Tan tranga na jejefasi, hori joesrefi krin gi a dienst foe Jehovah
1 Na Jesaja 60:22, Jehovah ben gi wan pramisi di e kontroe na fesi wi eigi ai: „A pikinwan srefi sa tron doesoen èn na mendriwan wan makti nâsi. Misrefi, Jehovah, sa meki a pasa na en reti ten.” Te wi e prakseri foe wan nâsi, dan wi e denki foe wan bigi groepoe foe sma di e tan na wán foe di den abi wan gemeenschappelijk belang èn e doe a wroko foe den ondro a tiri foe wan tirimakti di den ben poti.
2 A dienstbericht foe 1991 ben sori wan heimarki foe 4.278.820 preikiman foe a boen njoensoe na a heri grontapoe, wan go na fesi foe 6,5 prosent moro leki a jari di pasa. Foe troe Jehovah ben tjari wan kefarlek bigi ipi opregti sma kon na wan, di e winsi foe prati densrefi foe a seti foe sani disi di e hori sma na ondro èn foe tron loyaal borgroe foe a Mesian Kownoekondretiri ini anoe foe en Manpikin, Jesus Krestes. Ibri jari a nomroe foe den wan di den ben tjari kon a wan, e tan gro. A e prisiri wi taki wi na wan pisi foe a nâsi disi, foe san joe kan taki letterlijk taki den de leki wan njoen-grontapoe libimakandra. Na a Memrefesa ini 1991 10.650.158 fisitiman ben de, wan gro foe 7 prosent moro leki 1990. Disi e wani taki wan toemoesi bigi gro foe foeroe moro sma di sa moksi densrefi nanga wi leki Kownoekondre borgroe.
3 Wi sabi so srefi taki a no ala sma di de ini a nomroe disi foe fisitiman tapoe a Memrefesa, ben drai baka gi a grontapoe disi so fara leki a de fanowdoe foe den kan teki den dorodoro leki memre foe Jehovah pipel. Sma foe ala nâsi ’e lon go na a oso foe Jehovah’, ma den moesoe kisi dorodoro ’leri foe den pasi foe en’ so taki den „[kan] waka tapoe den foetoepasi foe en” (Jes. 2:2-4). Moro leki fo miljoen sma di ben fisiti a Memrefesa, ben waka akroederi den leri foe Gado èn den ben kisi krakti na jejefasi di ben poesoe den foe tan tjari densrefi na wan krinfasi, so dati den kan feni den boen foe den kan abi wan prati na a Kownoekondre preikiwroko, di e doe now (Mat. 24:14). Den sortoe sma disi abi wan posisi di e prisi Jehovah èn e njanboen foe ala den toemoesi moi sani di a sreka gi den. San den tra moro leki siksi miljoen sma moesoe doe, foe den kan kon tranga toe na jejefasi èn kon krin gi a dienst foe Jehovah?
4 Den moesoe ’feti foe a bribi sondro foe weri’ (Jud. 3). Te den teki wan bosroiti kaba foe waka a pasi foe Jehovah, den e kon ondro na kwinsi foe Didibri, di e fadon na den tapoe nanga tesi, kori nanga takroe makti. Neleki Paulus den moesoe loekoe go na Jehovah foe krakti foe man horidoro (Fil. 4:13). Jehovah e gi den sortoe sma dati krakti nanga jepi foe den wan di kon tranga kaba ini a bribi. Paulus ben gi a froemane taki ’wi di tranga, moesoe tjari den swakifasi foe den di no tranga’ (Rom. 15:1, 2). Te den trangawan nanga den swakiwan e go makandra, dan krakti de foe tan kánkan. „Toe moro boen leki wán. . . . Bika efoe wan sma ben sa kan moro a wan di de en wawan, dan toe makandra kan hori doro kontrari en.” — Preik. 4:9, 12.
5 Disi wani taki dati njoenwan troetroe e bow tapoe wi leki a jepisani nanga jepi foe san den kan kisi krakti foe Jehovah. Den wan na wi mindri di de kresten di ben gi densrefi abra, moesoe hori wisrefi tranga na jejefasi efoe wi wani foe jepi njoenwan. Kresten di tranga na jejefasi, kan ’prati jeje presenti’, san abi leki bakapisi „a gi èn kisi deki-ati foe makandra” (Rom. 1:11, 12). Disi na wan foe den prenspari fasi di Jehovah e gebroiki foe tjari wi kon na wán èn foe meki wi alamala de ’stanfaste èn tranga’. — 1 Petr. 5:9-11.
6 Wi moesoe poti en leki wi marki foe jepi den njoenwan disi, ala di na a srefi ten wi e tan sabi den eigi jeje fanowdoe foe wi (Mat. 5:3). Denki na wan jejejfasi, na a sroto gi a krakti foe wi. Disi na wan eigifasi di wi moesoe ondrow èn moesoe meki kon tranga foe di wi e teki jeje njanjan doronomo ini wi. Nanga jepi foe en organisâsi Jehovah e gi programa, di de ini balansi, foe studeri en Wortoe. Den feifi alawiki konmakandra prenspari srefisrefi foe meki wi kon tranga, bika den e ’poesoe wi foe abi lobi èn toemoesi boen wroko’. — Hebr. 10:24.
7 Den konmakandra disi e tjari moro blesi kon te den e go makandra nanga wan boen gwenti foe studeri nanga joesrefi èn nanga a famiri. Leki a moro pikin marki wi alamala moesoe abi a leisi èn loekoe foe a deiwortoe, a leisi foe den pisi foe bijbel akroederi a schema gi a bijbel leisiprograma foe a theokrasia diniwroko-skoro, èn a sreka foe wisrefi tapoe na boekoestudie nanga a Waktitoren studie. Ibri famiri sa moesoe loekoe fa den sa orga disi, èn moesoe sorgoe taki disi e pasa na wan fasti ten. A famiri edeman moesoe loekoe taki a studie programa fiti den spesroetoe jeje fanowdoe foe na osofamiri. Na a fasi disi ’na osofamiri sa bow. . . . A sa sori taki a poti steifisteifi’ (Odo 24:3). Efoe wisrefi èn makandra nanga a osofamiri de nanga wi heri ati ini den studie-gwenti foe wi, dan wi kan de seiker taki Jehovah sa blesi wi èn en jeje sa jepi wi foe horidoro ondro ala sortoe tesi. — Jak. 1:2, 3; 1 Petr. 4:11.
8 Tan krin èn sondro flaka: Ala di Jehovah e kari wi na wan switifasi foe kon krosibei foe en, na a srefi ten, a e sori wi taki disi e pasa tapoe gron foe a bribi di wi moesoe bribi ini a broedoe foe Jesus di ben lon, di ’e krin wi foe ala sondoe’ (1 Joh. 1:7; loekoe so srefi Hebrewsma 9:14). Wi kan go doro foe tranga wi bribi nanga jepi foe studeri foe Gado Wortoe nanga wisrefi èn foe doe san wi e leri. Sonwan e tron sma di e fadon gowe, bika den no e teki jeje njanjan foe densrefi ofoe no e doe foeroe moeiti foe gebroiki den sani, di den ben leri, ini den libi. Disi e meki taki den e kon swaki gi den aanval foe Satan. Sonwan ben kon swaki na jejefasi èn leki bakapisi foe dati den ben kon inaktief. Wan sari sani de, taki trawan baka ben meki a kon so fara taki den ben fadon go doe serjoesoe ogridoe, èn dati ede den ben moesoe sluit den uit. Paulus ben warskow: „Soema e denki foe dati ede taki a tanapoe, moesoe loekoe boen taki a no fadon” (1 Kor. 10:12). Efoe foe espresi wi no e studeri, no e go na den konmakandra foe wi èn no e doe velddienst, dan makriki wi kan fadon ini trapoe foe makti di no santa èn kon ini tesi. — Hebr. 2:1; 2 Petr. 2:20-22.
9 A prenspari srefisrefi foe wi hori wisrefi krin na ala fasi: na skinfasi, na ini wi denki, na jejefasi èn na moreelfasi (2 Kor. 7:1). Dei foe dei a grontapoe di de lontoe wi e pori èn e kon takroe moro nanga moro. Didibri e kon nanga moro hebi sortoe fasi foe kori, foe fanga wi. Te wi e sorgoe taki wi e tan tranga na jejefasi, dan a no sa de so taki wi no ’sa sabi san a wani doe èn taki a e fanga wi’ (2 Kor. 2:11). Den bodoi èn den rai di wi e kisi foe Jehovah organisâsi, e jepi wi foe si èn foe kakafoetoe gi den takroe makti.
10 Den wan di e teki fesi ini a gemeente, abi a frantiwortoe foe gi trawan wan toemoesi boen eksempel foe di den e tan tranga èn e hori densrefi krin. Paulus ben poti krakti tapoe a frantiwortoe disi di a ben taki: „Hori den na prakseri di e teki fesi na oen mindri. . . . Waka baka a bribi foe den, nanga ala di joe e loekoe na a kaba foe a waka foe den” (Heb. 13:7). A de toemoesi prenspari taki owroeman èn dinari ini a diniwroko di den ben poti a wroko, e gi wan boen eksempel ini a fasi fa den e tjari densrefi, so srefi toe ini a doe foe den plekti leki famiri edeman. Den moesoe meki moeiti foe de leki a jongoe Timoteus, di ben kisi a rai foe „kon de wan eksempel ini taki, a fasi fa a ben tjari ensrefi, ini lobi, ini bribi èn ini krin libi” (1 Tim. 4:12; 1 Petr. 5:3). Wi di e tan abra abi a frantiwortoe disi toe, foe de boen eksempel foe di wi moesoe tan tjari wisrefi na wan krinfasi. Njoenwan e kroetoe a waarheid èn so srefi Jehovah organisâsi, nanga jepi foe san den e si ini wi. Wi wani de seiker taki san den e si e gi den deki-ati foe teki a presi foe den ini Jehovah en krin organisâsi.
11 A tjari kon a wan foe pasa „a bigi banawtoe” libilibi, e go esi-esi moro nanga moro (Openb. 7:14). Soso den wan di e kon tranga na jejefasi èn e hori densrefi krin sa tan na libi te foe kaba. Foeroe e anga foe den sani disi: (1) abi boen gwenti foe studeri nanga joesrefi èn denki dipi foe Gado Wortoe; (2) sori troetroe persoonlijk belangstelling gi makandra nanga a winsi foe gi makandra deki-ati; èn (3) foe wroko makandra ini wánfasi foe tan hori wan krinfasi foe tjari joesrefi, di sa gi a nen foe Jehovah grani. Te wi e doe den sani disi, dan wi kan de seiker foe Jehovah blesi èn a kibri di a sa kibri wi te a grontapoe disi e kon na en kaba. Wi kan froetrow a tapoe taki wi sa de a mindri ’den getrow wan di Jehovah e kibri’.—Ps. 31:23.