„Soyfri tongo”–distriktkongres 1990
1 Kongres ben de wan spesrutu marki fu wi anbegi na ini den hondro yari di psa. Spesrutu fu sensi na ten di wi preyki aktiviteit ben kon na libi baka na ini 1919, dan den konmakandra disi ben de ten fu yeye kowru-ati, fu di den leti fu Gado Wortu di ben tyari sani kon na krin ben meki bekènti.
2 Prakseri fu eksenpre na bigi prisiri psa marki di ben kon a doro na ini 1931 na ini Columbus, Ohio, di Gado pipri ben kisi na nyun nen, Yehovah Kotoygi. So srefi bigi prisiri ben go makandra nanga na waarheid di ben tyari kon a krin na ini 1935 na ini Washington, D.C., di ben sori taki na howpu fu na „bigi ipi” ben de fu psa libilibi go na ini Yehovah nyun grontapu — Opb. 7:9.
3 Fu di na nomru fu wi baka na di fu Tu Grontapufeti ben tan kon moro furu, meki a ben kon de fanowdu na ini Amerkankondre fu ben prati wi srefi na ini moro kongres. Srefi na ini Sranankondre den nomru fu sma ben kon moro furu. Na nomru fu sma ini a dienstyari di psa ben gro kon tron 3363, nanga ala nanga ala 69 sma di ben teki dopu na tapu den 4 kongres. Fa disi de wan tumusi bigi gro fu koloku kongres-fisitiman! Èn now a de na ten fu seti den sani di de fanowdu fu fisiti den „Soyfri tongo”–distriktkongres fu 1990.
4 Ala kresten musu kobroyki a tongo di a e taki na a moro hey fasi di kan, fu di a e prèyse na Mekiman fu en èn fu di a e bow den sma na en sey nanga gosontu, waarheidkotrow wortu, spesrutu nanga na bun nyunsu fu Gado Kownukondre. (Mat. 24:14; Tit. 2:7, 8; Heb. 13:15; teki gersi Ps. 109:30.) Na ’soyfrifasi’ fu na tongo disi e sori en srefi tu na ini disi taki a de fri fu wortu di e tyari sani kon na fesi soleki ogri bitafasi, faya-ati, atibron, babari, nanga den sortu takru wortu dati, èn so srefi fu a de fri fu bidrigifasi, doti-taki èn porifasi. — Ef. 4:29, 31; 1 Petr. 3:10.
5 Fa a sa de fu dati-ede wan prisiri sani fu fisiti den fo dey „Soyfri tongo”–distriktkongres di seti gi na yari disi èn, fu kisi ray nanga deki-ati te wi e tan go doro fu taki na „soyfri tongo” fu na waarheid na ini den muylek ten disi (Sef. 3:9). Fu di yu e seti den fanowdu sani fu de drape meki yu kan abi prati na ini den tumusi bun blèsi di seyker e wakti den wan di sa de drape. Wi e luku trutru go na Yehovah fu meki na kongresten disi wan spanwan, aladi wi e tan go na fesi na ini wanfasi na ini na anbegi fu en.
NA SETI FU SRIBIPRESI GI SPESRUTU SITUWÂSI
6 Na seti disi de soso gi dopu Kotoygi èn preykiman di no dopu, èn so srefi den pikin fu den, di abi alamala wan bun nen na ini na gemeente. Na gemeente pe den sma na ini spesrutu situwâsi de musu seti sani na fesi gi den sma disi. Owruman nanga trawan di sabi den situwâsi fu den kan gi den na wan lobifasi yepi. Disi e aksi furutron taki preykiman luku den fanowdu fu den wan di de na ini na furuten-dienst, den owruwan, den sikiwan, den dofuwan èn kande trawan ete, san kan wani taki fu teki den sortu sma disi go nanga yu. Preykiman kan sorgu so srefi na tra fasi gi den sortu sma disi (Yak. 2:15-17; 1 Yoh. 3:17, 18). A no de fu taki taki na afdeling di e sorgu fu sribipresi tapu na kongres sa pruberi fu sorgu fu sribipresi gi den preykiman di de na ini spesrutu situwâsi èn di no man fu sorgu gi den srefi, èn no man fu kisi sorgu fu trawan na ini na gemeente pe den de. Den preykiman disi kan aksi na sekretarsi fu na gemeente wan formulier fu aksi wan sribikamra fu spesrutu omstandigheid èn na a srefi ten den kan taki nanga en fu na situwâsi fu den. Na sekretarsi musu taki dan fosi nanga na dienstkomte fu na gemeente fu si efu a kan taki na gemeente yepi den sma disi fu sorgu gi den eygi sribipresi . Efu dati no de so, dan a kan gi den wan formulier fu aksi fu wan sribikamra fu wan spesrutu omstandigheid. A musu gi dati baka na a sekretarsi fu luku efu ala sani de bun dorodoro, soyfri, èn ondrosuku den omstandigheid di e meki den de bun fu kisi spesrutu sribipresi. Den omstandigheid disi musu fruklari finifini na ini na opo pisi di de na tapu na formulier. Disi musu du bun fruku nofo bifo na kongres bigin. Na sekretarsi sa seni dan na formulier go doro na a afdeling di e sorgu gi sribipresi. Den sa fruteri na sma srefi di ben aksi fu wan sribipresi fu den sani di seti gi en sribipresi . Sma na ini spesrutu omstandigheid NO musu go na a kongres èn dan te den doro drape ne den e aksi fu wan kamra, fu di na afdeling Sribipresi tapu na kongres musu abi wan fruklari fu na gemeente pe yu de taki yu de wan sma na ini spesrutu situwâsi.
7 Kamra na ini oso fu sma de leki fa a gwenti de gi den sma di a ben sa de trutru muylek gi den efu den sortu sribipresi dati no ben de. A no de gi den di man fu pay gi wan sribipresi ma di wani wan sribipresi fu soso ofu bunkopu, soso fu kan kibri moni. So srefi tu a no ben sa de yoysti fu meki fowtu kobroyki leki fisitiman fu na klari di wi brada nanga sisa de klari fu teki sma na oso, fu di wi e fruwakti taki den sa gi den sribipresi fu wan tu dey moro fu fisiti fakansi presi ofu fu du tra sani bifo ofu baka na kongres. Den kamra disi de spesrutu gi na kongresten. Den wan di e kisi na sortu sribipresi disi musu sorgu taki den èn den pikin fu den musu handri na oso fu na man ofu uma di teki den na oso, nanga respeki, fu no pori noti èn no e wakawaka luku na ini gudu ofu pisi fu na oso di den sma srefi e kobroyki. Efu ososma ben sa ondrofeni den muylekhèyt disi, dan wantron disi musu tyari kon na ondro na prakseri fu na afdeling Sribipresi fu na kongres, èn den brada drape sa gi yepi nanga prisiri.
8 Neleki a yari di psa na so na ini 1990 wan moro eenvoudig seti gi nyansani meki. Disi e meki na hebi fu na wroko kon trutru moro lekti, èn e gi na okasi fu wi poti moro prakseri na den yeye afersi fu na kongres, sotaki den wrokoman kan nyan moro bun fu na programa (Ex. 12:16b; Deut. 31:12; ad blz. 370; Teki gersi nanga Luk. 10:38-42). Na nnyan di de fu kisi sa nofo gi den mmanten nanga bakadina. Teki gersi nanga Mat. 14:14-20. Iniwan sma de fri fu seti en eygi sani gi na neti-nnyan, aladi wantu nnyansani sa de fu kisi na a kongres.
9 Na Genootschap abi spesrutu warderi gi na tumusi bun horibaka di unu brada nanga sisa, sori ini den yari di psa gi den seti fu na nnyandienst na den distriktkongres. Disi ben meki a kan taki wi ben man fu yuru bun oso èn sorgu gi den kostu fu na kongres. A ben meki unu man so srefi tu fu tan tapu na kongres na a syatu bakadina rostuten èn fu de dape baka biten èn nanga kowru-ati gi na moro prenspari yeyeprograma.