Jepi den wan di no abi bribi
1 Na ini a njoenmodo ten disi a kon tron wan pôpi sani foe meki sma si joe leki wan sma di kisi leri èn di e denki foe go na fesi. Sma e taki boen foe libisma filosofia nanga leri di gersi anansitori, ala di den e drai den baka gi sani di abi waarde na jejefasi. Serjoesoe sma di abi belangstelling gi makriki troe tori nanga waarheid di joe kan froestan, sa teki na okasi disi foe ondrosoekoe a boekoe Leven—Hoe is het ontstaan? Door evolutie of door schepping? (Libi—Fa a doe kon? Nanga jepi foe evolutie noso foe di Gado meki sani?). A boekoe disi kan jepi den wan di e mankeri bribi (Rom. 1:19, 20). Sorgoe taki joe go baka na ala den wan di sori taki den abi belangstelling.
2 Joe ben sa kan bigin joe takimakandra na a fasi disi:
◼ „Mi de seiker taki joe sabi dati foeroe sma di e gi leri e horibaka gi a bribi taki a libisma famiri ben kon dja nanga jepi foe evolutie. Na evolutie e leri taki ala sani e kon foe ensrefi. San joe e denki foe a sani dati? [Gi okasi foe piki.] Te nanga now den e si a denki disi leki wan theorie. Wan theorie na ’wan speculatie’ noso ’wan denki di boeweisi foe en no de’. Someni jarihondro, sma ben bribi taki grontapoe ben plata; na ini a ten disi wi sabi taki a ben de wan don denki di no ben abi en fondamenti na tapoe troe tori. Disi ben kan de so toe nanga na evolutie theorie?” Leisi den wortoe di skrifi na a bigin foe bladzijde 4, èn dan taki foe Jesaja 42:5.
3 Noso te joe go baka, dan joe ben sa kan taki na a fasi disi:
◼ „Dorodoro wi e miti sma di no e bribi na ini Gado. Wan toe jari pasa, disi no ben pasa someni. Foe san ede joe denki taki someni sma lasi bribi na ini Gado? [Gi okasi foe piki.] Foeroe sma feni taki den lasi bribi foe di ogridoe nanga broeja na ini wi grontapoe e kon takroe moro nanga moro. Den e taki-go-taki-kon na densrefi, taki efoe wan almakti Gado de, dan foe san ede a no e tjari wan kaba kon na ala den pina disi? Den sma di no man feni wan piki na wan satisfaksi fasi tapoe na aksi dati, nofo tron kon tron atheistsma. Ma boen foeroe boeweisi de, taki Gado de èn taki heri esi a sa meki grontapoe kon tron wan presi foe prisiri nanga vrede.” Go doro nanga a takimakandra foe di joe e gebroiki den bijbel prakseri di de na ini paragraaf 19 na tapoe bladzijde 196.
4 Nanga joe bijbel na ini joe anoe, joe ben sa kan bigin a takimakandra foe di joe e taki:
◼ „Wi kon baka na joe foe sori foe san ede wan studie foe bijbel na wan praktis sani gi a ten di wi e libi na ini. Moro foeroe sma abi wan bijbel, ma soso wan toe foe den e teki ten foe leisi en. Son wan e taigi wi krin, taki den no abi foeroe froetrow na ini bijbel moro. San joe e denki foe dati? [Gi okasi foe piki.] Wan foe den sani di e gi wi a boeweisi taki bijbel na a Wortoe foe Gado di skrifi nanga jepi foe a santa jeje, na a kontroe foe den profeititori di de foe feni na ini en.” Sori go na den bijbel tekst na ini paragraaf 6 na tapoe bladzijde 234.
5 A prakseri disi ben sa kan kisi wan boen piki:
◼ „Wi kan si moi nanga froewondroe boeweisi foe a koni na ini den sani lontoe wi na grontapoe. A moi prenki disi di e sori fa son e dongo na wan eksempre di fiti srefisrefi.” Sori a prenki na tapoe bladzijde 12 nanga 13. Taki foe penti foe „Dingen om over na te denken” (Wan toe sani foe poti prakseri na tapoe), èn tjari kon na krin fa a boekoe disi e gi piki na wan satisfaksi fasi tapoe prenspari aksi di abi foe doe nanga wi grontapoe.
6 Wi kan de wan blesi gi trawan, te wi e gebroiki a boekoe disi foe jepi den foe kisi wan steifi gron foe bribi na ini a Mekiman foe den.