Satisferi yu yeye nowtu
1 Yeyses ben taki: „Koloku den wan de di sabi den yeye nowtu” (Mat. 5:3). Fu san-ede a de so prenspari fu wi sabi wi yeye nowtu? Fa wi kan sori taki wi sabi wi yeye nowtu? Gi sortu trapu wi musu kibri wi srefi, èn sortu blesi de a bakapisi te wi sabi wi yeye nowtu?
2 Degedege no de taki wi alamala sabi taki wi gesontu na skinfasi abi fu du nanga bun nnyan. Wan sma no kan fruwakti taki ibri dey a o gi kwaliteit wroko efu doronomo a no e sorgu gi en fanowdu na skinfasi. A srefi gronprakseri e teri te wi e misi fu gi wi srefi nnyan na yeyefasi. — Mat. 4:4; Yoh. 17:3.
KONMAKANDRA E YEPI WI FU SATISFERI WI NOWTU
3 Wi gesontu na yeyefasi abi wantewante fu du nanga wi nnyan programa na yeyefasi. Tapu den konmakandra fu wi „a kotrow èn koni srafu” e sorgu gi wan tumusi moy nnyan programa fu satisferi wi yeye nowtu (Mat. 24:45-47). Ibri konmakandra abi wan aparti marki, èn wi no musu misi no wan fu den. Yu e sreka yu srefi gi ibri konmakandra èn yu e fisiti den doronomo?
4 Meki wi luku syatu soso dri fu den feyfi ala wiki konmakandra fu wi. A moro prenspari konmakandra, di abi leki marki fu meki unu hori skinskin nanga a waarheid di e go na fesi, de Na Waktitoren-stuka. Na teyokrasiya diniwroko skoro kan yepi wi fu kon moro koni leki bedinari. A gemeente bukustudi e sorgu gi wan finifini studi fu difrenti beybri tori.
5 Yu e sreka yu srefi gi den gemeente konmakandra? Son wan e luku a studiemateriaal frafra, e hari strepi esi-esi na ondro den piki tapu den aksi, ma no e suku den tekst di de na ini a paragraaf. Kande den sreka pikinso fu gi piki, ma den e puru ala sani di de leki yeye nnyan na ini? Fasi de fu yu nanga yu osofamiri kan tyari kenki kon ini a tori fu a sreka fu unu srefi gi den konmakandra?
BAY A TEN
6 Te yu poti ten a wan sey fu sreka yu srefi gi konmakandra, dan no meki telefisi ofu wan tra sani di no prenspari kon a mindri den plan fu yu. Spesrutu osofamiri-edeman musu yepi den osofamiri fu hori den srefi na wan doronomo programa fu beybristudi, fu sreka den srefi gi den konmakandra èn fu teki prati na a preykiwroko. Wi alamala musu teki a ray fu na apostru Paulus seryusu ’fu bay a yoysti ten’ èn poti wi yeyefasi fu denki èn si sani na a fosi presi. — Ef. 5:15-17.
7 Te wi sabi wi yeye nowtu, dan wi sa kibri wi srefi gi a trapu fu de tevrede nanga wi srefi ofu plisi wi srefi. Leki aparti sma èn leki osofamiri wi abi trutru yeye nowtu. Wi têgo koloku e anga fu den tranga muyti di wi e du fu satisferi wi yeye nowtu.