Gi leri bekwaam èn nanga faja

„Go foe dat-ede èn meki discipel foe sma foe ala naatsi . . . èn leri den foe hori ala san mi ben komanderi oenoe.” — MATTÉUS 28:19, 20.

1. Odo 22:29 e gi wi dek’ati foe doe san, èn fa so?

A WORTOE foe Jehovah e gi dek’ati foe de bekwaam èn nanga faja. Wi e lési foe eksempre: „Joe ben si wan man, koni na ini en wroko? Na fesi foe kownoe den sa poti en; A no sa poti ensrefi na fesi foe gewoon sma” (Odo 22:29). A no de foe taki dati nowan fowtoe de na ini foe wroko gi „gewoon sma”. Ma na boen wroko foe wan bekwaam wrokoman no sa de wan kibri tori. A njoensoe foe en bekwaamheid kan doro srefi te na a jesi foe wan kownoe, di kan de nanga ala prisiri sa wani meki gobroiki foe den dienst foe en!

2. (a) San de fanowdoe ini ala wroko foe kisi bekwaamheid? (b) Foe san-ede na doeltreffendheid nanga san wan kristen bedinari e leri sma de so prenspari?

² Sabi nanga bekwaamheid de fanowdoe na ini ibri wroko. Wan man kan kisi leri foe de wan temreman èn kan leri ooktoe foeroe te a e loekoe den sma di de bekwaam na ini a wroko dati. Ma foe kweki wan séker bekwaamheid srefi, dan a moe tjari na sabi di a kisi na ini praktijk. Wan datra di e koti sma moe kisi wan universitaire opleiding. Ma foe de koni ini en wroko, a moesoe gebroiki na sabi foe en na ini a oparatie kamra. Èn ini na wroko dati bekwaamheid de toemsi prenspari èn wani taki libi, bika koni foe doe a wroko nofotron kan wani taki gi na sikiman libi ofoe dede. Tokoe a de moro prenspari foe de koni foe doe a wroko, foe wan bedinari foe na evangélium. Foe san-ede? Foe di na boen fasi fa na bedinari e gi leri na sma heri boen kan wroko tapoe a fasi fa a sma o doe nanga na boen njoensoe. Èn a fasi fa den o doe baka kan wani taki gi den a difrenti a mindri tégo libi nanga tégo dede. — Deuteronomium 30:19, 20; Johannes 17:3.

3. San de tranga fanowdoe ini a meki foe discipel?

³ Na ini na komando di Jezus ben gi en bakaman, na gi foe leri na sma de ini a tori. A ben taki: „Go foe dat’ede èn meki discipel foe sma foe ala naatsi, dopoe den na ini a nen foe a Tata èn foe na Manpikin èn foe na santa jeje èn leri den foe hori ala san mi ben komanderi oenoe. Èn loekoe! mi de nanga oenoe ala dé te na a bosroiti foe na seti foe sani” (Mattéus 28:19, 20). A no de foe taki dati a e aksi bekwaamheid foe leri den opregtiwan foe ati ala sani di Jezus ben komanderi.

4. (a) Nanga sortoe jejfasi leri moe gi tapoe wan bekwaamfasi? (b) Fa Apóllos ben njan boen dati a ben de ini a kompani foe Aquila nanga Priskilla?

⁴ Na bekwaamfasi disi foe leri sma moe pasa nanga faja. Ija, kristensma moe „de nanga faja gi toemsi boen wroko”, èn dati abi na ini en séker ooktoe na gi foe jeje leri na ini na velddienst èn na ini na gemeente (Titus 2:14). Leki bekwaam leriman Aquila nanga Priskilla ben teki na ini Efese Apóllos „na ini a kompani foe den ben leg na pasi foe Gado moro soifri uit na en”. Apóllos ben njan foeroe boen foe dati bika bakaten na ini Acháje ’a ben bewijsi den djoe boenboen èn finifini na publiki taki den no ben abi leti èn a ben sori nanga jepi foe den boekoe dati Jezus ben de na Kristus! (Tori foe den Apostel 18:24-28). A de krin dati Apóllos no ben de wawan wan bekwaam leriman di ben abi faja.

’Poti prakseri na a leri foe joe’

5. San e kon na krin na ini 1 Timotéus 4:16?

⁵ Na apostel Paulus ben skrifi gi en kompe-wrokoman Timotéus: „Poti alaten prakseri na joesrefi èn na a leri foe joe. Tan na den sani disi, bika te joe doe disi, joe sa jepi joesrefi èn den sma di e arki na joe” (1 Timotéus 4:16). Foe di na ferloesoe foe na leriman èn na studenti de ini gevaar, meki na a gi foe sowan leri wan sma moe sori taki a de séker bekwaam èn nanga faja.

6. Fa joe kan kisi koni foe gebroiki na bijbel, èn sortoe aksi di fiti de warti foe wi go prakseri?

⁶ Temreman nanga datra di e koti sma opo séker moe poti prakseri a densrefi. Den moe kan gebroiki den wroko-sani ofoe den instrument foe den na wan konifasi. Asrefi de ooktoe so gi na kristen bedinari di a moro prenspari wroko-sani foe en de ’na fet’owroe foe na jeje, a Wortoe foe Gado’ (Efese 6:17). Fa joe kan gebroiki na wan boen fasi den boekoe? A no de foe taki foe di joe e studeri èn gebroiki den boekoe alaten. Joe ben lési na bijbel foe dat’ede foe bigin go miti a kaba èn joe ben teki a ten foe dati foe go denki dipi foe na moi rai di de na ini? Joe e lési ala dé na ini? Joe e gebroiki na bijbel geregeld na ini na velddienst? Èn joe e njan boen dorodoro foe na boen jeje njanjan di Jehovah e gi via „na getrow èn koni srafoe”? — Mattéus 24:45-47.

7. Sortoe rai e gi na ini a tori foe ten foe studeri èn fa bewijsi kan gi nanga jepi foe na bijbel foe na fanowdoe foe studie?

⁷ Sorgoe dati joe poti ten na wan sé foe na studeri foe na Wortoe foe Gado èn den waarheidgetrow kristen boekoe. Dan joe jeje sa kon foeroe nanga boen bodoi di joe sa njan boen foe den èn di joe kan gebroiki foe piki aksi foe opregti sma (1 Petrus 3:15; Kolosse 4:6). A pisten foe studi nanga go prakseri dipi foe sani e kenki foe na wan osofamiri go miti a tra osofamiri èn foe a wan sma go miti a tra sma. Son sma e feni en boen na a kaba foe a dé foe studeer. Trawan kande mamanten froekoe te a opo èn en ferstan de moro krin, Trawan baka kande e feni na bakadina moro boen gi den. Ini ala geval a de so dati regelmaat nanga faja de toemsi prenspari. Jozua nanga den kownoe foe Israël ben moesoe lési Gado Wortoe ala dé. — Jozua 1:7, 8; Deuteronomium 17:18-20.

Doe moeiti foe tron wan moro boen leriman

8. Fa na leri bekwaamheid foe joe kan kon moro boen te joe e gebroiki associatie nanga joe ferstan?

⁸ Na meki kan moro boen foe leribekwaambeid e aksi tranga wroko. Wan fasi fa joe kan meki na bekwaamheid foe joe leki leriman kon moro bigi, de, te joe e studeri na bijbel ofoe kristen boekoe foe gebroiki associatie dati wani taki (foe tai a wan prakseri na a trawan). Tai njoen prakseri na den di joe sabi kaba. Disi sa jepi joe foe seti bodoi ini joe ferstan sodati joe kan tjari den sani kon a krin te joe e leri wan tra sma. A no de foe taki dati joe ben gebroiki na ini joe studi na ini a ten di psa associatie. A so kande wan dé joe no ben ferstan dati kristensma moe de na ini relatieve onderworpenheid na tiri, ofoe den „hé makti”. Ma now joe sabi dati a gi jesi na Gado moe kon tapoe a fosi presi (Romeini 13:1-8; Markus 12:17; Tori foe den Apostel 5:29). Joe e ferstan disi foe di joe ben tai njoen punt nanga den punt di joe ben sabi kaba.

9. Sori fa joe kan tjari kon na joe fesi wan sani foe bijbel di ben pasa.

⁹ Ete wan fasi fa joe kan meki na leri bekwaamheid foe joe kon moro bigi de, te joe e tjari den sani di a bijbel taki psa kon a fesi joe ai. Proeberi disi now wantewante pikinso nanga Kroetoeman 7:19-22. Na ini na doengroe Gideon nanga drihondro man e lontoe wan legre kampoe foe Midian pe djonsro de den ben poti waktiman. Wantronso joe e jere a groepoe foe Gideon foe hondroman e bro tapoe den toetoe, èn joe e si den e naki den bigi watra djogo broko di den abi na den. Den toe hondro tra Israëlsma e doe asrefi. Èn te den alamala e hori wan frambo nanga faja a loktoe, joe e jere den e bari tranga: „Na fet’owroe foe Jehovah èn foe Gideon!” Te den Midiansma di e frede te foe dede e lon gwe, Gideon dri groepoe e tan bro tapoe den toetoe, èn joe e si dati a de Jehovah di ben tjari en so dati den féanti di e lon gwe e bigin feti nanga makandra nanga fet’owroe. Foe di joe tjari a sani disi di psa kon a joe fesi, meki joe sa hori en boen na ede èn joe sa gebroiki en te joe e gi leri na tra sma. Wán les di wi séker e leri foe en, de dati Jehovah kan fri en pipel sondro wan bigi libisma legremakti. — Psalm 94:14.

10. Fa joe ben sa kan gebroiki na agersitori foe Kroetoeman 9:8-15 na ini joe leri?

¹⁰ Toemsi moi agersitori soleki di foe den boekoe, kan meki joe bekwaamheid leki leriman ooktoe kon moro bigi. Loekoe foe eksempre Kroetoeman 9:8-15. Na manpikin foe Gideon Jotham ben ferteri wan dé dati den bon ben hari go foe salfoe wan tiriman poti a tapoe den. Aladi na olijfbon, nanga figabon èn na droifibon wegri foe abi wan positsi foe makti, na gewone maka boesiboesi e teki dati nanga ala toe anoe. Den warti bon e prenki warti sma di no e feti foe kisi na kownoewroko a tapoe den kompe-Israëlsma foe den. Na maka boesiboesi, di abi waarde soso leki oedoe foe gron, ben de wan agersifasi foe na kownoewroko foe na asranti Abimélech di ben e angri foe kiri sma èn di ben wani masra tra sma ma nanga soema a no ben waka boen leki wan kontroe foe a profétitori foe Jotham (Kroetoeman 9:50-57). Na agersitori disi ben sa kan gebroiki foe poti krakti a tapoe fa a de fanowdoe foe doe san de joisti èn san de sakafasi, èn no asranti. — Psalm 18:26, 27; 1 Petrus 5:5.

11. (a) Sortoe punt kisi krakti nanga na agersitori foe Jezus na ini Mattéus 13:45, 46? (b) San na fasi foe na agersitori e tjari kon na fesi foe a tori foe den agersitori di kristen leriman e gebroiki?

¹¹ Na Bigi Toriman, Jezus Kristus, sma sabi foe den toemsi moi agersitori foe en. Loekoe foe eksempre den wortoe disi foe en pikinso: „Na Kownoekondre foe hemel de leki wan koopman di e reis èn di de e soekoe boen moi peri. Di a ben feni wán peri foe bigi waarde, a ben gwe èn a ben seri wantewante ala san a ben abi èn a ben bai en” (Mattéus 13:45, 46). Na so fasi Jezus ben agersi o diri na Kownoekondre de èn a ben sori dati wan sma di troetroe e ferstan o warti a de foe kisi a Kownoekondre disi ben sa de klari foe libi ala sani di a ben sa abi ooktoe. No wan fromoe ben de na ini na agersitori dati, èn kristen leriman e doe boen foe hori na marki-tiki dati na prakseri te den e gebroiki agersitori leki wan jepi ini a leri di den e leri sma.

Komakandra kan meki oen kon moro bekwaam

12. Fa na go na publikitaki kan jepi wi foe meki wi leri bekwaamheid kon moro boen?

¹² Kristen komakandra e jepi srefsrefi dati Jehovah dienstknegti tron bekwaam leriman di de nanga faja. Soleki e kon na krin na ini a berkipréki foe Jezus, dan publiki taki de wan toemsi moi jepi foe gi jeje leri (Mattéus 5:1-7:29). Foe dat’ede meki publiki taki de a mindri den komakandra di Jehovah Kotoigi e hori now. Joe de geregeld a tapoe den? Joe de wan arkiman di e poti prakseri boen? Joe e opo den tekst ini joe bijbel di a takiman e lési? Joe abi na gwenti foe meki aantekening? Disi de fasi foe meki joe bekwaamheid leki leriman kon moro boen, èn na heri boen bijbel leri no sa meki wawan joe bekwaamheid kon moro bigi ma ooktoe joe faja leki wan sma di e meki discipel.

13, 14. (a) Oten a meki foe discipel ben kisi spesroetoe betekenis a mindri den dienstknegti foe Jehovah? (b) San wi ben sa kan aksi wisrefi heri boen na ini a tori foe na Wachttoren-studi èn na gemeenteboekoestudie?

¹³ A meki foe discipel ben kisi wan aparti betekenis a mindri Jehovah dienstknegti di na kari ben kon foe ’préki na kownoe èn na Kownoekondre’, wan kari di foe na fositron ben de foe jere na a ten foe na congres foe den na Cedar Point (Ohio) ini 1922. Na ini a jari dati foe na fositron groepoe studi ben hori foe Na Wachttoren. A tijdschrift disi séker ben poti a bijbelleri nanga na Kownoekondreprékiwroko alaten na fesi. Soso a nen kaba Na Wachttoren — Boskopoeman foe Jehovah kownoekondre e sori tapoe dati. Joe de wan enthousiast lésiman foe na Wortoe foe Gado èn joe e gebroiki Na Wachttoren leki jepi ini disi? Joe e teki prati fajafaja na a alawiki Wachttoren-studie?

¹⁴ Na ala wiki gemeente boekoestudi e sorgoe ooktoe foe okasi foe meki joe bekwaamheid leki leriman foe a boen njoensoe kon moro boen. Te joe e gi piki tapoe aksi a tapoe den moro pikin komakandra disi, joe e doe dati dan — èn dati wi kan taki ooktoe foe Na Wachttoren-studi — nanga joe égi wortoe? Den commentaar foe joe e sori san joe e bribi ini joe ati?

15. San de a marki foe na dienstkonmakandra, èn fa wan programma e gi foe dati?

¹⁵ Bifo 1922 Jehovah Kotoigi ben abi na gwenti foe konmakandra na mindri wiki foe wan konmakandra foe begi, prijse èn na gi foe kotoigi. A ben de wan konmakandra pe den ben e prijse, gi kotoigi èn ben e begi. Ma di moro krakti ben e poti na tapoe na Kownoekondreprékiwroko oso foe oso, na konmakandra disi gro kon tron na dienstkonmakandra pe na prékiwroko e kisi foeroe prakseri. Wan bigi jepi ben de na Bulletin, di ben abi instructie foe na velddienst èn kotoigi di ben kan gebroiki na ini na diniwroko, Na ini a ten disi den sortoe jepi disi wi e kisi na ini wi Kownoekondredienst, pe ooktoe wan programma de gi na ala wiki „konmakandra di e jepi wi foe meki discipel”. Joe e teki geregeld prati na den sortoe konmakandra disi? Joe e gebroiki na rai di bedoel foe jepi joe foe leri sma bekwaam èn nanga faja?

16. Soleki ben tjari kon na fesi na a ten di na theokratis diniwrokoskoro ben opo dan san de na marki foe en?

¹⁶ Foe meki na bekwaamheid foe a gi foe leri kon moro boen meki dati na ini 1943 na theokratis diniwrokoskoro ben opo na ini den gemeente foe Jehovah Kotoigi. Foe na moro prenspari marki foe na skoro na fosi leri boekoe di den ben gebroiki e ferteri disi: „Na cursus disi no e gi foe teki a ten di oenoe e gi na a velddienst, ma a poti foe jepi oenoe foe kon moro bekwaam na ini. Foe taki en moro aparti: a marki foe a ’Cursus disi ini na theokratis diniwroko’ de foe train ala ’getrowwan’, den sma di ben jere a Wortoe foe Gado èn ben bewijsi a bribi foe den na ini disi, sodati den ’sa man foe leri trawan’ foe di den e go doro foe doro, e tjari go-baka, foe hori modelstudi èn boekoestudi, èn foe taki en sjatoe, foe teki prati na ibri pisi foe na Kownoekondrediniwroko. Wan marki de ini prakseri: foe meki ibri sma tron wan boen theokratis bedinari di de leki wan grani gi na nen foe Masra; dati a kan de srekasreka moro boen foe gi kotoigi na publiki foe na howpoe di de ini en; dati a ’kan de bekwaam foe leri sma, nanga pasensi, leri sma nanga safrifasi’ (2 Tim. 2:24, 25). No meki nowan sma lasi na ede marki foe na cursus disi na prakseri” (Course in Theocratic Ministry, blz. 4). Disi de te now ete na moro prenspari marki foe na theokratis diniwrokoskoro. Joe poti na ini joe libi den toemsi moi bodoi di e go foe a leri foe sma, lési, taki na publiki èn so moro fara di den leri boekoe di na skoro disi e gi?a Joe skrifi joe nen leki wan sma di e teki prati na a skoro? Nanga tangi joe e teki joe toewijzing gi na skoro programma èn joe e doe den boen? Na seti disi foe Jehovah via en organisaatsi kan jepi dati joe tron wan bekwaam bedinari di de nanga faja.

Opleiding foe leri sma nanga faja

17. Sortoe jeje sani Jehovah be seti gi den sma di e leri trawan na ini en santa waarheid?

¹⁷ Jehovah e seti jeje sani pasa marki gi den sma di e leri trawan na ini en santa waarheid. A e sorgoe foe eksempre foe bijbel lectuur, ala wiki komakandra èn moro bigi komakandra. Den toemsi boen seti disi e jepi kotoigi di gi densrefi abra foe tron bekwaam leriman di de nanga faja.

18. Sortoe seti owroe man kan regel na ini a ten disi foe meki na velddienst go na fesi efoe den e waka na baka na eksempre foe Jezus nanga Paulus?

¹⁸ Ma san wi kan doe efoe den poti wi leki owroe man ofoe wi de kotoigi foe Jehovah nanga moro ondrofeni? Dan lobi foe tra sma moe bewégi wi foe jepi njoenwan èn den kristen di no abi ondrofeni foe den tron moro bewaam leriman di abi moro faja. Èn disi séker de wan joisti sani bika Jezus ben seni den sébitenti discitel go pas a doro baka di a ben gi den instructie foe na diniwroko foe den (Luk. 10:1-24). Paulus ben leri den opziener foe Efese „na publiki èn oso foe oso”, san ben wani taki dati a ben gi den leri fa foe doe na velddienst doro foe doro foe kan gi sma di no de ini bribi kotoigi (Tori foe den Apostel 20:20, 21). Na so ooktoe now owroe man pionier nanga trawan kan gi opleiding na kompe-kotoigi ini na velddienst nanga prisiri. Joe e feni dati joe abi sowan sortoe opleiding fanowdoe? Aksi spesroetoe foe dan èn teki na okasi nanga ala toe anoe. Joe de wan owroe man? Seti sani foe jepi trawan na ini a diniwroko èn teki joesrefi fesi na ini na velddienst fajafaja.

Tan kweki bekwaamheid

19. Foe san-ede wi moe go taki na ini wi begi foe wi diniwroko?

¹⁹ Datra di e koti sma, temreman nanga trawnn kan kon moro bekwaam te den kisi moro studi èn poti na sabi di den kisi na ini na ala dé libi. Asrefi de ooktoe so gi kristen bedinari. O prenspari a de foe dat’ede dati ibri kotoigi foe Jehovah di gi ensrefi abra wroko tranga foe meki na bekwaamheid foe en leki leriman foe na boen njoensoe kon moro bigi èn foe di disi de a wroko foe Jehovah, meki wi moe teki en leki wan tori di wi e taki foe en na ini wi opregti begi. Efoe wi e soekoe a jepi nanga tiri foe Jehovah dan wi kan fertrow na tapoe dati a sa blesi wi faja diniwroko. Soleki na apostel Johannes ben taki: „San wi e aksi ooktoe, wi e kisi foe [Jehovah Gado], foe di wi e hori en komando èn e doe den sani di de switi ini en ai.” — 1 Johannes 3:22.

20. San moe de na faste bosroiti foe wi leki kotoigi foe Jehovah, now di a seti foe sani disi e kon na wan kaba?

²⁰ Meki foe dat’ede wi span wisrefi krakti na ini na diniwroko, now di wi e si taki na disiten goddelowsoe seti foe sani e kon na wan kaba. Meki wi ’poti prakseri na wisrefi èn na wi leri’, san sa tjari ferloesoe gi wi èn gi den di e gi jesi na a Kownoekondreboskopoe. Ija, meki wi doe ala moeiti foe leri sma bekwaam èn nanga faja,

[Foetoewortoe]

San joe ben sa taki?

◻ San de moro fanowdoe foe meki discipel boiti foe préki?

◻ Foe san-ede wi moesoe poti prakseri na san wi e leri?

◻ San na wan toe fasi foe meki na leri bekwaamheid kon moro bigi?

◻ Fa kristen konmakandra kan jepi wi foe de bekwaam leriman di de nanga faja?

◻ San owroe man nanga tra kotoigi di abi ondrofeni kan doe na ini a tori foe na velddienst?

[Prenki na tapoe bladzijde 9]

Efoe joe tajri sani di pasa foe a bijbel kon na fesi joe ai, joe kan tron wan moro boen leriman

[Prenki na tapoe bladzijde 11]

Na leriman fne na theokratis diniwrokoskoro e jepi studenti foe kon de bekwaam na ini na Kownoekondrediniwroko