Kon de bekwaam ini yu diniwroko
1 Na apostru Paulus ben gi a deki-ati fu meki a bekwaamfasi ini a diniwroko gro. A ben skrifi: „Du ala san yu kan fu pristeri yu srefi na Gado na wan fasi di a feni bun, leki wan wrokoman di no abi fu syen fu noti èn di e kobroyki a wortu fu waarheid yoysti.” — 2 Tim. 2:15.
2 Bekwaamfasi ini a diniwroko de wan sani di yu musu wroko fu kisi en. Fu dati-ede wi musu ’du ala san wi kan’ — du seryusu muyti — efu wi wani tron bekwaam bedinari. Ma san sa yepi wi?
STUDERI GADO WORTU
3 A bun bakapisi fu wi leki bedinari abi wantewante fu du nanga wi sabi fu a beybri. Omoro bun wi sabi a beybri, omoro wi sa abi bun bakapisi ini a kobroyki fu a wortu fu a waarheid na wan yoysti fasi.’ Fu dati-ede a de tumusi prenspari fu poti ten na wan sey fu studeri nanga yu srefi. — 1 Tim. 4:15, 16.
4 Ete wan fasi fu kon sabi na wortu fu Gado bun de „fu poti moro prakseri leki san unu ben gwenti” tapu na leri di abi en fondamenti na tapu na beybri èn di wi e kisi tapu den gemeente konmakandra (Hebr. 2:1). Na ini den publikitaki den e taki fu tumusi moy penti fu takimakandra gi na diniwroko ofu penti fu takimakandra di kan teki puru na ini a gemeente bukustuka. A teyokrasiya diniwroko skoro e skoro wi na wan wartifasi fu tron bekwaam leriman, èn a diniwroko konmakandra e sorgu gi bun ray nanga praktis demonstrâsi di e yepi unu fu kon moro koni leki bedinari. Ma efu wi wani nyanbun moro furu fu ala den konmakandra, dan wi musu sreka wi srefi bun èn teki prati fayafaya na den.
KOBROYKI DEN RAY
5 Paulus ben gi a gemeente na ini Filipi a deki-ati fu du den sani di den ben leri èn di abi fu du nanga en (Fil. 4:9). Wi musu du den sani di wi e leri nanga yepi fu Yehovah organisâsi. Na so wi ben leri fu eksenpre na ini Na Waktitoren fu 15 yuli 1988, blz. 15-20, fa wi kan meki „nyun” gebied na ini wan kontren di den e wroko furu. Boyti taki den ben poti krakti tapu na fanowdu fu bigin na tori nanga a sma na wan fres, switi èn positief fasi, dan a artikel ben gi unu so srefi na deki-ati fu meki a ososma kon gwenti taki wi e kon doronomo na en oso. Wi ben kisi a ray fu suku finifini den wan di warti en, fu di wi e pruberi fu feni difrenti sma di e libi na ini a srefi oso. Te wi kobroyki den ray disi, dan wi e du san wi e leri èn wi e meki wi bekwaamfasi ini a diniwroko kon moro bigi.
6 Wi e kobroyki a Taki-go-taki-kon-buku doronomo na ini a preykiwroko? Den biginwortu di gi leki ray èn so srefi a pisi fu a fasi fa yu musu du tapu genstaki di kan kon, kan skafu unu bekwaamfasi fu preyki kon moro bun. Boyti fu dati, a sreka nanga a oefen fu a Tori fu takimakandra èn a fasi fa wi sa du a prisiteri fu a mun, sa yepi wi fu abi bun bakapisi na ini a diniwroko.
7 Efu yu wani moro ray fu a fasi fa yu kan meki yu diniwroko kon moro bun, dan yu kan go na a dienstopziener ofu yu bukustudi-leider èn aksi en fu a yepi yu. Wi alamala kan meki wi bekwaamfasi leki bedinari kon moro bigi èn ’kobroyki a wortu fu a waarheid yoysti’. Ete wan syatu pisiten èn Yehovah Gado sa tyari wan kba kon na a gadolowsu seti fu sani disi. Te na a ten dati a de a winsi fu wi ati fu yepi so furu sma leki wi kan fu kisi frulusu èn na so fasi gi wi Gado Yehovah glori. — Yoh. 15:8.