Kisi wini foe den poebliki taki di a Genootschap kenki
1 Den e taki na wan soifri fasi foe a disiten historia foe Jehovah Kotoigi so leki fa a skrifi na ini Odo 4:18: „A pasi foe den regtfardikiwan de leki a brenki leti, di e kon krin moro nanga moro, te leki a dei kon de fasti.”
2 Akroederi disi, na a joisti ten a kresten gemeente e tan kisi njoen bodoi di abi foe doe nanga bijbel leri èn di e kon moro krin (Mat. 24:45-47). Kande joe kan froeteri wan toe eksempre foe disi di joe ben si foe sensi joe ben bigin foe abi demakandra nanga Jehovah Kotoigi. Gemeente konmakandra, èn so srefi poebliki taki, e jepi wi foe no tan na baka te a leti foe a waarheid e kon krin moro nanga moro.
3 Schema di a Genootschap kenki: No so langa pasa, a Genootschap kenki wan toe schema foe poebliki taki foe meki den fiti a ten foe wi. Njoen materiaal poti na ini èn prenspari penti kon moro krin. Efoe a gemeente wani kisi wini dorodoro foe den njoen bodoi disi, dan den brada di e hori poebliki taki moesoe gebroiki soso den moro njoen schema.
4 Efoe joe wani kisi a moro bigi wini foe den poebliki taki, dan prakseri na fesi foe den nen foe den taki di den sa hori. Bifo joe e go na a Poebliki konmakandra, proeberi foe memre den moro njoen bodoi di gi ini theokrasia fonten foe a tori. Dan, ala di joe e arki, loekoe go na fesi fa den sa tjari a tori kon na krin. Poti prakseri na tapoe ibri njoen fasi foe pristeri den waarheid disi di joe kan gebroiki ini a ten di e kon. Disi e gi a djaranti taki joe sa kisi a moro bigi wini foe den poebliki taki di a Genootschap kenki.
5 Poebliki taki moesoe gi bodoi èn den moesoe poesoe den arkiman toe foe doe wan sani: Te Jesus ben taki, a ben doro den ati foe en arkiman. Na a kaba foe Jesus en Bergitaki, a moro barinen poebliki taki di oiti ben hori, so leki fa Mateus 7:28 e taki: „A bakapisi ben de taki den ipi sma ben froewondroe foe a fasi fa a e gi leri.”
6 Nanga na eksempre foe Jesus na ini prakseri, den skin foe owroeman moesoe loekoe boen te den e gi njoen poebliki takiman wan okasi foe taki. Soso den brada di de boen leriman, di sa hori densrefi soifri na den schema foe a Genootschap, èn di man meki den arkiman tan poti prakseri na tapoe san den e taki, moesoe kisi na okasi foe hori wan poebliki taki. Brada di kisi a grani foe hori poebliki taki moesoe tan doe moeiti foe kon moro betre ini a fasi fa den e taki, èn den moesoe teki ala rai di den e kisi foe den owroeman.
7 So Leki fa Jesaja 65:13, 14 ben taki na fesi, dan a waka di sani waka boen na jejefasi nanga Gado pipel e tan kon moro krin foe si. A seti foe den poebliki taki na wan foe den foeroe fasi fa wi e „kisi leri foe Jehovah”.—Jes. 54:13.