Njan boen dorodoro foe a „Leri foe Gado”-distriktkongres 1993
1 „Leri mi ,o Jehovah” (Ps. 86:11). Disi moesoe de a serjoesoe begi foe ibri dienstknegti foe Gado di gi ensrefi abra. Wi abi a fasti bosroiti foe no stòp no wanten foe leri èn no stòp no wanten foe doe san wi leri. Sontron a de fanowdoe taki wan sma e poti wi boen a pasi, èn so leki fa a psalmsingiman ben doe, a de fanowdoe taki wi begi Gado foe meki wi ati de ini wanfasi so taki a no sa prati. A programa foe a „Leri foe Gado”-distriktkongres sa sorgoe foe praktis bodoi èn a poti reti baka foe sani di wi abi fanowdoe so taki wi kan dini Jehovah na wan getrow fasi ini a sistema foe sani disi, di e poti druk na wi tapoe.
2 Wan Fo Dei Kongres: A programa sa bigin fodeiwroko 1.20 bakadina èn a sa tapoe sonde wan sani foe 4.15 bakadina. Grantangi sabi taki no wan sma sa kisi a primisi foe go fosi 7.30 na inisei, efoe a no de taki a abi wroko foe doe bifo a ten dati.
3 San wi kan froewakti? Tranga jeje njanjan pasa marki di sa pristeri na difrenti fasi: ini lezing, demonstrâsi, aksi takimakandra nanga toe drama. No misi no wan foe den toemoesi prenspari rai disi! Boiti dati, wi e wakti nanga prisiri foe miti den sma di wi ben gwenti kaba èn wi kan meki njoen mati. Kande zendeling di e dini ini presi di wi no sabi, sa fisiti oenoe kongres. Njan boen foe na okasi foe kon leri sabi den getrow brada nanga sisa disi. Efoe joe na wan papa noso mama, meki joe pikin teki prati toe na a takimakandra. A prisiri jeje èn a òfer di den zendeling e òfer den srefi kan poti a fondamenti gi den jongoewan foe oenoe, foe go prakseri foe wan libipasi ini a foeroeten diniwroko.
4 Joe wani tjari a heri di foe tin pisi na ini a maksin? Ini Maleaki 3:10, Jehovah ben pramisi den Israèlsma taki efoe den wani tesi en èn tjari a heri di foe tin pisi foe den na ini a maksin, en ben sa kanti wan blesi te leki sani no sa mankeri moro.
5 A tesi foe Jehovah sa wani taki gi sonwan, taki so esi leki a kan den moesoe aksi fakansi na den basi noso aksi fri foe den wroko foe kan fisiti a kongres. Sontron brada ben draidrai foe doe disi, foe di den ben e prakseri taki den wroko basi no ben sa gi den primisi foe fisiti a kongres. Ma tokoe, ini afersi di no abi foe doe nanga jeje sani, den abi pikinso problema noso no abi problema kwetikweti foe meki den wroko basi kon sabi san den wani foe doe.
6 Wi moesoe aksi wisrefi: Efoe wan lobi mati foe wi ini wan tra kontren ben sa go trow, wi no ben sa go na wi wroko basi foe aksi fri foe fisiti a trowoso? Èn efoe a ben sa draidrai, wi no ben sa froeklari en nanga ala respeki ofoeroe a ben sa wani taki gi wi foe man go na a trowoso? Seiker, a de moro prenspari foe kisi leri foe Jehovah leki foe fisiti wan trowoso! Efoe troetroe wi abi na overtoigi taki a kongres programa de toemoesi prenspari gi a jeje go na fesi foe wi, dan a sa de moro makriki gi wi foe overtoigi wi wroko basi foe gi wi fri foe fisiti a kongres.—Jak. 1:7, 8.
7 Ini Israèl a di foe tin pisi ben abi na ini, a horibaka gi a presi foe troe anbegi foe Jehovah na skinfasi. Ini wi ten a di foe tin pisi e prenki a ten, a krakti, èn moni di e gebroiki ini a dienst foe Jehovah èn a horibaka gi a kownoekondre wroko. A di foe tin pisi abi na ini toe a ten di wi de na konmakandra, bigi konmakandra nanga kongres, so boen leki na ondrow èn a krin foe wi konmakandra-presi. A „Leri foe Gado”-distriktkongres sa gi wi foeroe okasi foe tjari a heri a di foe tin pisi na ini a maksin na jeje fasi foe Jehovah. San na wan toe foe den okasi disi?
8 Wi kan tjari a di foe tin pisi foe di wi e arki finifini na a kongres programa, foe di wi e teki prati nanga faja ini a singi foe ibri Kownoekondre singi, èn foe di wi e arki boen na ibri begi, so taki wi kan taki wan opregti amen.
9 A go na fesi foe wi ini waarheid sa didon na o foeroe wi e broko ede nanga a fasi fa wi e arki. Ini wan bigi konmakandra-presi noso wan stadion a de makriki foe trawan poeroe wi prakseri nanga jepi foe sani den e doe lontoe wi, èn foe dati ede wi moesoe hori wi prakseri na wan presi. De seiker taki te joe kon na a kongres joe de srekasreka dorodoro, foe di joe abi joe bijbel, joe singiboekoe, joe pen nanga wan schrift, èn A Waktitoren di wi sa studeri a wiki dati. A de wan boen jepi foe skrifi penti nanga tekst di ibriwan foe den takiman e gebroiki. No skrifi foeroe sani; efoe joe skrifi toemoesi foeroe sani, dan dati sa tapoe joe foe poti boen prakseri na san e taki. Jongoewan srefi moesoe kisi leri foe de boen arkiman. Pikin kan tjari a di foe tin pisi makandra nanga den papa nanga mama foe di den e arki a programa so boen leki den kan.
10 Son papa nanga mama e sreka ten ibri dei na oso foe tan pi, te den e aksi foe den jongoe pikin foe leisi noso foe loekoe den prenki ini wan foe den boekoe foe a Genootschap. A boen oefening disi e meki taki a de moro makriki gi den pikin foe sidon pi na konmakandra nanga kongres. Papa nanga mama di ben kweki pikin di de boen eksempre e taki dati noiti den ben gi pasi foe den jongoewan tjari preisani noso boekoe foe kloroe na konmakandra. Srefi den njofi pikin kan leri taki a reide foe fisiti den konmakandra na foe anbegi Jehovah. Papa nanga mama di e leri den jongoewan san a wani taki gi den foe tjari a heri di foe tin pisi na ini a maksin, de troetroe foe prèise!
11 Wi kan tjari a di foe tin pisi so srefi na inisei foe di wi e doe friwaniwroko ini a gi foe wi ten nanga krakti foe jepi a kongres organisâsi. Na moro foeroe foe den presi den poti wan noso toe dei bifosi a kongres bigin, foe krin a presi. Efoe joe e libi krosibei, dan foe san ede joe no e seti sani taki a heri osofamiri e teki prati? Son brada ben tjari den bijbelstudie di e meki go na fesi go nanga den, so taki srefi bifo den teki dopoe den njoenwan disi kan leri san a wani taki foe hori baka gi na anbegi foe Jehovah. Foeroe sani de foe doe foe djaranti taki ala sani sa waka boen na a kongres. Foe san ede oenoe no e go doe friwaniwroko leki wan osofamiri?
12 Wan tra fasi fa wi kan tjari a di foe tin pisi kon na inisei, na a horibaka gi a kongres na monisei. Di a ben taki fa den ben moesoe gi presenti na skin fasi, foe horibaka gi a troe anbegi, Jehovah ben komanderi a nâsi Israèl: „No wan sma moesoe kon a fesi foe Jehovah nanga leigi anoe. Na presenti foe ibriwan moesoe de akroederi a blesi, di Jehovah oenoe Gado ben gi oenoe” (Deut. 16:16, 17). Efoe a pipel ben man foe gi foeroe noso pikinso, dan den ofrandi di den ben sreka na fesi, ben e plisi Jehovah. Na a srefi fasi foeroe brada nanga sisa e prakseri ini begi san den kan gi leki bijdrage efoe a de a moni srefi noso wan cheque (di skrifi tapoe a nen foe „Jehovah Kotoigi”). Joe e meki den jongoe pikin foe joe e poti ten na ten wan bijdrage ini a bijdrage bus?
13 Meki a leri foe wi Loesoeman, Gado, moi: Nanga jepi foe boen maniri nanga a boen fasi fa wi e tjari wisrefi, wi kan „meki a leri foe wi Loesoeman, Gado, moi ini ala sani” (Titus 2:10). Nanga tra wortoe leti na a kongres wi kan sori taki wi e gebroiki a leri foe Gado ini wi libi.
14 Fa a de nanga wi maniri? Ini a ten disi firi gi trawan no de foe feni na grontapoe. Ma a pipel foe Jehovah, di e meki bijbel gronprakseri tiri den, no e prakseri den eigi wini nomo, ma a wini foe den sma na den sei (Fil. 2:4). Wi e prakseri trawan di lontoe wi. Wi no e poesoe foe priti pasa a den sma mindri te wi de na rèi foe bai njanjan noso boekoe. Wi e hori den owroewan ini prakseri èn den jongoe pikin di kande e tanapoe wakti na ini a rèi nanga den papa noso mama èn di den moro bigiwan, di kande no si den, ben kan poesoe pasa den makriki.
15 A fasi fa wi e tjari wisrefi na wan fasi di e fiti wan sma di e frede Gado, abi troetroe krakti tapoe den sma di lontoe wi. Ini wan kongres foto, a jari di pasa, wan skowtoe di ben e wroko 21 jari kaba ben taki: „A froewondro mi fa den sma foe oenoe e gi jesi so. [Den de] aparti sma; den e piki papira nanga tra sani sondro foe sma aksi den èn den tjari densrefi fa a fiti èn joe kongres orga boen.” A ben taki moro fara: „Te den sma foe oenoe e si wi, den e poti wan lafoe fesi. Dati na wan boen marki. Na dati wi e loekoe. Dati na wan marki foe switifasi èn taki noti no de foe kibri. Èn wi e si toe fa den pikin de nanga den papa nanga mama èn taki den abi boen maniri. Joe kan bribi mi, a go na mi ati troetroe. Mi e prisiri foe kisi a wroko djaso.”
16 Sonwan foe den lantiman ini Amerkankondre ben go spesroetoe na Bethel foe kan gi den brada wan kari, foe hori wan kongres na ini a foto foe den. A Genootschap ben teki a switi kari èn a froewakti foe den edeman foe a foto ben kon troe. A man di e teki presi gi a edeman foe a foto ben taki: „Wi breiti srefisrefi foe abi wan groepoe leki oenoe, foe hori konmakandra ini wi foto. Wi meki tranga moeiti foe kisi oenoe djaso . . . èn oenoe no ben kan gi wi moro prisiri leki disi.” Nanga a boen fasi fa den e tjari densrefi, ibri brada nanga sisa ben jepi foe gi wan toemoesi moi kotoigi drape.
17 Joe persoonlek sa wani foe meki a leri foe wi Loesoeman, Gado, moi foe di joe de wan eksempre ini a fasi fa joe e tjari joesrefi? Djaso wan toe fasi de fa joe kan doe disi.
Krosi nanga fa joe e meki joesrefi: Na a ten di wi e fisiti a kongres wi no moesoe denki taki wi de nanga fakansi. Kontrari foe dati wi e pristeri wisrefi gi Jehovah, foe kisi leri foe en. Efoe dati de so, dan wi no sa weri krosi neleki te wi e fisiti den konmakandra na a Kownoekondrezaal? (1 Tim. 2:9, 10) Boiti dati, wi moesoe poti boen prakseri na tapoe san wi sa weri baka te den programa kaba. Te wi e drai go baka na wi tanpresi, a ben sa fiti wi dan, awansi omeni jari wi abi, foe kenki wi lespeki warti kongres krosi, gi krosi di kande e meki wi gersi grontapoe sma di e weri doti krosi èn di no kan den wiwiri? Disi no e sori taki den krosi di wi ben weri tapoe a konmakandra no de noti moro leki wan krosi foe spesroetoe okasi èn no wan dorosei prenki foe wi fasi foe libi? Hori na prakseri taki wi e tjari a nen foe Jehovah èn ibriwan foe wi moesoe sorgoe taki sma no man foe tjari no wan troetroe kragi kon tapoe a pasi foe waarheid.
Wi moesoe memre den sma di wani teki dopoe taki na so wan santa okasi a no fiti foe weri bosroko pe grontapoe sani skrifi na tapoe di wani taki wan sani, ofoe abi wan embleem na tapoe (wan marki foe meki wan difrenti na mindri den bisnisman) noso di abi reklame na tapoe. Den owroeman moesoe sorgoe taki den dopoe aksi e loekoe biten a fesi èn taki ibri sma di sa teki dopoe e jere langa nofo a fesi efoe a feni boen foe teki dopoe efoe no. (Te joe loekoe den aksi, a de wan boen ten toe foe gi bodoi di abi foe doe nanga a weri foe krosi di fiti foe teki dopoe). A no de fanowdoe taki sma di o teki dopoe èn di ben kisi primisi kaba foe den owroeman moesoe gi den nen na a kongres.
Opname wrokosani: Ala di videokamera mag gebroiki, wi sabi taki joe sa hori rekening nanga trawan. A no sa de wan sori foe lobi te oenoe sa tapoe a fesi foe tra sma, di e fisiti a kongres, foe di oenoe e meki film foe a programa. A no sa abi trobi efoe, komoto na a presi pe joe sidon, joe wani teki wan toe sani foe a programa. Grantangi, hori na prakseri taki kamera noso opname wrokosani no mag poti noso anga na a elektris noso geluid-sistema foe a kongres èn sma no moesoe poti wrokosani toe na a pasi pe sma e waka noso na presi pe foeroe sma e waka.
Sidonpresi: Grantangi hori na prakseri taki SIDONPRESI MAG HORI SOSO GI MEMRE FOE JOE EIGI OSOFAMIRI NANGA SMA DI E RÈIS NANGA JOE INI A SREFI OTO. Na ala kongres, faki sa de di de spesroetoe gi den owroewan nanga malengriwan. Grantangi hori den granisma na prakseri. Ini a ten di pasa, son owroe brada nanga sisa ben abi foe soekoe sidonpresi na presi di ben de moro moeilek foe den doro drape, foe di jongoewan ben go sidon na den presi na ini a faki foe den granisma. Wi e sari taki wi no man foe gi aparti presi noso kamra di sma begi wi, gi den sma nanga problema so leki alergie (sma di den skin no man foe froedrage bepaalde sani moro).
Persoonlek sani: Wi e gi joe a rai foe meki den nomroe foe sani foe joesrefi di joe o tjari go na a kongres, no de toemoesi foeroe. Efoe wan sani no e fiti na ondro a stoeroe foe joe, dan kande a moro betre foe joe libi en na oso noso ini a baki foe joe oto. Bigi ijs-boksoe no mag poti na a pasi pe sma e waka so taki den tron wan bigi kefar gi sma, èn efoe joe sa poti den na tapoe a stoeroe na joe sei, dan kande wan tra sma no sa abi sidonpresi.
Boekoe nanga njanjandienst: Wi alamala wani sori warderi gi den presenti foe Gado, meki wi e sorgoe boen meki noti no froemorsoe (Joh. 6:12). Neleki ini a ten di pasa, wi e gi na rai taki wan memre foe a famiri e go teki a njanjan gi a famiri. Foe sorgoe taki joe no teki moro leki san joe abi fanowdoe, foe san ede joe no e meki wan lèist foe san ibriwan wani, èn dan meki gebroiki foe a lèist te joe o bai? Hori na prakseri taki a njanjan no moesoe teki gowe foe a kongres presi tjari go na tra presi foe gebroiki disi bakaten. Papa nanga mama moesoe taki nanga den pikin foe den no froemorsoe njanjan. Grantangi sori taki na wan lobifasi joe e hori trawan na prakseri te joe o go bai boekoe.
18 Foe di na wan lobifasi joe e prakseri trawan, sreka sani foe doro froekoe ala dei, spresroetoe tapoe fodeiwroko te kande a sa teki moro langa leki a gwenti de, foe feni wan presi foe poti na oto èn foe feni wan sidon presi.
19 Fa wi abi wan bigi grani foe kisi leri foe Jehovah! A gebroiki foe wi ten, wi krakti nanga wi goedoe na skinfasi foe horibaka gi a „Leri foe Gado”-distriktkongres foe a jari disi sa abi leki bakapisi foeroe jeje wini gi wi srefi èn so toe gi wi famiri.
Jepisani foe memre sani foe a kongres
Joisti maniri: A prenspari taki ala sma di e fisiti a kongres e poti joisti prakseri tapoe a tjari fa wi e tjari wisrefi èn e si a konmakandrapresi nanga respeki leki „na oso foe Gado” (Ps. 55:14). Na a ten foe den taki, drama, singi èn spesroetoe den begi, grantangi no doe wan sani di kan hari a prakseri poeroe foe trawan di e arki a programa. Wi no e sori respeki efoe wi e waka go waka kon foe soso, e hori takimakandra noso e gebroiki kamera nanga flash noso video kamera na wan fasi di e hari a prakseri poeroe foe sma di e proberi foe arki san den e taki. A fasi fa wi e prakseri trawan na wan joisti fasi èn wan boen fasi foe tjari wisrefi, sa sori taki wi e warderi a leri foe Gado opregti èn taki wi kon na a kongres foe kisi leri foe Jehovah.
Dopoe: Sma di o teki dopoe moesoe sidon tapoe den presi na ini a faki di poti spesroetoe gi den, bifo a programa e bigin tapoe satra mamanten. Ibri wan sma di abi na prakseri foe teki dopoe, moesoe tjari bescheiden swen krosi nanga wan wasidoekoe kon. Baka a dopoe lezing nanga a begi foe a takiman, dan a fesiman foe a programa sa gi sjatoe rai na den sma di o teki dopoe èn baka dati a sa kari wan singi. Baka a lasti pisi foe a singi dan den brada di e sori sma pe den moesoe sidon sa tjari den sma di o teki dopoe go na a dopoe presi noso na den wagi di sa tjari den go drape. Foe di a dopoe leki wan simbôl foe a gi di wan sma e gi ensrefi abra na Jehovah de wan krosibei èn persoonlek afersi a mindri a sma srefi nanga Jehovah, meki seti no de gi wan so kari patna-dopoe pe toe noso moro sma di o teki dopoe e brasa makandra noso e hori den anoe foe makandra, te den e kisi dopoe.
Friwanidienst: A jepi foe friwani wrokoman de fanowdoe foe meki wan distriktkongres waka sondro problema. Srefi efoe joe no man wroko a heri kongres, tokoe wi sa warderi den wroko foe joe. Efoe joe kan jepi, grantangi go dan te joe doro na a kongres na a afdeling Friwani wrokoman. Den pikin di moro jongoe leki 16 jari kan doe wan sani toe foe meki a kongres waka boen, ma den moesoe wroko makandra nanga a papa noso mama noso wan tra frantiwortoe bigisma.
Lapelkarta: Weri grantangi te joe de na a kongres, a lapelkarta di meki spesroetoe èn weri en so srefi te joe e rèis go èn rèis komoto foe a kongres. Foeroe tron disi e meki wi man gi boen kotoigi te wi e rèis. Te sma e kon sabi wi leki wan kongres fisitiman foe di wi abi wan lapelkarta di skrifi na wan krinkrin fasi, dan disi sa meki a seti foe a prati foe njanjan moro makriki. Joe moesoe teki den lapelkarta ini joe gemeente, foe di den no de foe kisi na a kongres.
Persoonlek identifikâsi karta: Boiti a „Leri foe Gado”-distriktkongres lapelkarta, ibriwan sma e kisi a deki-ati foe abi nanga en, en Broedoe karta. Den memre foe a Betelfamiri nanga den pionier so srefi moesoe abi den I-D karta nanga den.
Wan wortoe foe warskow: Awansi pe joe e poti joe oto, (brom, baisigri noso boto) joe moesoe sroto en ala ten èn noiti no libi wan sani didon na ini (noso na tapoe) di sma ai kan si. Kibri den sani foe joesrefi efoe a kan ini a baki na bakasei foe a wagi èn sroto en (noso poeroe den tjari gowe). De na ai toe gi foefoeroe-man èn sma di e foefoeroe moni poeroe a sma saka èn di ala ten e kon pe foeroe sma de na wan. Disi wani taki toe foe no libi no wan warti sani a baka tapoe joe sidonpresi na a kongres, sondro taki wan sma e hori ai na en tapoe. Wi kisi foe jere srefi foe wan toe kefal foe sma sondro konsensi, di e proeberi foe kori jongoe pikin poeroe foe a presi pe a kongres e hori. Grantangi, loekoe boen.
Son brada nanga sisa nanga sma di abi belangstelling ben go na den sma di e sorgoe gi a kongres presi, foe soekoe bodoi foe o lati den programa e bigin, èn tra sani toe. Grantangi no doe disi. Efoe na bodoi di joe abi fanowdoe no de foe feni ini A Waktitoren noso Wi Kownoekondre Dienst, dan joe moesoe skrifi go na a kongres adres.