Doro sma ati nanga yepi fu beibristudi di abi bun bakapisi
1 Yeises ben e prisi fu e du na wani fu en Tata èn a ben feni en wan prisiri sani fu yepi trawan fu dini Yehovah tu (Ps. 40:8; Mat. 9:37, 38; 11:28-30). Yeises no ben de tevrede soso fu e meki a boskopu bekenti. Efu nanga bun bakapisi wi wani gi trawan deki-ati fu kon nanga wi na ini a evangeliewroko, dan wi musu doro na ati fu den beibristudi fu wi. Disi abi moro na ini leki fu hori nomo wan aksi nanga piki takimakandra fu wan publikâsi. Efu wi wani doro na ati, dan wi musu sreka wi srefi nanga a sma di wi e gi leri na prakseri.
2 Yeises ben abi persoonlijk belangstelling gi trawan. A ben poti prakseri tapu na fasi fa den ben si sani. A ben kobroiki agersitori fu meki tori di ben muilek kon moro makriki fu frustan (Mat. kap. 5-7). Fu di Yeises ben kon si gi sortu problema den ben sa musu kakafutu, meki a ben gi rai di ben fiti (Mark. 9:33-37). Te den arkiman fu en no ben man frustan wantewante san ben de a penti di a ben wani leri den, dan nanga pasensi a ben agersi san a ben abi fu taki (Mat. 16:5-12). Na dipi èn tranga belangstelling di Yeises ben abi gi trawan musu buweigi wi alamala fu aksi unu srefi: ’Efu mi ben de a sma di ben e kisi leri, san mi ben sa musu sabi fu ben kan frustan san a sma ben leri mi èn fu meki dati ben kan buweigi mi?’ — Luku na Yearbook 1971, blz. 246-247.
POTI NA PRAKSERI TAPU A BEIBRI
3 Di den ben aksi wantu sma san ben meki den du wan sani so gaw tapu a preiki di den ben preiki gi den, wan trow paar ben piki: „A ben skrifi na ini a beibri”. Iya, a Wortu fu Gado e doro sma ati (Hebr. 4:12). Poti furutron na prakseri tapu a beibri fu di yu e meki furu kobroiki fu den tekst na ini den paragraaf. Yepi a sma di yu e gi leri fu kon frustan fu san-ede wan spesrutu fasi fu handri de wan koni sani ofu don sani. Taki-go-taki-kon nanga en fa a gi yesi na den wèti fu Gado sa tyari wini gi en. — Luku Na Waktitoren fu 1 november 1984, blz. 16-17.
4 Furu preikiman kon si taki a kobroiki fu a Taki-go-taki-kon-buku (bakratongo) abi furu bun bakapisi fu poti a prakseri tapu a beibri. So a kan de fu eksenpre taki te unu e taki makandra fu blz. 124 par. 13 fu a Têgo libi-buku taki wan ososma kan aksi fu san-ede den kerki fesiman fu en e taki taki den pikin e dede fu di Gado wani den na en na ini hemel. Te yu luku na pisitori tapu blz. 90 nanga 91 fu a Taki-go-taki-kon-buku (Bakratongo) na ondro na edeprakseri „Fu san-ede beibi e dede?”, dan drape a e poti krakti a tapu taki Yehovah abi belangstelling fu kibri na osofamiri seti. Den bodoi kan overtoigi a sma fu a lobi di Yehovah abi gi a libismafamiri.
POTI AKSI
5 A kobroiki fu aksi nanga wan bun bakapisi ben yepi Yeises fu poti den sma fu go denki pikinso èn fu meki den redeneer (Mat. 17:24-27). Den piki fu a sma di yu e gi leri kan yepi wi kande fu kon sabi san a e leri èn na sortu fasi fu si sani, di no e kruderi nanga a beibri, a e hori ete. Kande a sma di yu e gi leri e smoko ete èn e feti nanga a gwenti dati. Yu taki nanga en fu a pisitori na ini kap. 27 fu na Têgo libi-buku nanga den bodoi na tapu bladzijde 13-16 na ini a Ontwaakt! fu 8 yuli 1989. A e si taki a de fanowdu fu stóp nanga dati. Ma a abi trutru na overtoigi taki a musu broko nanga a gwenti fu smoko? Yu ben sa kan taki: „Fa yu e denki fu en? Kon unu taki taki now yu ben sa stop wantewante nanga en, ma taki wantu fu den mati fu yu ben sa spotu yu. San yu ben sa du dan?
6 Dyaso a fiti fu gi wan warskow. Sontron den piki tapu den sortu aksi disi kan meki yu fruwondru ofu firi brokosaka. San yu sa du dan? Efu a de wan tori di e trubu a sma firi, dan kande a moro bun fu no dwengi na afersi, ma fu taki: „Meki wi go now moro fara nanga a studi. Wi kan kon wan tra leisi baka tapu a pisi tori disi.” Ofu: „We dati na wan sani fu san yu musu go prakseri pikinso, a no so?” (Yoh. 16:12) Now di yu sabi fa na sma di yu e gi leri e prakseri trutru fu na afersi, meki yu kan tyari bodoi kon na makandra di kande sa yepi en fu go moro na fesi. Wi musu du fayafaya muiti fu buweigi wan sma ati èn begi efu Yehovah wani yepi en fu gro na yeyefasi. — 1 Kor. 3:5-9.
7 Efu yu e hori wan beibristudi, prakseri dan alaten fu teki nofo ten fu taki-go-taki-kon nanga a stukaman fu a pisitori di unu abi fu taki. Fiti yu fasi fu gi leri na den fanowdu fu en. Du ala san yu kan fu bow na ini en ati wan tranga lobi nanga dipi respeki gi Yehovah, na beibri èn Yehovah organisâsi. Meki a de so taki wi e du wi pisi fu yepi trawan fu tron disipri fu Krestes fu di wi e du muiti fu hori beibristudi di abi bun bakapisi. — Tori. 2:41-46.