Meki na bun bakapisi fu wi wroko leki bedinari kon moro bun
1 Fu di den Kownukondre afersi e teki na fosi presi na ini wi libi, dan a musu buweygi wi fu de bun dorodoro na ini na diniwroko leki na wroko fu wi libi di wi ben frukisi (Mark. 13:10). Awansi olanga wi e preyki kba, wi wani tan meki na bakapisi fu wi wroko leki bedinari kon moro bun. Fa wi kan du disi?
2 Furu sma di abi bun bakapisi na ini den wroko e pruberi doronomo fu meki na sabi nanga bekwaamfasi fu den kon moro furu. Den fanowdu sani fu na libi fu den kan anga fu dati. Leki bedinari di abi wan bun konsensi wi musu de so srefi fayafaya fu meki te fu kba na bekwaamfasi fu wi fu meki disipri èn fu leri trawan fu Gado kownukondre kon moro bun. Wi musu fu suku nyun èn fris fasi fu taki, di e hari ala sortu fu sma kon. — Mat. 28:19, 20.
TEKI NA TYALENSI
3 Now di Yehovah e meki na tyari kon makandra fu den sma di gersi skapu e go moro esi, meki furu fu wi e naki moro furutron na den doro fu den sma na ini wi birti. Na preyki aktiviteit di ben kon moro furu fu someni moro preykiman èn pionier e seki na heri grontapuveld. Fu den aktiviteit fu wi di kon de moro furu meki pristeri di wan ten ben abi bun bakapisi kande no e hari moro langa na prakseri fu den sma di wi e miti. Na kwaliteit fu wi diniwroko kande musu kon moro bun.
4 A de fanowdu fu tan hori wan positief fasi te wi e taki nanga sma, fu te fu kba wi kan de trutru bekwaam na ini wi diniwroko. Efu wi meki wan bun kobroyki fu den praktis ray di ben gi na ini Na Waktitoren fu 15 yuli 1988, dan wi kan kisi yepi nanga disi. Bladzijde 7, par. 6 e taki fu eksenpre fa yu kan pristeri yu srefi na wan switi èn positief fasi na ini kontren pe yu e de ala wiki èn pe sma sabi yu bun. Yu kan feni na tapu bladzijde 7, na ini par. 5 bodoy fu fa yu kan bigin fu taki nanga wan sma di ben fruteri yu a wiki di psa taki „Mi de wan memre di gi mi srefi krinkrin abra na mi eygi kerki èn na den e sorgu gi ala mi yeye fanowdu”.
5 Yu wroko na gebied fu yu nanga wan wantewante pristeri fu wan gratis beybristuka? Yu e wroko na ini bisnis kontren di na gemeente fu yu abi? A kan fu du stratiwroko tapu ten di fiti èn pe yu kan du moro? Leysi awansi fa a no fa, den bodoy di ben gi na ini Na Waktitoren fu 15 yuli 1988. Na kobroyki fu den sortu ray disi kan yepi wi fu meki na bakapisi fu a wroko fu wi leki bedinari kon moro bun.
6 Bun bakapisi fu wi wroko abi so srefi na ini en na du fu sani finifini (Ef. 6:13). De na ay fu si pe moro leki wan osofamiri e libi na ini wan oso. Son sma e tan na a bakadyari, ofu tapu tra presi di sma no kan miti fu waka fu stratisey go drape. Suku fu feni difrenti memre fu na osofamiri — wan ppa ofu mma, ofu wan sma di kande ini akruderi nanga en gwenti no e kon na a doro, ofu wan sma di de na wroko te sma e go fisiti en na oso. A kan de taki fu di yu e go tapu wan tra ten, yu e miti tra memre fu na osofamiri. Na gi fu kotoygi na mofoneti furutron e gi yu den sortu okasi disi.
POTI EN LEKI YU MARKI
7 Na meki kon moro bun fu na bun bakapisi fu wi wroko na ini a diniwroko de wan warti marki di morofuru fu wi kan doro. Opregti begi èn sreka de fanowdu fu dati. Aladi na bun bakapisi fu wi wroko na ini na velddienst e gro, dan wi sa man kande fu yepi wan tra sma fu go na fesi na a srefi fasi. — Gal. 6:6.
8 Hori na prakseri taki a wroko fu wi fu leri sma no e tapu na a „bigi banawtu” (Mat. 24:21). Wi e fruwakti fu sa yepi furu yari langa den sma di opo komoto fu dede, fu leri sabi den pasi fu Yehovah. Na prisiri fu wi na ini na ten fu na millenium seyker sa furu psa marki te wi e si taki den sma di kisi leri e saka den srefi na wan loyaal fasi na ondro Krestes tiri. Fu di wi e meki den bun bakapisi fu wi na ini na preykiwroko èn na wroko fu leri sma kon moro bun, meki wi kan du moro na ini wi diniwroko — fu gi Yehovah grani èn prèyse.