Prèise a Gado di meki ala sani
1 Toemoesi moi presi, sondongo di abi moi kloroe, hemel di lai nanga stari te neti, den moi singi di pikin fowroe e froiti — soema joe e taki tangi foe den toemoesi moi sani disi? Ija, sani e poesoe wi ati foe prèise a Gado di meki ala sani. Nanga wi heri ati wi e agri nanga a froeklari na Openbaring 4:11. Bikasi Jehovah Gado meki ala sani, a e froedini wi prèise.
2 Ala di boeweisi de taki Gado meki ala sani, libisma ben horibaka gi na idea taki a kon a kon so taki libi ben kon de noso nanga jepi foe evolutie di de wan kibritori. A lei disi di bigi troetroe, ben lagi a posisi foe libisma èn meki den tjari densrefi na wan lagi fasi. Dati na wan kosi èn iti foe fowtoe tapoe wi Gran Mekiman. — Preik. 12:1; Rom. 1:20, 25.
3 Ini september, leki loyaal dienstknekti foe Jehovah, wi abi na okasi foe pristeri a waarheid foe wi Mekiman èn den toemoesi moi wroko foe en. Wi sa pristeri a boekoe Libi — Fa a doe kon? Nanga jepi foe evolutie noso foe di Gado meki sani? na ala sma di e sori opregti belangstelling foe leri den troe tori di abi foe doe nanga a bigin èn a marki foe libi. A poeblikâsi disi e sreka wi foe taki fri èn sondro frede foe a waarheid foe a bigin foe libi.
4 Spesroetoe kontren: Boiti foe preiki oso foe oso, wi kan doe spesroetoe moeiti foe taki nanga sma di abi spesroetoe belangstelling ini a tori foe evolutie noso a meki di sani meki, e taki nanga den na den wrokopresi noso na skoro. Foe eksempel, jongoe Kotoigi ben abi boen bakapisi ini a poti foe a Meki sani-boekoe te den ben sori disi na den skoromeester. Wan jongoe kotoigi sisa ben gi en skoromeester a Meki sani-boekoe èn ben froewondroe srefisrefi foe si taki a meester no wawan ben stoeka a boekoe dorodoro ma srefi ben bigin gebroiki en leki wan fondamenti foe gi leri na a klas (w90 9/1 blz. 32; w86 10/1 blz. 32 [Bakratongo]). Foe san ede joe no e go na ibriwan foe den skoromeester noso -ifrow èn den skoro mati foe joe, di joe sabi taki den ben sa prisiri foe leisi a toemoesi moi poeblikâsi disi.
5 Spesroetoe moeiti kan doe foe doro studenti foe den moro hei skoro èn sma di e gi leri na skoro, di e libi noso e wroko ini joe kontren. Sma di kisi moro hei skoro, so leki afkati nanga datra, ben warderi a dipi foe a ondrosoekoewroko di ben doe èn den boeweisi di den ben skrifi ini a Meki sani-boekoe (yb87 blz. 54). Den sma di joe e go foe taki nanga den, kande e winsi so srefi foe abi a poeblikâsi disi, di abi toemoesi moi prenki, leki wan boekoe foe go soekoe sani.
6 Na wan konifasi, wi no sa pristeri a Meki sani-boekoe na ibriwan sma di wi e miti bika foeroe sma no abi belangstelling gi a tori disi. Ma te joe e taki foe wan noso moro spesroetoe penti foe a boekoe, di e leri sma wan sani èn e bow bribi ini a Mekiman, joe sa feni opregti-ati sma di o wani leri moro. Na den sma dati wi wani pristeri a Meki sani-boekoe.
7 Meki a de so taki a moi jepisani disi no wawan sa jepi foeroe moro sma foe si o law a leri foe evolutie de, ma jepi den toe foe bow warderi gi a presenti foe libi. A boekoe disi sa wiki ini den a winsi foe libi foe têgo gi a glori foe a Gi-man foe libi èn „a Mekiman foe hemel nanga grontapoe”. — Ps. 146:6.