Pristeri a boen njoensoe nanga wan positief fasi
1 Wi alamala lobi foe feni prisiri èn foe doro wan marki ini san wi e doe, spesroetoe na ini a wroko foe meki disipel. San e tjari so wan satisfaksi kon gi wi? A e bigin nanga a hori di wi moesoe hori wan positief fasi na froestan sei, ala di wi e tan abi foeroe foe doe na ini a warti wroko foe jepi tra sma (Odo 11:25). A fasi fa wi e pristeri a boen njoensoe moesoe sori taki wi e bribi troetroe san wi e taki. Efoe wi taki komoto na wi ati, dan na opregtifasi nanga overtoigi foe wi sa skèin kon doro (Luk. 6:45). Te wi e oefen a pristeri foe wi, dan wi sa abi moro froetrow te wi e taki nanga den sma ini a gebied. Disi sa de foe spesroetoe waarde na ini september, te wi e pristeri a boekoe Joe kan libi foe têgo na ini wan paradijs na grontapoe. Kande joe e feni den rai di e kon now wan jepi foe pristeri a boen njoensoe nanga wan positief fasi.
2 Te joe e pristeri a „Libi foe têgo”-boekoe, dan joe ben kan taki disi na a fosi leisi di joe go na wan sma:
◼ „Di wi taki nanga den birtisma foe wi, wi kon si taki wan toe poti a froetrow foe den na tapoe Gado. Trawan e feni en wan moeilek sani foe bribi na ini en. Fa joe e prakseri foe disi? [Gi okasi foe piki.] Loekoe fa bijbel e denki foe na afersi disi. [Leisi Psalm 100:3.] Gebroiki paragraaf 6 tapoe bladzijde 71 foe a Libi foe têgo-boekoe foe sori fa a bigi universum foe wi nanga a skin foe wi e sori taki wi abi wan Mekiman. Efoe a sma sa agri foe leisi a boekoe, pristeri en a boekoe so taki a abi en.
3 Te joe e go baka foe loekoe den wan di joe ben taki nanga den foe a de di Gado de a Mekiman, dan joe ben sa kan wani taki disi:
◼ „Na a fosi leisi di mi ben kon na joe, wi ben taki foe a boeweisi taki Gado de, namkoe, den toemoesi moi sani di a meki. Joe e feni en wan moeilek sani foe bribi taki a Sma di ben meki na universum ben sa abi belangstelling toe gi a tamara foe wi? [Gi okasi foe piki.] A de wan moi sani foe sabi taki a Mekiman bepaal a tamara kaba.” Leisi Jesaja 46:9, 10. Efoe a sma abi belangstelling, gebroiki den prenki foe kapitel 1 foe a Libi foe têgo-boekoe foe poti prakseri tapoe den moi situwâsi di Gado pramisi. Leisi paragraaf 12 foe kapitel 1, èn pristeri en wan bijbelstudie. Efoe a sma wani dati, dan bigin a studie na ini a Sabi-boekoe.
4 Joe ben sa kan proeberi a pristeri disi te joe e pristeri a „Libi foe têgo”-boekoe:
◼ „Di wi taki nanga den sma na ini a birti disi, mi si taki moro foeroe foe den e angri foe wan libimakandra pe kefar no de èn foe wan grontapoe pe vrede de. San joe e denki foe san ede libisma no man kisi den sortoe situwâsi disi? [Gi okasi foe piki.] Son politiek fesiman de opregti kande èn e doe wan toe boen sani, ma loekoe sortoe rai bijbel e gi na wan koni fasi.” Leisi Psalm 146:3, 4; baka dati, aksi en: „Wan sma de di kan gi den sani di libisma abi fanowdoe?” Leisi vers 5 nanga 6. Sori den prenki tapoe bladzijde 176 nanga 177 foe a Libi foe têgo-boekoe, èn poti prakseri tapoe den winimarki foe a tiri foe Gado. Pristeri a boekoe.
5 Efoe joe ben taki foe a tirimakti foe Gado na a fosi leisi, dan joe ben kan proeberi a rai disi na a gobaka:
◼ „Di mi ben de djaso wan toe dei pasa, wi ben taki foe a man di libisma no man tjari troe vrede kon na grontapoe. Kande joe e memre taki wi ben kon sabi a reide di bijbel e gi foe san ede libisma no man doe dati. [Leisi Psalm 146:3 baka.] Joe si foe san ede Gado e gi wi a rai foe no poti wi howpoe tapoe libisma? [Gi okasi foe piki.] Kande joe e agri taki iniwan howpoe tapoe wan loesoe di e tan, moesoe kon foe Gado. Psalm 146:10 e tjari a reide kon na krin foe san ede wi kan abi a froetrow disi. [Leisi.] Efoe wi wani de wan borgoe foe Gado en Kownoekondre, dan san wi moesoe doe?” Go na bladzijde 15 foe a Libi foe têgo-boekoe, leisi paragraaf 19, èn poti prakseri tapoe Johanes 17:3. Aksi na ososma foe sori en fa miljoenmiljoen sma kisi a sabi di e tjari sma go na têgo libi nanga jepi foe wan studie foe bijbel. Efoe na ososma gi joe pasi foe doe dati, dan sori en a Sabi-boekoe èn bigin nanga a studie.
6 Te joe e wroko wenkri foe wenkri, dan joe ben sa kan gebroiki a sjatoe fasi disi foe bigin nanga a „Libi foe têgo”-boekoe:
◼ „Tide wi e gi den bisnis-sma foe a libimakandra wan spesroetoe jepi. Wi alamala e broko wi ede nanga a takroedoe nanga ogri di e doe nanga tranga èn di e kon moro takroe na ini a kontren foe wi. Joe denki taki wan sma abi wan troetroe loesoe gi a problema? [Gi okasi foe piki.] Gado abi wan loesoe.” Go na bladzijde 13 foe a Libi foe têgo-boekoe; leisi èn gi komentaar tapoe Psalm 37:9-11 na ini paragraaf 13. Sori a titel foe kapitel 11, èn pristeri a boekoe.
7 Te joe e go baka na wan bisnis-sma di joe ben libi a „Libi foe têgo”-boekoe na baka, joe ben sa kan taki disi:
◼ „Na a fosi leisi di mi ben kon na joe, mi ben taki dati Gado na a wan-enkri sma di troetroe abi a loesoe di e tan, gi takroedoe nanga ogri di e doe nanga tranga. Soleki fa en e pramisi, dan wi kan abi a froetrow taki wan grontapoe pe vrede de sa kon troetroe. Loekoe a sei di poti na fesi foe ibriwan foe wi foe teki.” Leisi paragraaf 15 tapoe bladzijde 255 foe a Libi foe têgo-boekoe, so srefi Psalm 37:29, 34. Gi komentaar tapoe a prenki foe bladzijde 254. Pristeri en wan bijbelstudie di a no abi foe pai foe en, èn di joe kan hori na a bisnis presi foe den noso na a oso foe den.
8 Leki „kompe wrokoman foe Gado” wi abi ala reide foe de positief te wi e pristeri a boen njoensoe (1 Kor. 3:9). Te wi tan abi a fasi disi, dan a sa abi leki bakapisi taki Jehovah o blesi wi foeroe.