Fa fu du wi diniwroko moro bun​—San wi kan taki efu wan sma e pruberi fu tapu a takimakandra?

Fu san ede a prenspari: Kon meki wi taki dati yu sabi taki wan bigi rampu o kon wantronso. Sma o dede efu den no go suku kibri. Yu e go na wan birtisma fu warskow en, ma a e koti yu mofo èn a e taki dati a abi furu fu du. A no de fu taki dati yu no ben o gowe wantewante, ma yu ben o pruberi fu yepi en! Furu sma na ini a kontren fu wi, e suku fu tapu a takimakandra te wi wani taki nanga den. Den no sabi taki a boskopu fu wi kan yepi den fu tan na libi. Kande den abi furu sani fu du te wi e kon na den (Mat. 24:37-39). Noso kande den no abi wan yoisti denki fu wi, fu di den e arki san tra sma e taki (Mat. 11:18, 19). Kande den e prakseri taki wi de a srefi leki den tra kerki di e du ogri sani (2 Petr. 2:1, 2). Efu na ososma no wani arki na a bigin, wi no musu de gaw fu gi abra.