„Frede gi Gado”-distriktkongres foe Jehovah Kotoigi 1994
1 Foe foeroe foe den 3811 fisitiman foe a 1993 „Leri foe Gado”-distriktkongres ini Sranan, wi ben kisi foe jere dipi firi foe warderi gi a programa di gi kowroe-ati na jeje fasi. Njoenwan di ben teki dopoe leki wan bakapisi foe di den ben poti prakseri tapoe a leri foe Gado di de foe feni ini bijbel, ben doro 75. A prisiri di wi ben prisiri a jari di pasa foe sowan programa di e bow sma, moesoe boeweigi wi troetroe foe doe ala moeiti foe fisiti a programa di e gi deki-ati, di sreka gi a 1994 „Frede gi Gado”-distriktkongres di e kon. Nanga someni problema di libisma abi foe doe nanga den ini a ten disi, seiker wi alamala sa kari wi bijbelstudie èn sa proeberi foe sreka sani foe wi bijbelstudie de drape nanga wi. A sa sori foe de wan troe fonten foe deki-ati nanga krakti te wi e tan dini Jehovah nanga frede gi Gado awinsi sortoe problema wi sa kisi ini a ten di e kon.
2 De seiker foe sreka sani gi joe kongres finifini èn nanga begi, foe meki joe kan de drape foe prisiri ala den dri dei foe a switi jeje programa, di e bigin nanga a fosi singi te doro a lasti begi. Poti na wan lobifasi den wan di abi jepi fanowdoe na prakseri, spesroetoe den njoenwan di abi belangstelling, sotaki den toe kan de tapoe a heri programa. A sa de wan bigi jepi foe loekoe a bodoi ini na inlegvel disi makandra nanga den bijbelstudenti di abi na prakseri foe kon fisiti a kongres (Gal. 6:10). A programa e bigin nanga pokoe 10.20 mamanten tapoe freida èn e tapoe nanga singi nanga begi wan sani foe 5.00 bakadina. Tapoe satra a programa e bigin 9.30 mamanten èn e tapoe nanga singi nanga begi wan sani foe 5.00 bakadina. A sondemamanten programa e bigin 9.30 mamanten èn a programa foe a dei e tapoe wan sani foe 4.15 bakadina. A bodoi di e kon now sa jepi joe foe sreka sani na fesi.
3 De drape froekoe: Jehovah Kotoigi de bekènti foe den getrow fasi èn a doe foe sani biten (Luk. 16:10). Disi de prenspari te wi e fisiti wan kongres. Ala dei wi moesoe de froekoe drape èn sidon na wi presi bifo a programa e bigin. Disi e aksi taki nofo ten e poeroe foe sorgoe gi sani di wi moesoe poti prakseri na den tapoe, so leki a parkeer foe wi oto, a feni foe sidonpresi di fiti gi wi osofamiri èn a kisi foe kongresbon foe njanjan.
4 Kongres ten e gi wi wan toemoesi boen okasi foe njanboen foe prisiri demakandra. Ma a fisiti foe mati te lati na neti kan tapoe pasi gi a moeiti foe wi, foe de biten a tra dei. Bigin lati èn hâsti wisrefi mamanten froekoe kan abi leki bakapisi foeroe broko-ede nanga wan firi foe broeja. Foe disi no pasa, son osofamiri e feni en wan boen sani foe poti wan reidelek joeroe foe go rostoe. Foe di den e hori densrefi finifini na wan schema, a de moro seiker taki den abi wan boen neti rostoe èn taki den de klari foe bigin froekoe a tra dei. Nanga dati a no de fanowdoe foe kon na inisei ala di a programa e hori, san e poeroe sma prakseri èn kan de froeferi gi den sma di e sidon kaba na den presi. A hori di wi e hori trawan na prakseri na ini a tori disi, kan de wan sori foe a grani di wi e gi Jehovah nanga a respeki di wi abi gi En èn a de wan boeweisi foe a troetroe frede gi Gado.
5 Wan dri dei kongres. A „Frede gi Gado”-distriktkongres sa hori dri dei. Na ibri konmakandra den sa pristeri bodoi di piki nanga foeroe sorgoe èn di de prenspari troetroe gi wi jeje gosontoe. Difrenti tori di abi foe doe nanga a frede gi Gado sa tjari kon na krin ini lezing, demonstrâsi nanga wan disiten drama.
6 Abi a fasti bosroiti foe no misi no wan pisi foe a programa. Disi e aksi kande taki joe moesoe skoifi wan toe eigi sani na wan sei èn kenki sani ini joe schema. Son sma e feni en fanowdoe foe seti spesroetoe sani nanga den wrokobasi foe den. Foeroe sma e òfer srefi wini na monisei foe kan de na tapoe a heri programa. Jehovah seiker sa blesi den sma di e meki na afersi tron wan tori foe opregti begi èn di e meki opregti moeiti foe de drape. — Luk. 13:24.
7 Arki boen: Te a kongresprograma e hori, no meki sani di de foe si noso foe jere, ma di no abi foe doe nanga a materiaal di den e taki komoto na a podium, poeroe joe prakseri. Fa wi de Jehovah grantangi di gi wi a koni foe poti wi froestan „boen” tapoe prakseri di wi e froekisi. A frede di wi e sori gi Gado moesoe boeweigi wi foe teki a bosroiti di e kroederi nanga san Jehovah e aksi wi foe doe ini Jesaja 55:2: „Arki boen na mi.”
8 Ala di a de troe taki den bariwroko, taki a lezing foe sonde bakadina de gi ala sma, tokoe moro foeroe foe a materiaal di den e pristeri na tapoe a kongres disi sreka spesroetoe gi den wan di abi frede gi Jehovah kaba. A kongres sa froeteri wi foe den disi-ten fanowdoe sani èn sa jepi wi foe waka skinskin nanga Jehovah organisâsi. Te wi no e arki boen, dan a sa abi leki bakapisi taki wi sa tan na baka. Wi moesoe arki a programa nanga ala wi prakseri foe te foe kaba wi kan feni wini foe a foeroe jeje njanjan someni leki a kan. — 1 Petr. 2:2.
9 Ala den jari di pasa, foeroe sma di fisiti den kongres, kweki a boen gwenti foe meki notisi te a programa e hori. Te wi e fisiti wan kongres, dan joisti sani foe meki notisi, bijbel nanga singi boekoe, moesoe de na mindri den sani di joe abi leki gwenti foe tjari nanga joe. Wan toe sma kande e loekoe a meki foe notisi nanga wan firi foe degedege, foe di den e prakseri taki a no e tjari troetroe wini. Efoe na so joe e prakseri toe, foe san ede joe no ben sa proeberi dan foe meki notisi na a ten foe a „Frede gi Gado”-distriktkongres? Netleki foeroe trawan joe sa kon si kande taki a de wan boen fasi foe joe prakseri no poeroe foe san den e taki èn taki a e kibri joe foe no sidon dren nanga opo ai, noso foe meki joe prakseri tra sani.
10 A no de fanowdoe foe skrifi foeroe sani noso foe skrifi den finifini. Leki fa a gwenti de, dan wan noso toe prakserilin sari gi wan edepenti. Owroeman e feni taki a abi wini te den abi notisi di orga moi, foe den kan hori wan boen overzicht, foe a kongres programa tapoe a diniwroko-konmakandra. Srefi baka dati den kan teki foeroe foe den penti di ben kon na fesi tapoe a kongres, leki fanowdoe sani ini a gi leri foe den èn ini den skapoeman-wroko.
11 Wi alamala moesoe poti prakseri tapoe a fasi fa wi e arki, foe di a wani taki kolokoe nanga troetroe libi gi wi. Ala di wi de na tapoe a „Frede gi Gado”-distriktkongres, wi moesoe hori a froemane foe Jehovah ini Odo 8:33-35 na prakseri: „Gi jesi na tranga leri èn kon koni èn no sori kwetikweti taki joe no abi bisi. Kolokoe a sma de di e gi jesi na mi foe di dei na dei a e hori wakti na mi doro, foe di a e hori wakti na den postoe foe mi mofodoro. Bikasi soema e feni mi, seiker sa feni a libi èn e kisi boen wani foe Jehovah.”
12 Singi nanga begi: Wan foe den moro moi fasi foe sori frede gi Gado, na a singi foe prèise singi gi Jehovah Gado. A singi foe singi ben de, leki fa a sori, wan normaal marki foe a troe krestendom ini a fosi jarihondro (1 Kor. 14:15). A e plisi Jehovah toe te en pipel e kon na En na ini opregti begi. Distriktkongres e gi wi wan spesroetoe okasi foe de ini wánfasi nanga doesoendoesoen brada nanga sisa ini a prèise foe Jehovah nanga jepi foe singi èn so srefi toe nanga begi. Ma son sma ben sori wan mankeri foe respeki gi den prenspari pisi disi foe wi anbegi. Fa so? Foe di den e doro na a ten foe a biginsingi nanga begi noso baka dati, sondro foe a de fanowdoe. Na a kaba foe a programa son sma e libi den sidonpresi te a singi e singi èn bifo a begi taki. Foe san-ede? Na wanwan okasi wan boen reide kan de foe disi. Ma wan toe sma e meki a grani foe singi, nanga a de makandra na ini begi, lasi gowe, soso foe kan de pikinso moro froekoe na den oto. Trawan libi den sidon presi foe de na mindri den fosiwan di tanapoe na ini a rèi foe boekoe di gi fri noso foe njanjan. Wi moesoe loekoe boen, te wi e doe moeiti foe abi sani moro makriki, dati wi no meki a grontapoe denki foe „mi fosi”, noso ogrifasi so leki gridifasi èn a prakseri foe wi eigi boen nomo, e skotoe a gro foe wi na jejefasi. Wi e doe moeiti foe sori joisti respeki gi den sortoe prenspari sani disi foe wi anbegi, namkoe, begi nanga singi gi Jehovah.
13 Wi Kresten maniri: Ini den jari di pasa, wi kresten maniri èn a fasi fa wi e sori na dorosei, na tapoe den kongres, gi wi wan boen nen leki Jehovah Kotoigi. Disi de so foe di wi e si wi kongres nanga reti leki wan jeje fesa, no leki wan prisiri waka. Ini akroederi nanga dati wi e proeberi foe sori wan jeje fasi foe denki èn foe tjari wisrefi leki bedinari.
14 Loekoe pikinso a moi ondrofenitori disi, di wan osofamiri foe Kotoigi ben ondrofeni ala di den ben sidon e njan ini wan restaurant ini wan kongres foto a jari di pasa. A brada e skrifi: „Wan man nanga en wefi ben sidon na wan tafra na sei di foe wi. Di den ben kaba njan, a man ben kon na wi tafra, ben aksi pardon èn ben taki dati nanga prisiri a ben wani prèise wi foe wi toemoesi moi èn krin loekoe na dorosei. Mi wefi ben froeteri a man taki a kaba foe a wiki disi wi ben de tapoe a Wachttoren kongres. A ben taki dati a ben prakseri dati kaba. A ben si foeroe foe wi brada nanga sisa lontoe a hotel, ala di en nanga en wefi ben tan drape èn alamala ben de boen eksempre na ini a fasi fa den ben tjari densrefi èn ben weri krosi. A ben taki dati ini a kerki di en ben fisiti, den jongoewan no ben weri den krosi èn no ben tjari densrefi neleki den jongoewan foe wi. Disi e meki mi froestan krin o prenspari a de foe leri wi pikin foe den jongoe jari kaba foe de ala ten wan boen kresten eksempre. Foe disi wi moesoe gi grani na a krakti rai nanga tiri foe Jehovah organisâsi foe gi wan toemoesi boen eksempre.”
15 A de wan sari sani, taki wan toe sma di e kon na den kongres, tron toemoesi onborsoe ini den fasi foe doe, den krosi, den taki nanga fasi foe tjari densrefi. Efoe so wan sani e kon na krin, efoe a de now ini wi gemeente noso na a ten foe wan kongres, dan den wan di abi jeje eigifasi moesoe gi rai na wan lobifasi so taki kenki kan tjari kon (Gal. 6:1; Ef. 4:11, 12). A frede di wi abi gi Gado moesoe boeweigi wi ala ten foe de fajafaja ini a hori hei foe wi boen nen èn tan hori den hei markitiki foe a fasi foe tjari wisrefi.
16 Gi papa nanga mama: Jongoe pikin nanga tini kisi wan spesroetoe kari foe de na tapoe a „Frede gi Gado”-distriktkongres. Foeroe foe den bodoi di e pristeri sa de wan deki-ati spesroetoe gi den. Fa a de wan toemoesi boen sani foe si fa jongoewan, di leri foe poti finifini prakseri na tapoe ala den kresten konmakandra èn di abi tranga belangstelling gi a kongresprograma, e sori frede gi Gado! (Ps. 148:12, 13) Ma foeroe e anga foe na eksempre nanga a loekoe di den papa nanga mama e loekoe den. Foeroe jongoewan kisi wan boen opleiding foe meki notisi. Efoe leki papa nanga mama oenoe no leri oen pikin ete fa foe meki notisi, foe san-ede dan joe no ben sa gebroiki a ten di tan abra te na a kongres, foe doe dati? Srefi heri jongoe pikin, kan kisi deki-ati foe skrifi bijbeltekst di den e kari èn den sroto wortoe di den e jere den takiman e kari èn di abi foe doe nanga den tekst. Son papa nanga mama e seti sani so taki den e loekoe baka den moro prenspari penti foe a programa te den drai go baka na a adres pe den e tan noso a srefi joeroe te den e rèis go na oso.
17 A no de foe taki, dati moro foeroe papa nanga mama e froestan taki a de a natuurlek lostoe foe pikin foe prei. Den e mankeri ondrofeni ini libi èn no lepi ete. Foe dati-ede den moesoe kisi leri oten den moesoe poti prakseri èn fa den moesoe tjari densrefi na tapoe den konmakandra. Disi e aksi foe den papa nanga mama foe loekoe den boen. Wan toe papa nanga mama ben de safoe ini a tori disi. Ala di papa nanga mama e sori joisti respeki gi Jehovah te den e begi, den pikin foe den sontron e prei èn e poeroe a prakseri foe trawan di wani poti den prakseri na tapoe a begi. Papa nanga mama moesoe sabi san den pikin foe den e doe na a ten foe a begi. San den e doe te den e libi den sidonpresi foe den te a programa e hori? Den e libi den pikin na a ten foe, noso baka a kongresprograma sondro foe sma e loekoe den?
18 Wi e warderi a wroko di joe e wroko makandra dorodoro nanga wi: Wan heri ipi sani ben prakseri na fesi foe doe èn wroko ben doe foe sorgoe taki nofo sidonpresi, boekoe, njanjan nanga tra seti de foe kisi gi ibrisma di e fisiti a kongres. Foe de seiker taki den sani disi di sreka waka boen, meki a seti so taki ibri gemeente kisi wan toewijzing foe fisiti wan spesroetoe kongres. A wroko di joe e wroko makandra dorodoro, de prenspari foe a no pasa taki toemoesi foeroe sma de tapoe wan kongres. A no de foe taki dati omstandigheid sa meki a de fanowdoe gi son sma foe fisiti wan kongres ini wan tra kontren. Ma moro foeroe sma moesoe kan fisiti a kongres pe den seni den go. — 1 Kor. 13:5; Fil. 2:4.
19 Wi e aksi oenoe foe wroko makandra dorodoro ini a tori foe a seti foe hori sidonpresi gi trawan. Hori na ini prakseri taki den SIDONPRESI MAG HORI WAWAN GI MEMRE FOE JOE EIGI OSOFAMIRI NANGA SMA DI E RÈIS NANGA JOE INI JOE EIGI OTO. Grantangi no hori sidonpresi gi trawan. Sontron sondro reide, den e hori moro sidonpresi sondro taki den de spesroetoe gi wan sma. Disi no e sori lobi èn a e kori den dienstjepiman nanga trasma di e soekoe presi di opo. Ini akroederi nanga a bijbel rai, wi moesoe tan abi no-froedini boen-atifasi foe di wi man doe santa diniwroko gi Jehovah na wan fasi di en e feni boen, nanga frede gi Gado èn respeki, èn wroko makandra dorodoro nanga a seti foe hori sidonpresi. — Hebr. 12:28.
20 Den e gi a rai foe sori taki joe e kroetoe sani boen te joe e tjari sani foe joesrefi nanga joe na a kongres djari. Ini a ten di pasa son sma tjari bigi ijsboksoe noso tra bigi sani nanga den di no ben kan poti na ondro a sidonpresi foe den. Den ben poti disi na ini den foetoepasi noso tapoe stoeroe. Disi ben abi leki bakapisi taki den ben poeroe wan sidonpresi foe wan trawan èn sontron a ben de kontrari den wèt foe brandweer nanga di foe veiligheid. Wi moesoe sori taki wi e hori trawan na prakseri ini den sortoe afersi disi.
21 Den e gi pasi foe gebroiki video kamera nanga geluidopname apparaat na tapoe a kongres presi. Ma den sma di e gebroiki den sortoe apparaat dati moesoe sorgoe foe no hendri trawan noso poeroe den prakseri. Den sortoe apparaat dati no moesoe poti na ini den foetoepasi noso pe joe e komoto go na doro. No wan foe den sortoe apparaat dati no mag sroiti tapoe a geluid sistema noso den stopkontakti ini a hal. Pasi no e gi foe gebroiki fowtow lampoe di e koti faja. Den sma di e meki trawan poeroe den prakseri foe a programa na wan fasi di e afrontoe den tirilin di skrifi na tapoesei, moesoe stòp foe doe dati sondro draidrai te sma e tjari disi kon na ondro den prakseri. Den dienstverlener nanga tra brada di abi frantiwortoe ini na afersi disi moesoe de na ai foe poti sani reti te sma e pasa iniwan foe den tirilin disi, èn den wan di e gebroiki den sortoe apparaat dati, moesoe wroko makandra dorodoro nanga den brada.
[Faki na tapoe bladzijde 6]
Jepi foe memre sani gi a distriktkongres
Dopoe: Den dopoekandidaat moesoe proeberi foe sidon na tapoe den sidonpresi ini a faki di seti foe dati, bifo a programa bigin tapoe satra mamanten. Ibri sma di abi na prakseri foe teki dopoe moesoe tjari nanga en wan bescheiden swenkrosi nanga wan wasidoekoe. Baka a dopoelezing èn a begi foe a takiman, dan a fesiman foe a konmakandra sa gi sjatoe bodoi na den dopoekandidaat èn meki wan singi bekènti baka dati. Te a lasti couplet e bigin, den dienstverlener sa tjari den dopoekandidaat go na a dopoe presi, ala di den tra sma di de drape e singi a singi te na a kaba. Foe di a dopoe leki wan simbôl foe a gi di wan sma gi ensrefi abra na Jehovah, de wan krosibei afersi na mindri a sma srefi nanga Jehovah, dan sani no seti gi wan so-kari patna dopoe, te toe noso moro dopoe kandidaat e brasa makandra noso e hori makandra ala di den e teki dopoe.
Pionier-identificatie: Ala gewoon nanga spesroetoe pionier, so srefi opziener di e rèis nanga memre foe a Bètelfamiri, moesoe teki nanga den go na a kongres, den Wachttoren Identifikatie- nanga Toewijzingkarta (S-202). Den wan di na a ten foe a distriktkongres, de siksi moen noso moro langa ini a pionierwroko, kan kisi kongresbon na tapoe a kongres dati wawan te den e sori a Wachttoren ID-Karta foe den. Foe dati ede, sorgoe a karta so boen leki joe ben sa doe nanga moni. Joe no kan kisi trawan na tapoe a kongres. Pionier sa man kisi, efoe den de, njoen boekoe foe soso noso poeblikâsi gi pionier prèis na a afdeling foe Boekoe te den e sori den Wachttoren ID-Karta.
Fri-wani-wroko: A jepi foe friwani wrokoman de fanowdoe foe meki wan distriktkongres waka grati. Srefi efoe joe kan wroko soso na wan pisi foe a kongres, den sa warderi den wroko foe joe. Efoe joe kan jepi, go na a afdeling Friwani-wrokoman te joe doro na a kongres. Pikin-nengre di moro jongoe leki 16 jari kan jepi toe foe a kongres waka boen, ma den moesoe wroko makandra nanga den papa, mama noso wan tra frantiwortoe bigiwan.
Lapelkarta: Grantangi weri den lapelkarta di meki spesroetoe, na tapoe a kongres èn srefi toe te joe e rèis go-kon na a kongres. Disi e gi wi foeroetron na okasi foe gi wan boen kotoigi te wi e rèis. Lapelkarta moesoe teki na ini oen gemeente, foe di den no sa de foe kisi na tapoe den kongres.
Wan toe wortoe foe warskow: Awinsi pe joe e parkeer, sroto joe wagi ala ten èn noiti no libi wan sani na ini di sma ai kan si. Kibri den sani di joe abi efoe a kan ini a kofroe presi. Loekoe boen gi foefoeroeman nanga langa fingaman di bigi konmakandra e hari den kon. Disi abi na ini toe taki wi no moesoe libi no wan warti sani sondro foe sma loekoe en tapoe sidonpresi, tapoe a kongres. Grantangi, oen loekoe boen.
Kande a de makriki ini wan toe tanpresi foe loekoe telefisi film di abi immoreel sani na ini noso srefi sososkin sma. Disi e poti krakti na tapoe a fanowdoe foe no libi pikin-nengre foe loekoe telefisi na den okasi disi sondro taki sma e loekoe den.
[Faki na tapoe bladzijde 6]
DISTRIKTKONGRES 1994
SRANANTONGO: 5, 6, 7 augustus Gakaba
BAKRATONGO: 19, 20, 21 augustus Tweede Rijweg
SRANANTONGO: 26, 27, 28 augustus Tweede Rijweg
INGRISITONGO: 2, 3, 4 september Tweede Rijweg