Teki prati nanga boen bakapisi na wi diniwroko di e kibri libi
1 Na apostel Paulus ben fiti a pristeri foe en foe a boen njoensoe „so taki a ben kan wini wan toe sma” (1 Kor. 9:19-23). Na a srefi fasi, wi sa abi moro boen bakapisi ini wi diniwroko efoe wi de na ai foe si gi san na ososma abi belangstelling èn sreka foe fiti wi takimakandra na den fanowdoe foe en. Disi no moesoe de moeilek te wi e pristeri A Waktitoren nanga Ontwaakt! noso wan foe wi brochure.
2 Baka te joe taki odi èn joe kari joe nen gi den, dan nanga joe eigi wortoe joe kan bigin foe taki wan sani leki disi:
◼ „Foeroe sma e lasi ati te den e si krinkrin taki grontapoe makti no man foe tjari boen loesoe kon na den problema foe wi ten. Son sma e taki dati na den tirimakti e tjari den problema kon. Joe denki taki wan tiri kan de di man foe sorgoe na wan boen fasi gi ala wi fanowdoe? [Gi okasi foe piki.] Joe sabi taki wi abi wan pramisi, di wi kan froetrow na tapoe, foe wan tirimakti di foe ala ten sa poeroe ala problema di wi e miti?” Arki a piki foe na ososma boen. Tapoe a gron foe san a e taki, joe moesoe de klariklari foe beni go na wan foe den someni difrenti pristeri.
3 Efoe wan sani, ini san na ososma e taki, e sori dati a e taki dati a de wan kresten, dan wi ben sa kan aksi efoe a e begi a „Wi Tata” begi. Efoe a piki positief, wi kan taki a pisi foe a model begi di taki, „Meki joe kownoekondre kon. Meki joe wani pasa, so leki na hemel, so srefi na grontapoe” (Mat. 6:9, 10). Disi e boeweisi taki wan dei sma e go doe a wani foe Jehovah djaso na grontapoe. Joe kan sori go na wan artikel, di fiti, ini A Waktitoren noso Ontwaakt! noso na wan brochure di e go doro tapoe a prakseri disi, so leki bladzijde 3 foe Na Tiri Di Sa Tjari Na Paradijs Kon.
4 Efoe na ososma no e sori bribi ini Gado, dan joe kan sori go tapoe Hebrewsma 3:4 èn dan joe kan soekoe bladzijde 4 foe a brochure Gado e broko-ede troetroe nanga wi? Leisi paragraaf 1 nanga 2 èn poti a aksi di skrifi na ondrosei foe a bladzijde. Noso joe kan abra go tapoe materiaal di fiti, na ini wan njoen tijdschrift.
5 Efoe na ososma e sori taki a de tevrede nanga en nowtoe ini libi, dan joe kan aksi:
◼ „Foe san ede wi moesoe prakseri serjoesoe foe san bijbel e taki foe a tamara foe tirimakti?” Dan wi kan gebroiki den sani di wi e feni ini a Taki-go-taki-kon-boekoe na bladzijde 352 nanga 353 èn wi taki sjatoe foe wán noso moro foe den aiti reide di den gi drape. Efoe na ososma e sori belangstelling, dan gebroiki a traktaat A grontapoe disi sa tan?, foe bigin nanga a fosi paragraaf na bladzijde 2, foe go doro nanga a takimakandra.
6 A fosi fisiti foe joe no sa de boen dorodoro efoe joe no wiki a lostoe foe na ososma gi wan tra fisiti. Foe dati ede, no frigiti foe poti wan aksi di e wiki belangstelling èn pramisi a sma taki joe sa piki na aksi te joe kon baka.
7 Soekoe na ini a materiaal na tapoesei, san joe firi taki a boeen foe taki. Poti den prakseri disi reti meki den fiti na joe gebied. Kon sabi den brochure, traktaat nanga artikel ini den tijdschrift di joe o gebroiki so taki joe kan fiti joe takimakandra esi-esi na den fanowdoe foe na ososma. Meki wi alamala sreka wi pristeri nanga faja „foe a boen njoensoe ede” èn teki prati so fasi nanga boen bakapisi na a diniwroko di e kibri sma libi.—1 Kor. 9:23.