Gi grani na a Mekiman fu ala sani
1 Na ini a di fu tina-neigi yarihondro, Satan ben meki wan triki fu breni na libismafamiri — na evolutie theorie (2 Kor. 4:4). A theorie disi na wan sani di sondro fu syen e trowe a beibri leri fu a meki di Gado meki sani èn fu a fadon di libisma fadon go na ini sondu. A ben sa meki a frulusu-paiman fu Yeises nanga ala sani di a beibri e leri fu a Kownukondre nanga têgo libi tron wan soso sani. Boiti fu dati, na evolutie theorie e grati na pasi gi tranga-ogridu nanga orloku, sekshurudu, nanga ala sortu fasi fu kruktudu. Suma sa warskow a libismafamiri gi den kofar fu a leri disi di e tyari dede kon?
2 Na ini a mun oktober wi sa du disi, fu di nanga faya wi o meki bekenti taki Yehovah na a Mekiman. Na ini a oso fu oso diniwroko, na ini a stratiwroko, na wi grontapu wroko te wi e bro pikinso èn na skoro, wi sa pristeri na buku Libi — Fa a du kon? Nanga yepi fu evolutie ofu fu di Gado meki sani? (Bakratongo) Wi wani taki ala sma sabi fa na evolutie theorie e broko na Mekiman fu libisma en saka.
GI KOTOIGI DI ABI BUN BAKAPISI
3 Te yu e preiki na okasi ofu e wroko oso fu oso, dan kande yu kan bigin wan takimakandra fu di yu e sori na tapu san nyunsu e taki fu den krakti overtoigi di son sma abi fu a tori fu evolutie. Bun furu fasi fu denki ben tyari kon na fesi di abi fu du nanga na aksi efu na evolutie theorie musu leri na den Lanti skoro. Sontron wan sani fu evolutie e kon na ini a nyunsu. Efu now a oso sma yere en ofu no, degedege no de, taki a sa feni en wan moi sani fu leisi wan krin piki na ini a beibri di abi wantewante fu du nanga a tori. Sori go na san tanapu ini Hebrew sma 3:4. Leisi a tekst èn gi syatu commentaar a tapu.
4 Efu a e sori taki a sma abi wan kerki, dan yu kan tyari kon na fesi taki kerki sma nanga so srefi sma di e bribi na ini evolutie, furutron e gi sani di no de wan persoon, so leki „a natuur” ofu a „Mama Natuur” di sma meki kon leki wan persoon, a grani leki a krakti di de na baka ala den moi sani di wi e si lontu wi. Ma a beibri no e meki wi tan sondro fu sabi suma na wi Bigi Yepiman di e du wi furu bun èn a Mekiman fu a tumusi moi universum disi. Na sma prakseri kan poti tapu Openbaring 4:11. Baka te a tekst leisi, dan kande a sma srefi wani taki wan sani di abi fu du nanga na afersi. Kobroiki san a sma taki fu di yu e tyari wan ofu tu spesrutu penti fu a Mekisani-buku kon na fesi, èn efu a fiti, gi en deki-ati fu leisi a buku.
NA SKORO
5 Fu di wan nyun skoro yari e bigin, meki unu alamala, yongu futuboi fu Yehovah, sa wani leisi ete wantron yu Mekisani-buku, èn suku fasi fu wiki na belangstelling fu den konpe stukaman fu yu èn so srefi fu den meistri fu yu. Sonwan kon si taki soso fu di den libi a buku tapu den skoro bangi, taki dati e opo na pasi fu bigin wan takimakandra. Trawan ben waka go taki nanga skoro meistri nanga tiriman fu skoro fu a tori fu mekisani èn na a fasi dati den ben man prati furu buku.
6 Wi alamala e prisiri na ini a fruwakti fu libi na ini wan grontapu pe ala sma sa gi Yehovah grani. Na ini a Openbaring Yohanes ben si tumusi moi yeye mekisani e boigi na fesi Yehovah èn e bari taki: „Yu Yehovah, iya wi Gado, warti fu kisi a glori èn a grani èn a krakti, bika yu meki ala sani, èn fu na wani fu yu ede meki den ben de èn ben meki” (Openb. 4:11). Meki a de so taki te wi e du wi diniwroko na ini oktober, wi e meki den wortu fu wi de fu yere na ala sei!