Joe e gebroiki a Wortoe foe Gado na wan reti fasi?
1 Jesus Krestes ben de a moro bigi leriman di oiti ben libi na grontapoe. A ben taki na wan fasi di ben naki na ati foe sma, a ben boeweigi den firi foe den, èn ben boeweigi den foe doe boen wroko (Mat. 7:28, 29). Ala ten a ben gebroiki a Wortoe foe Gado leki a fondamenti foe den leri foe en (Luk. 24:44, 45). A ben gi Jehovah Gado a grani gi ala sani di a ben sabi èn di a ben man leri sma (Joh. 7:16). Jesus ben poti wan toemoesi boen eksempre gi den bakaman foe en di a ben gebroiki a Wortoe foe Gado na wan reti fasi. — 2 Tim. 2:15.
2 Na apostel Paulus ben de wan kefalek boen eksempre toe foe di a ben gebroiki a Wortoe foe Gado nanga boen bakapisi. A ben doe moro leki nomo foe leisi den Boekoe foe bijbel gi tra sma; a ben froeklari èn ben taki-go-taki-kon foe den sani di a ben leisi, èn a ben gi boeweisi foe a Wortoe foe Gado taki Jesus ben de a Krestes (Tori. 17:2-4). So srefi a disipel Apolos di ben man taki boen, ben „kisi boen leri foe den Boekoe foe bijbel”, èn a ben gebroiki den na wan reti fasi di a ben pristeri a waarheid na wan krakti fasi. —Tori. 18:24, 28.
3 De wan sma di e gi leri foe Gado Wortoe: Disiten Kownoekondre preikiman abi kefalek boen bakapisi foe leri opregti sma foe di den e sori go na èn e taki-go-taki-kon foe bijbel. Na ini wan kefal, wan brada ben man foe gebroiki Esekièl 18:4 makandra nanga den tekst di abi foe doe nanga en, foe taki-go-taki-kon nanga wan pastoor nanga dri foe den kerkisma foe en, foe a tori san o pasa nanga den godelowsoesma èn den regtfardikisma. Leki wan bakapisi foe dati, wan toe memre foe a kerki ben bigin studeri, èn te foe kaba, wan foe den ben teki a waarheid. Na ini wan tra kefal wan sisa ben kisi na aksi foe froeklari gi a masra foe wan sma di ben abi belangstelling èn di ben kisi gens foe en, foe san ede Jehovah Kotoigi no e hori kresneti èn frijari-oso. Di a sisa ben leisi den piki foe bijbel langalanga na ini a Redeneren-boekoe (Taki-go-taki-kon-boekoe), dan a man ben taki dati a e agri. A wefi foe en ben breiti sote nanga den piki disi, taki a ben taki: „Wi sa kon na den konmakandra foe joe.” Èn a masra ben agri nanga dati!
4 Gebroiki a jepi di de foe kisi: Wi Kownoekondre Dienst nanga a programa foe a diniwroko-konmakandra e gi heri boen tiri foe jepi wi foe man gebroiki a Wortoe foe Gado. Foeroe preikiman sori warderi gi den difrenti pristeri di gi leki rai èn di tjari kon na doro èn di e demo gi a boen foe wi èn di sori taki den kon na a joisti ten èn abi boen bakapisi. Redeneren aan de hand van de Schrift (Taki-go-taki-kon nanga jepi foe den Boekoe foe bijbel) abi kefalek foeroe idea fa foe froeklari na wan reti fasi, foe moro leki 70 prenspari tori di a Wortoe foe Gado e taki foe den. Sabi di e tjari joe go na têgo libi e gi wan sjatoe overzicht foe ala den prenspari bijbel tori di den njoen sma moesoe froestan. Den studie 24 nanga 25 foe a Handleiding voor de Theocratische Bedieningsschool (Handleiding gi a theokrasia diniwroko skoro) e sori wi fa bekwaam leriman e bigin taki foe a tekst, e leisi en, èn fa den e gebroiki den tekst na wan joisti fasi. Wi moesoe meki boen gebroiki foe ala den jepi disi di de foe kisi wantewante.
5 Te wi e gebroiki a Wortoe foe Gado na wan reti fasi, dan wi sa si taki a „de libilibi èn a abi krakti . . . èn a man foe si krin san na ati” foe den wan gi soema wi e preiki, „e denki èn abi na prakseri” (Hebr. 4:12). A boen bakapisi di wi e kisi foe di wi e gebroiki a Wortoe foe Gado, sa boeweigi wi foe taki a waarheid sondro foe frede srefisrefi! — Tori. 4:31.