Go nanga prisiri baka foe jepi sma di abi belangstelling
1 Ala sma di e teki prati na a oso-foe-oso wroko e angri foe jepi sma di abi belangstelling. Te wi e gi a jepi disi, wi e ondrofeni dipi prisiri nanga satisfaksi. (Teki gersi Psalm 126:5, 6.) Disi e aksi foe wi taki wi de sreka sreka.
2 A sreka e bigin te wi skrifi sani finifini tapoe wi oso-foe-oso raport. Skrifi a tori di oenoe ben takimakandra na a fosi fisiti èn a fasi fa na ososma ben piki. Kande joe wani skrifi toe fa joe wani bigin a takimakandra te joe sa go baka.
3 Foe eksempre, efoe na a fosi fisiti joe ben sori go na a Wi Tata begi èn dan joe ben libi a „Tiri”-brochure na baka, joe ben kan taki sjatoe wan sani neleki disi:
◼ „Di mi ben fisiti joe a lasti leisi, wi ben taki foe a fasi fa a wani foe Gado o pasa na grontapoe èn taki vrede sa kontroe ini ala kontren foe a libi. Grantangi loekoe, ini a brochure di mi ben libi na baka, san skrifi na bladzijde 29 foe den tra blesi di Gado Kownoekondre sa tjari kon gi a libisma famiri.”
4 Efoe a sma ben sori taki a no e bribi ini Gado, taki dan wan sani neleki disi:
◼ „Di mi ben kon a fosi leisi, wi ben e taki foe a penti di Paulus ben taki foe en na Hebrewsma 3:4, pe a e gi logis reide foe bosroiti taki wan koni mekiman foe ala sani moesoe foe de.” Leisi a tekst baka èn sori go na bladzijde 4 te nanga 9 foe na brochure Gado e broko-ede troetroe nanga wi?, èn go doro pe na fosi pristeri foe joe ben tapoe. Poti na aksi, dan leisi a paragraaf èn gi na ososma okasi foe gi piki tapoe na aksi. Efoe a de praktis, aksi en foe teki en brochure èn loekoe a materiaal makandra.
5 Efoe na a fosi fisiti na ososma ben sori taki a de tevrede, nanga sani na skinfasi noso tra fasi, dan joe kan sori go baka tapoe na traktaat A grontapoe disi sa tan? èn leisi dan san skrifi na bladzijde 6. Aksi na ososma efoe a e angri foe libi na wan moi paradijs grontapoe. Foe jepi joe foe sabi moro fara omeni belangstelling a abi, joe kan aksi en fa a e prakseri foe wan foe den prenki di e gi deki-ati noso froeklari ini wan tijdschrift di joe e gebroiki.
6 A srefi fasi foe bigin taki nanga a sma, joe kan gebroiki na wan artikel di kande joe ben taki foe en ini A Waktitoren noso Ontwaakt! Sori go na a artikel di joe ben meki kon na fesi na joe fosi fisisti èn kari baka dati wan tra moi penti ini a srefi artikel noso wan ini wan tra nomroe di joe abi na joe. Efoe a kan, dan leisi wan tekst makandra èn aksi fa na ososma e prakseri foe dati.
7 Te a sma sori nofo belangstelling, joe kan pristeri wan abonnement. Moro foeroe wi ben sa doe disi, baka te na ososma sori krin krin warderi gi difrenti nomroe foe den tijdschrift.
8 Hori joe marki, foe opo wan bijbelstudie, na prakseri. Foeroetron wi moesoe go wan toe leisi foe meki a belangstelling gro go miti a marki dati. Sori taki joesrefi e broko-ede nanga na ososma foe di joe e go baka so gaw leki a kan.
9 A boen njoensoe di wi e meki bekènti e gi wi foeroe prisiri (Luk. 2:10). Te sma di abi belangstelling e doe boen tapoe den moeiti foe wi, dan disi seiker na wan reide foe prisiri (Fil. 4:1). Meki wi koti den sortoe prisiri disi foe di wi e go baka foe jepi den sma di abi belangstelling èn di wi miti ini velddienst.