Wroko gebied pe wi wroko foeroetron
1 Wi e prisiri foe kisi raport taki foeroe gemeente e wroko den gebied foeroetron (Mat. 24:14; 1 Tim. 2:3, 4). Ala di disi e tjari wan aparti tjalensi nanga en, ondrofeni e sori taki wi kan basi disi boen efoe wi sreka sani boen na fesi èn de klariklari foe handri difrenti situwâsi di sa opo kon.
2 Den inleiding di abi boen bakapisi na a sroto: A de toemoesi prenspari foe de sreka-sreka foe kan gebroiki wan noso moro inleiding di wi prakseri boen foe den na fesi. Ini den wi moesoe taki krin foe den prenspari reide foe san ede wi e fisiti den sma foeroetron.
3 A Taki-go-taki-kon-boekoe abi foeroe moi eksempre foe inleiding di fiti foe gebroiki. Dri foe den skrifi tapoe bladzijde 15 ondro a titel „Ini gebied di wroko foeroetron”. Oefen den wan di joe ben sa wani foe gebroiki ini joe gebied.
4 Son preikiman e feni boen foe di den e gebroiki sani foe koranti foe den birti foe bigin wan takimakandra ini a gebied di den wroko foeroetron. A Taki-go-taki-kon-boekoe e gi dri eksempre fa foe doe disi. Loekoe a di foe toe inleiding ondro na ondrotitel „Ogridoe/ Sondro kefar” tapoe bladzijde 13 nanga den fosi toe inleiding ondro na ondrotitel „Njoen sani di e pasa” tapoe bladzijde 9 nanga 10.
5 Inleiding di joe e sreka na fesi: No draidrai foe meki èn gebroiki joisti inleiding di de leki den wan ini a Taki-go-taki-kon boekoe. Taki en na joe eigifasi, èn gebroiki joe eigi wortoe. Joe kan oefen den na fesi nanga wan preikiman di abi ondrofeni, bifo joe gebroiki den ini a preikiwroko.
6 Leki eksempre, joe kan taki wan sani leki disi:
◼ „Di wi fisiti joe a lasti tron (taki foe wan sani di pasa no so langa kaba èn di sma ini a libimakandra e taki foe en). Bika a abi krakti tapoe wi alamala na a wan noso tra fasi, meki foeroe foe wi birtisma ben taki fa den e broko den ede serjoesoe. Kande joe toe ben prakseri foe dati. (Wakti pikinso foe gi okasi efoe a sma wani piki.) Te joe e loekoe a grontapoe situwâsi disiten, joe no sa agri nanga san a profeiti Jeremia ben skrifi ini kapitel 10 vers 23?” Baka te joe leisi a tekst, loekoe fa na ososma e piki, dan poti prakseri tapoe wan spesroetoe tekst di e sori fa Jehovah sa loesoe a problema disi di wi e takimakandra foe en.
7 Noso joe kan taki:
◼ „Seiker joe kon sabi nanga a njoensoe foe tide (kari wan spesroetoe sani di pasa). Kande joe sa agri taki dati abi krakti tapoe wi alamala. (Wakti pikinso efoe kande a sma wani gi piki)Wi kan howpoe taki den tiriman o kon nanga wan fasi foe tjari wan loesoe gi wan sjatoe pisi ten; ma bijbel e sori fa a problema sa loesoe foe têgo.” Poti prakseri tapoe wan spesroetoe tekst di e froeklari san Gado o doe.
8 „Foe san ede oenoe e fisiti so foeroetron?” Joisti piki gi sma di wani foe tapoe wan takimakandra, den e gi ini a Taki-go-taki-kon boekoe tapoe bladzijde 20, ondro a titel „Foe san ede joe e fisiti so foeroetron?” Srefi, sondro foe den aksi, wi kan gi wan boen kotoigi, efoe wi e gebroiki ala okasi di e fiti foe jepi trawan foe warderi taki, troe lobi gi Gado nanga gi birtisma e boeweigi wi foe fisiti den so foeroetron leki wi man. Wan takimakandra foe den wortoe foe Jesus ini Joh. 21:15-17 ben sa kan doe toemoesi boen wroko ini a tori disi.
9 Meki wi tan go doro foe teki a tjalensi foe wroko gebied di ben wroko foeroetron te leki Jehovah taki dati a sari. Nanga a fasti bosroiti disi, wi kan de seiker taki en o tjari wi, o kibri wi, èn blèsi wi te na a kaba. — Mat. 28:19, 20.