi yepi èn kon kisi wan soifri sabi fu na waarheid” (1 Tim. 2:4; Tori. 17:26, 27). Sori en dati Gado ben seni Yesus Kristus fu gi ensrefi leki wan „lusu prijs ini a presi fu furu sma” (Matt. 20:28). Efu na studenti fu yu kan kisi yepi fu frustan disi, dan a sa si fu san-ede a mu pruberi fu taki fu na waarheid te a mag kisi na okasi tu. Na persoonlek overtoigi fu en sa kon tranga, èn a sa abi na prisiri di e kon fu na gi fu moro diri gudu di a abi. — Gal. 6:6; Tori. 20:35.
6 Den sma di den e feni bun, mu kisi a kari fu teki prati na ini a mun mei na ini a velddienst (Matt. 9:37, 38; om blz. 100-102). Ooktu den papa nanga mama e yepi den pikin fu den fu si en leki wan grani fu den teri den leki wan preikiman. Yehovah e sori bun-ede gi den sma di wani dini en, srefi efu na bekwaamheid fu den skotu. Futru, wi alamala abi wan tumsi bigi grani fu abi wan prati na a wroko di e gi libi fudi wi e waka na baka wi Yepiman Yesus Kristus (Matt. 28:19, 20). Fudi wi e meki na wroko fu preiki kon tru, dan wi alamala sa poti prakseri tapu na rai di na apostel Paulus ben gi: „Fudi wi e wroko makandra nanga en meki wi e aksi unu tranga, no fu teki na no ferdini bunfasi fu Gado èn dan misi a marki fu en.” — 2 Kor. 6:1.
7 Wi no sabi omeni sma moro sa go warderi na grani fu dini Yehovah. Ma wi de seiker fu en dati te wi go doro fu yepi trawan fu warderi yeye sani wi sa kisi bigi blesi èn den ooktu. — 2 Kor. 6:2.