Pristeri a boen njoensoe — Nanga a koni foe man foe si sani
1 Wan odo di skrifi nanga jepi foe Gado santa jeje e taki: „En di e kibri a man di a man foe si sani sa feni boen” (Odo 19:8). Na koni foe den wortoe disi sori foeroe tron foe de troe ini wi preikiwroko. Na so fasi foeroe preikiman, foe di den meki gebroiki foe a man di den man foe si sani èn foe takt, ben graboe na okasi pe sma ben e proeberi foe gens wan takimakandra, foe gi kotoigi moro fara. Ofoe awansi fa a no fa, tokoe den poti wan gron foe gi kotoigi bakaten. Fa sma kan doe disi?
TE WAN SMA E PROEBERI FOE GENS WAN TAKIMAKANDRA
2 Foeroe tron wi e miti sma di e taki: „Mi abi en druk”. Na ososma abi en druk troetroe, noso a e taki disi soso foe a no kon moksi ensrefi ini wan langa takimakandra? Foe disi wi abi na koni fanowdoe foe man foe si sani. Efoe a sori taki a no abi en druk troetroe, dan wi kan proeberi foe fanga a genstaki disi foe di wi e taki: „Dan mi sa meki en sjatoe”. Baka dati wi kan taki sjatoe san wi ben wani foe taki, nanga san wi e hori wi na wi pramisi foe meki a takimakandra foe wi de sjatoe. Te wi e sori taki wi e hori a sma na prakseri èn wi e wiki na belangstelling nanga den sani di wi e taki, dan a kan de srefi taki a sma e taki dati a wani taki moro fara foe a tori disi na a srefi ten dati.
3 Meki wi taki dati a sma di joe e miti na a doro abi en troetroe druk. Ala di wi no wani meki sma seni wi gowe makriki, dan tokoe wi kan libi den na baka nanga wan takroe kroetoe efoe wi e hori fasti nomo ofoe e poesoe wisrefi nomo. Efoe wan ososma e kon na a doro nanga wrokosani foe bori na ini en anoe èn wi e smeri taki njanjan de na faja, dan a kan de troetroe so taki a abi en druk. A koni foe man foe si sani nanga wan boen kroetoe de so boen fanowdoe. A no ben sa kotoigi taki joe e hori a sma na prakseri efoe tapoe a pisiten dati joe e tan poesoe nomo. A ben sa de moro betre srefisrefi foe gi na ososma wan traktaat èn aksi foe kon baka na wan tra ten. Disi sa libi wan moro boen prakseri na baka, èn a tra leisi te wan Kotoigi e kon na a doro, dan kande wan moi kotoigi kan gi.
DOE WAN SANI TAPOE A FASI FA A SMA DE
4 Sontron wi e miti sma di de sjatoe te wi e kon na den doro ini a ten foe wi oso-foe-oso diniwroko. San wi moesoe doe ini so wan kefal? Odo 17:27 e gi na rai: „Wan man nanga a koni foe man foe si sani abi wan tiri jeje.” Fa dati de wan boen rai! Wan safri sten di e sori taki joe e broko-ede, foeroe tron kan meki so wan sma kon kowroe. Boiti dati, efoe wi kan kisi en so fara nanga takt, meki a taki foe wan sani di e dangra en, dan kande en fasi foe doe sa de moro mendri foe djompo taki gi ensrefi. Srefi awasi a ben sa koti a takimakandra, dan tokoe soleki fa a e sori, a safri piki foe wi kande sa libi en na baka nanga wan moro betre inisei firi ini a tori foe a wroko foe Jehovah Kotoigi. Dati ben sa de wan toemoesi moi bakapisi. Te wan ososma e njan en niri èn en ati e bron dan a no de foe taki, dati a de moro boen foe gowe safri èn kande proeberi foe gi en kotoigi na wan tra ten.
5 Dan joe abi sma di e strei nanga wi ma di kande tokoe de opregti. Ini den sortoe kefal disi a kan de wan heri tesi tapoe wi pasensi foe kan go doro nanga na takimakandra nanga en. Ma efoe wi abi a koni foe man foe si sani, dan a no nomonomo wi sa taki dati wan ososma no abi belangstelling soso foe na krakti fasi fa a ben tjari en fasi foe si sani kon na fesi. Kande wi ben sa kan poti taktvol aksi foe kan kon sabi foe san-ede a e denki so èn foe meki a si moro fara san a bijbel e taki foe a tori disi (Odo 20:5). A e anga foe a fasi fa a e piki meki wi sa teki a bosroiti efoe a boen foe go doro nanga a takimakandra.
6 Wan preikiman di abi a koni foe man foe si sani, sabi taki ten nanga situwâsi foeroe tron kan tjari wan kenki kon ini na fasi foe a ososma ini a tori foe a Kownoekondreboskopoe. Na tra leisi te wi kon na en doro a kan piki heri tra fasi. Wi moesoe loekoe boen taki wi no e froewakti wan negatief piki a fesi kaba foe na fasi ede fa a ososma ben piki na lasti tron di wi ben kon na en doro.
7 A no de makriki foe teki a bosroiti efoe wi sa go doro nanga wan takimakandra. Tokoe, te wi e kweki a koni foe gi leri, wi sa kon abi moro boen bakapisi ini a pristeri foe a boen njoensoe nanga a koni foe man foe si sani, ala di wi e loekoe go na Jehovah foe blesi wi moeiti.—1 Kor. 3:6; Tit. 1:9.