Fu san-ede yu musu wani fu hori wan beibristudi
1 Wan fu den ondrofeni gi wan kresten di e pai moro ala trawan na fu Yehovah kobroiki en fu yepi wan sma fu tron wan disipri fu Krestes (Mat. 28:19, 20; 1 Kor. 3:6, 9). Dati kan wani taki têgo libi, gi den wan di wi e yepi na sofasi.
2 Wan bun krosibei banti e gro kon na mindri a sma di e gi leri nanga a sma di e kisi leri. A yeye gro fu a stukaman de trutru wan fonten fu bigi prisiri (1 Tes. 2:11, 19, 20). Fu dati-ede meki ibri kresten musu poti leki marki gi ensrefi fu hori no moro mendri leki wán oso-beibristudi nanga wan sma di no de wan pisi fu en eigi osofamiri. A no de fu taki taki a de a frantiwortu fu ibri osofamiri-edeman fu abi nanga en eigi osofamiri, wan doronomo beibristudi di wani taki wan sani. Na ini osofamiri pe a ppa no de na bribi, a kresten mma sa musu seti sani di fiti fu studeri a beibri nanga den pikin.
BEGI FU FENI STUDI
3 Fu di wi doro so fara kaba na ini a ten disi fu a kaba, meki wi alamala musu du muiti fu hori beibristudi nanga bun bakapisi. Fu di doronomo wi e begi Yehovah fu feni wan beibristudi, wi e sori taki a de wi opregti winsi fu hori wan. Na ini disi a e kon a krin taki wi e frustan taki a e go fu wan afersi fu libi nanga dede (Eseik. 33:7-9, 14-16). Wi kan de seiker fu a blesi fu Yehovah gi den muiti di wi e du nanga wi bun konsensi. —1 Yoh. 5:14, 15.
4 Fu abi bun bakapisi ini a meki fu disipri, wi musu sreka unu srefi bun. A bun so srefi tu fu luku na trawan di bun srefisrefi ini a hori fu beibristudi. Na ini den mun di e kon wi sa taki fu rai fu opziener di e rèis nanga trawan di ben abi bun bakapisi ini a meki fu disipri. Na ini wan lo artikel wi sa poti a prakseri tapu wantu praktis idea fu a opo èn hori fu beibristudi di e meki froktu.
ARTIKEL DI E KON
5 San na wantu fu den idea disi di wi sa luku na ini Wi Kownukondredienst fu den mun di e kon? Wi sa taki fa difrenti preikiman nanga pionier ben bigin beibristudi èn sortu fasi fu gi leri den kobroiki fu doro na ati fu den sma di den e gi leri. Wi sa gi so srefi rai fu a bow fu warderi gi Yehovah organisâsi èn fu a kweki fu a angri fu abi wan prati na a preikiwroko. Rai sa gi tu fu a fasi fa yu kan meki yu eigi osofamiri beibristudi o wani taki moro so taki den pikin kan kweki fu den sei wan krosibei matifasi nanga Yehovah.
6 Den fo dienst yari di psa, 959.834 sma teki dopu na a heri grontapu fu san 507 na ini Sranan. A moro bigi pisi fu den ben kon nanga a yepi fu wan sma di ben hori wan beibristudi nanga den, te kon doro a penti fu na dopu. Den nomru fu sma di de na a Memrefesa èn na den kongres fu wi e sori taki moro furu sma kan kisi yepi fu go na fesi fu teki dopu. Fu di wi e tan du muiti fu opo beibristudi èn hori den, wi sa man fu yepi moro furu sma ete fu tron disipri èn te fu kaba nyanbun fu a têgo libi. —1 Tim. 6:12, 19.