A krakti foe a Wortoe foe Gado
1 A Wortoe foe Gado abi krakti (Hebr. 4:12). Ini a ten disi, boeweisi foe disi de foe si na den miljoenmiljoen libi di ben kenki kon moro boen foe di sma meki foeroe persoonlek gebroiki foe den sani di den ben leri foe bijbel. A srefi ben de troe ini a fosi jarihondro di den disipel foe Jesus ben e prati a sabi foe Gado Wortoe nanga trawan — Rom. 12:2.
2 Foe sma kan abi wini foe den leri foe bijbel, den moesoe kon sabi a bijbel leki a Wortoe foe Gado (1 Tes. 2:13). Ini november wi sa gi sma na okasi foe leri moro foe a warti di bijbel warti te wi e meki A Njoen Grontapoevertaling foe den Santa Boekoe nanga a boekoe Bijbel — Gado Wortoe noso di foe libisma? kon ini anoe foe den sma di abi opregti belangstelling.
3 Foe san ede joe no e go loekoe wan toe foe den edepenti di abi wi belangstelling foe a Gado Wortoe-boekoe baka? A lijst nanga den tori di de ini a boekoe sa tjari joe go na den kapitel di e taki foe wondroe, a prakseri taki sani de kontrari densrefi, sabidensi wanfasi, profeititori, nanga tra tori. Foeroe fowtow nanga prenki de. Den boekoe di den sabiman e sori go na den, tanapoe na wan lijst na bakasei foe a boekoe. Den edepenti disi sa meki wi man foe pristeri a boekoe disi nanga opregti faja, nanga a tranga overtoigi taki sma ini wi gebied moesoe foe jere san na a boen njoensoe di a abi na ini.
4 Fa wi kan gebroiki a boekoe disi te wi miti nanga wan ososma di e bribi kaba taki a bijbel de a Wortoe foe Gado? Wi kan wiki a belangstelling foe di wi e tjari kapitel 2 kon na fesi, di e taki foe a historia tori foe a feti foe bijbel foe de na libi, noso kapitel 14, di e gi a leisiman deki-ati foe teki na jepi foe kan abi wan moro betre froestan foe san bijbel wani taki gi wi ini a ten disi. Te joe sa leisi den tekst di skrifi na kapitel 14, dan disi sa gi na ososma a djaranti taki a takimakandra foe joe abi bijbel leki gron.
5 Foeroe sma e weigri foe teki bijbel leki a Wortoe foe Gado foe a fasi ede fa a krestenhèit e tjari ensrefi. Kapitel 3, „A falsi mati foe bijbel”, kan gebroiki nanga boen bakapisi ini a situwâsi disi.
6 Te wi e leisi komoto foe wi bijbel, na ososma kande kan taki wan sani foe a krin fasi foe a tongo di gebroiki ini a Njoen Grontapoevertaling. Noso kande wi e si taki na ososma e sori belangstelling gi a boskopoe foe wi, ma taki a no abi wan bijbel. Efoe a de so dan wi kan taki foe den aparti edepenti foe a bijbel di wi e gebroiki èn a reide foe san ede wi lobi moro foe gi en na tra sma. Na mindri foe tra sani, wi kan sori go na a lijst „Bijbel Wortoe Index” di e jepi wi foe feni tekst di wi sabi. So srefi, na edepenti, „Bijbel tori foe takimakandra” na bakasei foe a bijbel kan jepi den di abi belangstelling foe feni piki tapoe foeroe aksi di sma gwenti aksi.
7 Nanga jepi foe a bijbel, Jehovah ben meki sma kon sabi a handri di a e handri nanga a libisma famiri èn a meki wi abi a sabi foe en toemoesi moi persoonlekhèit. Meki wi gebroiki a Njoen Grontapoevertaling nanga a Gado Wortoe boekoe na wan fasi di abi boen bakapisi foe e jepi trawan foe leri foe Jehovah nanga a krakti foe en Wortoe! — 2 Kor. 10:4.