Jepi trawan foe gi wi Mekiman grani
1 Wi e firi a srefi fasi leki a psalm singiman di a ben taki: „O Jehovah, . . . na joe a fonten foe libi de”? (Ps. 36:5, 9) Fa wi, foe wi sei, kan jepi trawan foe warderi èn gi Jehovah grani leki a Mekiman foe wi? Foe di wi e pristeri a boekoe Leven — Hoe is het ontstaan? Door evolutie of door schepping? (Libi — Fa a doe kon? Nanga jepi foe evolutie noso foe di Gado meki sani?) ini a moen juni. A boekoe disi de troetroe wan aparti boekoe, foe di a e gi krakti boeweisi taki Gado de èn a e sori krinkrin taki evolutie no kan de troe. A e bow froetrow toe ini bijbel leki a Wortoe foe Gado. Seiker wi wani dati alasma sabi fa sani di Gado meki, èn no evolutie, e gi Jehovah Gado grani.
2 Djaso na wan eenvoudig sjatoe pristeri.
Baka te joe taki na ososma odi, dan sori en a prenki tapoe bladzijde 6 èn aksi:
◼ „Fa libi doe bigin tapoe a grontapoe disi? Son sma e taki, dati a ben kon foe ensrefi. Bijbel e gi Gado ala grani. Fa joe e denki? [Gi okasi foe piki.] A boekoe disi e gi piki di de krinkrin ini akroederi nanga bijbel èn den troe tori foe sabidensi. Mi ben sa wani foe libi en gi joe, so taki joe kan loekoe ala den boeweisi baka èn so taki joesrefi kan teki wan bosroiti.”
3 Baka te joe kari joe nen, dan joe ben kan taki:
◼ „Ini a modern sabidensi grontapoe disi, a de praktis foe bribi ini a meki di Gado meki sani, noso joe denki taki wi kon foe wisrefi? [Gi okasi foe piki.] Loekoe fa bijbel e taki-go-taki-kon foe na afersi disi. [Leisi Hebrewsma 3:4.] Joe no ben sa agri taki ala oso abi wan sma di meki den? So boen, a kan taki na universum kon foe ensrefi?” Sori a prenki tapoe bladzijde 114 foe a Meki sani-boekoe, èn baka dati poti en prakseri na tapoe sani di skrifi ini paragraaf 2 tapoe bladzijde 115. Efoe na ososma e sori belangstelling èn a e teki a boekoe, dan taigi en taki a tra leisi te joe o kon, joe sa taki foe na aksi: San o pasa ini a ten di e kon nanga libisma èn nanga grontapoe?
4 Noso baka te joe taki na ososma odi, dan joe ben kan taki:
◼ „San joe denki wi fosi afo ben gersi? [Gi okasi foe piki.] Den ben gersi a ’sma’ disi di ’gersi kesikesi’? [Opo bladzijde 83 foe a Meki sani-boekoe.] Loekoe san bijbel e taki na Tori foe den Apostel 17:26. [Leisi en.] We dan, tapoe san den prenki foe den sma di gersi kesikesi, abi en fondamenti?” Poti prakseri na tapoe den wortoe di skrifi ondro a prenki tapoe bladzijde 89. Taigi na ososma, taki a kan kisi wini foe di a e leisi a boekoe èn a e kon foe sabi san na a piki tapoe na aksi disi.
5 Wan tra fasi foe bigin, ben kan de foe sori go tapoe a kafti foe a „Meki sani”-boekoe èn taki:
◼ „Tide wi e aksi wi birtisma: Libisma kon nanga jepi foe evolutie noso nanga jepi foe a meki di Gado meki sani? Fa joe e denki? [Gi okasi foe piki.] Ala di foeroe sma di teki leri na hei skoro, e teki evolutie leki wan troe tori, tokoe tra sma di teki leri na hei skoro, no e bribi na ini evolutie. Loekoe a bosroiti foe wan fosi astronaut. [Sori tapoe wan toe edepenti tapoe bladzijde 122-123.] Wi moesoe ondrosoekoe persoonlijk a boeweisi foe si san wi moesoe bribi — evolutie noso a meki di Gado meki sani.” Efoe na ososma e teki a boekoe, dan poti wan aksi di joe kan piki a tra leisi te joe e go baka.
6 Joe e angri foe leri tra sma den toemoesi moi waarheid foe wi Mekiman èn a lobi prakseri foe en nanga a mekisani foe en? A Meki sani-boekoe kan jepi joe foe doe dati. A e gi grani na wi Gran Mekiman, a Soeverein Masra Jehovah, foe di a e gi glori na den wroko foe en èn a e meki bekenti en toemoesi moi prakseri foe santa en nen èn foe blesi a libisma famiri, nanga jepi foe a Kownoekondre foe Krestes.