„Tjariman foe leti”-distriktkongres foe Jehovah Kotoigi 1992
1 Langa ten kaba Kongres ben de wan prenspari pisi ini a libi foe den anbegiman foe Jehovah. Den fosi Israèlsma ben e konmakandra na spesroetoe okasi ini a jari nanga hondrohondro èn doesoendoesoen sma na difrenti fesa ofoe „santa konmakandra” (Lev. 23:1-36). Den span konmakandra disi ben gi okasi foe dini Jehovah Gado, foe de makandra nanga bigi ipi sma foe en pipel, èn foe kisi leri foe en. Den kongres ini a ten disi e gi den srefi okasi disi èn miljoenmiljoen sma foe Gado pipel e njan boen foe den. Sondro degedege, foeroe foe oenoe ben abi prati ini den blesi di 3416 sma ben kisi di den ben fisiti na „Sma di Lobi Fri” Distriktkongres foe a jari di pasa. Sonwan foe oenoe ben prisiri toe foe ben de na mindri den 61 sma di ben teki dopoe. Now na a ten foe bigin sreka foe fisiti wan tra span dri dei konmakandra — na „Tjariman foe Leti” Distrikt Kongres foe 1992. Joe nanga joe osofamiri sa de drape?—Deut. 31:12.
2 Na programa bigin sreka akroederi den fanowdoe foe Gado pipel, di e panja na waarheid leki tjariman foe leti na a heri grontapoe. Wi abi deki-ati nanga joisti boeweigi foe wi ati fanowdoe ini den ogri dei disi foe a kaba foe a seti foe sani disi, èn wi sa kisi disi te wi o de drape foe kisi den moi jeje blesi pasa marki di sreka gi wi. De seiker taki joe meki ala joe kongres seti boen èn ondro begi, so taki joe kan de drape foe njanboen foe ala den dri dei foe a toemoesi moi jeje programa foe bigin nanga a fosi singi te doro na lasti begi. Teki na wan lobi fasi ini den plan foe joe den wan di abi jepi fanowdoe, spesroetoe den wan di sori belangstelling njoen, so taki den toe kan fisiti ibri konmakandra (Gal. 6:10). A programma e bigin Freida 10.20 joeroe mamanten èn e kaba 5.00 joeroe bakadina. Den konmakandra foe satra e bigin 9.30 joeroe mamanten èn e tapoe nanga singi èn begi 5.00 joeroe bakadina. Sonde a programa e bigin 9.30 joeroe mamanten èn e kaba wan sani foe 4.30 joeroe bakadina. Den bodoi di e kon now sa de wan jepi gi joe nanga den sreka foe joe.
3 Spesroetoe fanowdoe: A seti disi de soso gi preikiman di de boen eksempel, so srefi gi den pikin foe den di abi boen maniri, di na Dienstkomte foe a gemeente ben feni boen èn di no man seti wan tanpresi gi densrefi. Na gemeente pe den e go sa orga sani foe sorgoe gi den sma nanga spesroetoe fanowdoe. Owroeman nanga trawan di abi sabi foe den persoonlijk situwâsi disi kan gi jepi na wan lobi fasi. Disi foeroe tron e aksi taki preikiman moesoe prakseri foe den nowtoe foe den di de ini a foeroeten diniwroko, den owroe sma, den malengriwan, den dofoewan nanga kande trawan toe. Preikiman kan pristeri jepi na den wan disi foe di den e tjari den noso e sorgoe gi den fanowdoe foe den na tra fasi.—Jak. 2:15-17; 1 Joh. 3:17, 18.
4 A no de foe taki, dati na Afdeling Tanpresi, sa proeberi foe sorgoe gi boen tanpresi gi preikiman nanga spesroetoe fanowdoe efoe den sma foe a gemeente no man foe jepi den. Den preikiman disi man taki foe den situwâsi nanga a sekretarsi foe a gemeente. Na sekretarsi moesoe go loekoe makandra nanga a Dienstkomte foe na gemeente san de fanowdoe, so taki den kan go wroko makandra nanga den sma disi foe den dati srefi kan sorgoe foe wan boen tanpresi. Efoe na gemeente no man foe gi na jepi di de fanowdoe, dan na sekretarsi sa gi den sortoe sma disi wan aanvraagformulier foe Spesroetoe Fanowdoe Tanpresi. Soso den sma nanga spesroetoe fanowdoe moesoe vul a formulier disi in. A moesoe gi baka na a sekretarsi èn tjèk efoe a vul in dorodoro, soifri, èn tjèk efoe den situwâsi e meki taki den moesoe kisi tanpresi. Ala den sani disi moesoe doe wan moi pisi ten fosi na kongres. Na sekretarsi sa taki FINIFINI foe den situwâsi tapoe a formulier ini a presi di ben gi foe dati. Ala den sani disi moesoe pasa langa nofo fosi a kongres. Na sekretarsi sa seni dan na formulier go na a Afdeling Tanpresi. Na sma di ben seni na aanvraag disi sa kisi ensrefi foe jere pe na tanpresi foe en sa de.
5 Den sma nanga spesroetoe fanowdoe NO moesoe go na a kongres èn aksi foe wan kamra te den doro drape foe di na Afdeling Tanpresi moesoe abi den papira foe den nanga den bodoi fosi, foe na Dienstkomte foe na gemeente.
6 Den e sorgoe foe kamra ini sma oso, spesroetoe gi den wan di ben sa ondrofeni troetroe problema efoe den sortoe presi disi no ben de foe kisi. Den presi disi no de gi sma di man foe pai wan kamra ini wan hotel ma di wani fri kamra noso kamra di no diri, soso foe kan kibri den moni. So srefi toe, a no fiti foe meki wan fowtoe gebroiki foe a teki di wi brada e teki wi ini den oso foe di wi e froewakti taki wi sa man tan wan toe dei moro na den. Den kamra disi de SOSO gi den kongres dei. Den sma di e kisi den sortoe tanpresi disi sa loekoe boen taki den nanga den pikin foe den e behandel na oso foe a sma pe den e tan na wan repseki fasi èn no e pori noti, no go troeboetroeboe ini a sma sani, noso go na presi ini na oso pe a sma wawan mag foe go. Efoe wan ososma ondrofeni wan foe den sani disi di kari djaso, dan wantron disi moesoe taigi na a brada di e sorgoe foe gi tanpresi na a kongres, èn a sa breiti foe kan gi jepi.
7 Njanjandienst: Neleki a jari a fesi na so den ben meki wan eenvoudig seti gi 1992 gi a njanjandienst. Disi e lekti a wroko srefisrefi èn a e meki en mogelijk foe poti moro prekseri na den jeje pisi foe a kongres, so taki den friwani wrokoman kan njanboen moro foe a programa (Ex. 12:16b; Deut. 31:12; ad blz. 370 (Bakratongo); teki gersi Lukas 10:38-42). Den njanjan sani di sa de sa sari foe mamanten nanga bakadina. (Teki gersi Mateus 14:14-20.) Ibri sma de fri foe sorgoe gi en eigi bakadina njanjan, ala di wan toe njanjan sani sa de foe kisi tapoe a kongres.
8 A Genootschap abi spesroetoe warderi foe a toemoesi boen jepi di oenoe, leki brada nanga sisa ben gi na den seti foe njanjandienst tapoe den distriktkongres ini den jari di pasa. Disi ben meki a de mogelijk foe joeroe boen presi èn foe kan pai den kongres paiman. A ben gi oneoe so srefi na okasi foe tan na a bakadina pause tapoe a kongres presi èn de biten en nanga boen firi baka gi na moro prenspari jeje programa.
[Faki na tapoe bladzijde 4]
DISTRIKTKONGRES 1992
Sranantongo: 7-9 augustus Gakaba Boven Marowina liba
Bakratongo: 21-23 augustus 2e Rijweg Paramaribo
Sranantongo: 28-30 augustus 2e Rijweg Paramaribo
Ingrisitongo: 4-6 september 2e Rijweg Paramaribo