Yu e gebroiki den na ini a diniwroko?
1. Fa na apostel Paulus nanga Yesus ben e gi sma leri?
1 Na apostel Paulus ben du muiti fu „gebroiki Gado Buku fu overtoigi” sma (Tori. 17:2, 3; 18:19). Na so fasi a ben teki na eksempre fu Yesus, di nofo tron ben e taki sani di skrifi na ini Gado Buku, èn a ben e gebroiki agersitori fu yepi den arkiman fu en fu frustan a wani fu Gado (Mat. 12:1-12). Wi kan du a srefi tu nanga yepi fu a brochure Fa foe bigin èn go doro nanga bijbel takimakandra èn a pisi di nen Tori fu Bijbel di bun fu hori takimakandra (na bakasei fu a Nyun-Grontapuvertaling fu den Kresten Griki Buku fu Bijbel).
2. Fa wi kan gebroiki a brochure fu sreka wisrefi fu bigin takimakandra na wan bun fasi?
2 Sreka wisrefi fu bigin bun takimakandra: Na tapu bladzijde 2-7, fu a brochure Fa foe bigin èn go doro nanga bijbel takimakandra, wi e feni moi sani di wi kan taki na a bigin fu wan takimakandra fu hari sma prakseri. Te yu e leri fa fu bigin wan takimakandra na difrenti fasi, spesrutu efu yu e wroko furu leisi na ini wan kontren, dan dati sa yepi yu fu no taki den srefi sani ibri tron baka, èn na so yu o man bigin takimakandra na wan bun fasi. Yu kan leisi den sani di yu e taki na a bigin, langalanga fu a brochure, te yu e gi kotoigi na telefon.
3. Sortu rai wi e feni na tapu bladzijde 8-16 fu a brochure Fa foe bigin èn go doro nanga bijbel takimakandra?
3 San yu kan du te wan sma e pruberi fu tapu a takimakandra: A ben o bun fu prakseri na fesi san den sma na ini a kontren fu yu kan taki fu tapu a takimakandra. Baka dati, teki wan tu miniti fu luku bladzijde 8-16 fu si fa yu kan piki. A kan de so taki wan tu ososma abi a Buda bribi, a Hindu bribi, a Dyu bribi, noso a Moslim bribi? Efu dati de so, dan den rai di skrifi na tapu bladzijde 12-16 sa de wan yepi gi yu.
4. Fa yu kan gebroiki Tori fu Bijbel di bun fu hori takimakandra fu gi piki tapu aksi noso fu taki fu wan muilek tori?
4 Fa fu piki aksi: Tori fu Bijbel di bun fu hori takimakandra (na bakasei fu a Bijbel) kan yepi wi tu te sma e poti aksi gi wi noso te den wani kon sabi wan muilek tori. Yu kan taigi na ososma nomo taki yu wani sori en wan moi sani di e taki moro fini fu a tori dati èn teki yu Bijbel fu sori en dati. Fu di den tori makriki fu feni, meki yu kan suku den bijbeltekst di yu abi fanowdu na den ondro-edeprakseri pe yu denki taki moro skrifi fu a tori. Baka dati luku den tori di skrifi nanga fatu letter. Yu kan luku sortu bijbeltekst yu kan leisi fu gi piki tapu na aksi fu a sma.
5. San na wan tu tra fasi fa wi kan gebroiki Tori fu Bijbel di bun fu hori takimakandra?
5 Tra fasi fa wi kan gebroiki den: Son preikiman abi wan Bijbel èn sosrefi a brochure Fa foe bigin èn go doro nanga bijbel takimakandra na wrokope, noso na skoro, fu yepi den gi piki tapu aksi soleki: ’Fu san ede yu no e hori fesadei?’ Yu e go luku wan sma di siki noso di lasi wan lobiwan na ini dede? Den rai di skrifi na ondro na edeprakseri „Opobaka” noso „Libi”, kan yepi yu fu trowstu a sma nanga yepi fu Bijbel. Tori fu Bijbel di bun fu hori takimakandra abi sosrefi rai gi den wan di e sreka densrefi gi wan lezing èn gi den brada di e hori preikiwroko konmakandra.
6. San na a marki fu wi te wi e preiki?
6 Te wi e preiki, dan a marki fu wi no de fu haritaki nanga sma, noso fu fruteri sma wan moi tori nomo. Wi wani gebroiki Bijbel na wan bun fasi fu overtoigi sma. Te wi e gebroiki den difrenti sani di meki spesrutu fu yepi wi fu du wi diniwroko na wan bun fasi, dan wi e sori taki wi e tan poti prakseri na a fasi fa wi e gi leri.—1 Tim. 4:16.