Gebroiki Gado Wortu na wan reti fasi
1 Di Filipus ben preiki gi wan heiheiman, dan a „opo en mofo èn bigin nanga [wan spesrutu] tekst, a ben fruteri en a bun nyunsu fu Yesus” (Tori. 8:35). Filipus ben gebroiki „a wortu fu waarheid na wan reti fasi” (2 Tim. 2:15). Ma na ini a ten disi den kring-owruman kon si taki furu preikiman e gebroiki Bijbel wanwan leisi nomo te den e preiki. Yu e gebroiki Bijbel ini yu diniwroko?
2 Ibriwan sani di wi e bribi èn ibriwan sani di wi e leri, skrifi na ini Gado Wortu (2 Tim. 3:16, 17). Bijbel e hari sma kon na Yehovah. Bijbel e gi sma leri di den abi fanowdu ini a libi. Dati meki a de prenspari taki wi e gebroiki Bijbel ini wi diniwroko na presi fu taki wan tori nomo di wi lobi (Hebr. 4:12). Fu di furu sma sabi pikinso nomo fu Bijbel, meki wi musu gebroiki en fu sori den fa Bijbel kan yepi den fu abi wan bun libi. Wi musu gebroiki Bijbel tu fu sori sma san a e pramisi a libisma famiri gi a ten di e kon.
3 Leisi langalanga komoto na Bijbel: Kande yu kan pruberi fu go preiki sondro wan tas di lai buku. Yu kan poti a buku di yu wani pristeri ini wan pikin tas. Hori a Bijbel na ini yu anu noso poti en na ini yu saka. Te yu e taki nanga wan sma, yu kan opo yu Bijbel sondro taki yu e meki a sma prakseri taki yu e pruberi fu hori wan lezing gi en. Yu musu tanapu na so wan fasi taki a sma di e arki yu, kan leisi makandra nanga yu na ini yu Bijbel. Kande yu kan aksi en fu leisi wan tekst so taki yu kan yere dati. Te wan sma man si san Bijbel e taki, dan dati o meki taki a poti moro prakseri na dati, leki te yu ben o fruteri en nomo san Bijbel e taki. A no de fu taki dati, efu yu wani yepi en fu frustan san a tekst e taki, dan yu musu poti krakti tapu den prenspari wortu.
4 Wan takimakandra pe yu e gebroiki wan tekst nomo: Baka di yu fruteri a sma yu nen, yu kan taki: „Sma e suku yepi na ala sei. Pe yu denki taki wi kan feni a moro bun rai di kan yepi wi? [Gi okasi fu piki.] Fa yu feni den wortu disi? [Leisi Odo 2:6, 7 èn gi a sma na okasi fu piki.] Ala sma kon si taki a koni fu libisma no man yepi wi srefisrefi, ma a e meki furu sma lasi-ati. Ma yu kan gebroiki a koni fu Gado ala ten èn a o yepi yu trutru na ini yu libi.” Sori en a buku di yu wani pristeri en. Poti krakti tapu wan eksempre na ini a buku di e sori o bun a koni fu Gado de.
5 Yesus ben gebroiki den Buku fu Bijbel fu yepi opregti sma (Luk. 24:32). Paulus ben sori taki den sani di a ben leri sma, skrifi na ini Bijbel (Tori. 17:2, 3). Te wi sabi moro nanga moro fa fu gebroiki Gado Wortu na wan reti fasi, dan dati e meki taki wi sa man taki nanga moro deki-ati èn wi o feni moro prisiri ini a diniwroko.