Jehovah na wi Mekiman
1 Miljoenmiljoen sma e bribi taki Gado ben meki libi. Foeroe trawan e bribi na ini evolutie. Dan joe abi den wan di no de seiker san den moesoe bribi. A boekoe Leven—Hoe is het ontstaan? Door evolutie of door schepping? (Libi—Fa a doe kon? Nanga jepi foe evolutie noso foe di Gado meki sani?) na foe ala den sortoe sma disi. A poeblikâsi disi e pristeri a bakapisi foe wan finifini ondrosoekoe di ben doe foe kon sabi fa libi ben kon dja èn san disi wani taki gi wi tamara. Na ini juni wi sa pristeri a moi boekoe disi.
2 Srefi bekèntiwan na ini a sabidensi libimakandra ben erken a toemoesi logis fasi foe a boekoe. Wan sabidensi ondrosoekoeman foe Bakrakondre ben skrifi: „Troetroe a boekoe disi de moro leki san wan sma ben sa froewakti. A logis fasi fa den kapitel nanga den prenki seti, fiti so boen na ini a ten disi na ini a tori foe sabidensi, taki joe moesoe de onreidelek srefisrefi foe kakafoetoe gi den.” Wan afkati ben taki: „Mi leisi en fo leisi kaba èn te nanga now mi e tan firi a finifini fasi fa den ondrosoekoe a tori, a koni, nanga den foeroe boeweisi di den ben soekoe foe meki a boekoe disi.” So boen, wi kan abi a froetrow taki tra sma ete sa warderi a boekoe disi.
3 Joe ben kan froekisi foe tjari wan sjatoe pristeri leki disi:
◼ Opo a boekoe na tapoe bladzijde 6 èn taki: „Foeroe sma e denki taki a moi grontapoe foe wi nanga a libi di de na en tapoe, ben kon foe ensrefi. San joe prakseri taki de wan reidelek froeklari foe a fasi fa ala den sani disi ben doe kon de? [Gi okasi foe piki.] Boen foeroe boeweisi e poti krakti na tapoe san bijbel e froeteri foe wan Mekiman di no abi foeroe makti wawan, ma di so srefi lobi wi tranga. En na a troe Gado, èn en nen na Jehovah.” Leisi Psalm 83:18, èn tjari sjatoe kon na krin fa a de en prakseri foe kenki heri grontapoe, kon tron wan paradijs.
4 Efoe joe wani kon esi-esi tapoe a moro prenspari pisi foe joe pristeri, dan joe ben sa kan taki:
◼ „Oiti joe ben poti prakseri tapoe na aksi disi?” Sori a titel foe a boekoe, opo bladzijde 7, leisi den aksi na ini paragraaf 2, èn tjari kon na krin taki a boekoe e gi satisfaksi piki di komopo foe bijbel.
5 Noso joe ben sa kan proeberi disi:
◼ „Oiti joe ben poti prakseri na tapoe a fasi fa grontapoe ben kon de? Foeroe sma e taki nomonomo dati a de a bakapisi foe wan boen bigi explosie na ini kosmos. San joe denki? [Gi okasi foe piki.] Bijbel e leri taki Gado ben meki grontapoe leki wi têgo tanpe. A e difrenti foe den tra planeet na ini wi zonnestelsel. So fara leki wi sabi, dan grontapoe na a wan-enkri planeet na ini universum di abi ala den frekti sani di de fanowdoe foe hori sani na libi.” Go na paragraaf 5 na tapoe bladzijde 130, èn tjari kon na krin foe san ede grontapoe moesoe de a wroko foe wan Meester Mekiman.
6 Wan tra fasi foe bigin ben sa kan de wan sani leki disi:
◼ „Son sma e denki taki wi kenki komopo na kesikesi-libisma. Den e taki dati wi afo ben gersi disi. [Sori a prenki na tapoe bladzijde 89.] Fa joe feni disi?” Gi okasi foe piki. Tjari kon na krin san skrifi na ini paragraaf 20, èn dan leisi Tori foe den Apostel 4:24, di e meki sma kon sabi Jehovah leki wi Mekiman nanga a Sma di gi wi libi. „A boekoe disi e ondrosoekoe a heri leri foe na evolutie na ini a tori foe san skrifi na ini bijbel.” Sori go na a lijst na tapoe bladzijde 5 pe skrifi san de na ini a boekoe, èn sori tapoe wan toe titel, soleki den wan foe kapitel 1, 7, 15, nanga 19.
7 A boekoe disi kan de wan blesi gi serjoesoe sma di den wan di no abi bribi na ini Jehovah noso en Wortoe, ben bidrigi. Den soifri bodoi di de na ini a Schepping-boekoe (Meki sani-boekoe), kan jepi den wan disi foe kisi moro warderi gi wi Mekiman, di e sorgoe gi wi na wan lobi fasi.