Preiki dati fri o kon gi den strafuman
1 Wan sma di ben studeri Biologie èn di ben leisi na buku Libi — Fa a du kon? Nanga yepi fu evolutie ofu fu di Gado meki sani?, ben taki: „Mi e fruwondru fu na krinfasi nanga na krakti di e kon fu na nyun buku disi. Mi e feni disi na moro moi biologiebuku di mi ben leisi oiti na ini san warderi e bow so krakti gi na libi. A de tapu wan hei wetenschappelijk peil, ma a skrifi toku so dati alasma kan frustan en.” Furu sma ben prakseri net so fu disi, bika ini den fosi 20 mun baka di a buku ben tyari kon na doro, dan moro leki 12.600.000 exemplaar ben musu druk! Fa yu ben feni en di yu ben leisi en?
2 Satan no ben gebroiki wawan furu ogri plan ma ooktu „leri fu ogriyeye” fu breni na yeye fu libisma (1 Tim. 4:1; 2 Kor. 4:4). Wán fu so wan leri na a evolutietheorie èn na Schepping-buku de precies san wi abi fanowdu fu „preiki dati fri o kon” gi den sma di de ini na katibo fu na theorie disi di e sakasaka sma (Luk. 4:18). Ini oktober wi sa pristeri na Schepping-buku so furu leki a kan ini wi diniwroko. Aladi a buku abi bigi waarde, toku wi sa pristeri en soso fu Sf 5,00. Na pikin wan fu na buku disi e kostu Sf 2,50.
TROWE „SANI DI ABI TRANGA SKOTU” NA GRON
3 Na evolutietheorie na wan fu „den sani di abi tranga skotu”, iya, „wan hei di opo poti teige na sabi fu Gado” (2 Kor. 10:4, 5). Ma Yehovah sabi precies san wi abi fanowdu fu miti sortu sma èn a gi wi krakti yeye fetisani sodati wi kan trowe den sortu tak-go-tak-kon disi na gron (1 Tim. 2:4). Baka di a ben leisi na Schepping wan heileriman na wan academie di taki dati a de atheist (wan sma di no e bribi ini Gado), ben piki taki: „Noiti ete mi ben miti so wan bun fasi fa bewijsi gi dati Gado ben meki sani.” Son onderwijzer nanga studenti ben de klari fu teki na Schepping-buku, aladi den ben weigri fu teki tra buku fu wi. Fu san-ede yu no ben sa du muiti fu go na den sortu sma disi ini yu gebied? Tumusi moi bakapisi ben kon fu den sma di ben du disi.
GO NA ALASMA NANGA NA SCHEPPING-BUKU
4 Un preikiman di e go na skoro, un ben pristeri na Schepping-buku na un onderwijzer nanga skoromati? Fu san-ede yu no sa pruberi dati ini oktober? Baka di wan onderwijzer ben teki a buku, a ben taki: „Wi no a fu taki moro fu na evolutie. Mi ben leisi na Schepping-buku èn now ala sani de krin gi mi. Mi feni eindelijk den piki di mi ben suku.”
5 Yu ben pristeri wan exemplaar fu na Schepping-buku na yu bijbelstudie? Aladi den e studeri wan tra buku, toku na Schepping-buku sa yepi den fu tranga den bribi. Wan uma ben skrifi: „No langa psa kaba mi ben go studeri nanga Yehovah Kotoigi. Mi mu taigi yu omeni warderi mi abi gi na buku fu yu Libi — Fa a du kon?” Dan a taki moro fara: „Fa wan sma nanga wan redelijk frustan kan kakafutu gi na sondro fowtu logica fu yu? Yu ben si kans fu meki sma kan frustan na bun hebi èn dipi tori — wan heri prestatie efu unu luku na bun wetenschappelijk ondrosuku di ben de fanowdu gi na buku disi.”
6 Na pristeri fu na Schepping-buku e fiti bun na wi Tori fu takmakandra „Fu san-ede wi musu studeri na bijbel”? Yu ben kan bigin kande na a fasi disi: „Furu sma ben sa wani sabi fa libisma du kon èn san de te fu kaba pe a e go. Yu e denki dati na bijbel e gi wan piki tapu den aksi disi? (Gi okasi fu gi piki) Wi ben kon si dati disi de so, fudi a bijbel de a Wortu fu Gado di skrifi ondro krakti fu santa yeye. Luku pikinso fa disi e tyari kon na fesi ini 2 Timoteus 3:16, 17. (Leisi) Na evolutie-theorie no e gi nowan enkri howpu dorosei fu na disiten libi, aladi a bijbel e poti tego libi na wi fesi. Yu sa feni na pramisi dati ini Yohannes 17:3. (Leisi.)” Pristeri dan na buku èn ferteri dati a sa meki sma si fa libisma ben du kon èn fa a kan libi fu tego.
7 Yehovah gi wi wan wrokosani fu yepi den sma kon fri, di de ini katibo fu theorie nanga falsi leri di e afrontu libisma. Meki wi meki wan bun gebroiki fu na Schepping-buku ini oktober.