Sortoe sma joe moesoe de?

¹ Wan ten foe gi frantiwortoe e kon krosibei gi a heri libisma famiri. Bijbel e kari en „a dei foe Jehovah”. A de a ten pe Gado sa tjari kroetoe strafoe kon na tapoe den ogriwan; a de so srefi wan ten pe a regtfardikiwan sa kisi froeloesoe. Ala sma di de na libi na a ten dati sa moesoe gi frantiwortoe foe a fasi fa den gebroiki den libi. Nanga dati na prakseri, Petrus e kon nanga na aksi di e meki wan sma ondrosoekoe ensrefi: „Sortoe sma joe moesoe de?” A e poti krakti na tapoe o prenspari a de foe ’tjari wisrefi na wan santa fasi èn doe sani di e sori taki wi gi wisrefi na a dini foe Gado, èn a hori di wi e hori boen na prakseri a dei foe Jehovah’, nanga so srefi fa a de fanowdoe foe de ’krin, sondro flaka, èn ini vrede’.​—2 Petr. 3:11-14.

² Tjari wisrefi na wan santa fasi èn den sani di wi e doe di e sori taki wi gi wisrefi na a dini foe Gado: Foe tjari wisrefi na wan santa fasi abi na ini toe, taki wi e doe wroko di de wan eksempre gi tra sma èn e sori taki wi abi lespeki gi den maerkitiki foe bijbel (Tit. 2: 7,8). Wan kresten moesoe wai pasi gi a fasi fa grontapoe sma e tjari densrefi di e kon foe di gridi nanga lostoe foe a skin e boeweigi den.​—Rom. 13:11,14.

³ Den e taki foe „a gi di wan sma e gi ensrefi na a dini foe Gado” leki „a tai di wan sma e tai hori na Gado, foe di en ati di abi dipi warderi gi den toemoesi moi eigifasi foe Gado, boeweigi en foe doe dati”. A faja di wi abi na ini a diniwroko, na wan prenspari fasi fa wi e sori taki wi abi na eigifasi disi. A reide foe san ede wi e preiki de moro leki foe di wi e si en leki wan plekti nomo; a e komoto na wan tranga lobi gi Jehovah (Mark. 12:29, 30). Foe di so wan lobi e boeweigi wi, meki wi e si wi diniwroko leki wan prenspari fasi foe sori taki wi gi wisrefi na a dini foe Gado. Foe di wi moesoe tan gi wisrefi, meki wi moesoe tan abi wan prati na ini a preikiwroko toe. A moesoe de wan prenspari pisi foe wi schema foe den sani di wi e doe ala wiki.​—Hebr. 13:15.

⁴ A hori di wi e hori a dei foe Jehovah „boen na prakseri”, wani taki foe gi en a fosi presi na ini wi prakseri ibri dei, noiti wi no moesoe poti en na ini a background. A wani taki foe poti Kownoekondre afersi na a fosi presi na ini wi libi.​—Mat. 6:33.

⁵ Krin, sondro flaka, èn na ini vrede: Leki wan pisi foe a bigi ipi, wi ’wasi den langa krosi foe wi èn meki den kon weti na ini a broedoe foe a Pikin Skapoe’ (Openb. 7:14). Foe de „krin” wani taki dan, taki wi moesoe loekoe boen, so taki den krin libi foe wi di wi ben gi abra, no kon doti nanga den sani foe grontapoe di no de soifri. Wi e hori wisrefi „sondro flaka”, foe di wi e weigri foe meki a feti na baka materia sani di no e kon foe Gado, kenki den kresten persoonlijkhèit foe wi (Jak. 1:27; 1 Joh. 2:15-17). Wi e sori taki wi e libi „na ini vrede” foe di wi e sori „a vrede foe Gado” na ini ala wi fasi foe handri nanga trawan.​—Fil. 4:7; Rom. 12:18; 14:19.

⁶ Efoe a e waka boen nanga wi, te wi e loekoe boen foe grontapoe no doti wi, dan noiti wi no sa „meki a seti foe sani disi” di Jehovah kroetoe, „seti wi leki fa a wani”. Na presi foe dati, den toemoesi boen wroko foe wi sa jepi trawan foe si a difrenti „na mindri foe wan sma di e dini Gado nanga wan sma di no e dini en”.​—Rom. 12:2; Mal. 3:18.

⁷ Moro foeroe foe wi ben fisiti a „Prisiri Prèiseman” distriktkongres, èn a no de foe taki dati a njanjan na jejefasi di ben kowroe wi ati, e meki na angri foe wi foe sori taki wi gi wisrefi na a dini foe Gado, kon moro tranga. Foeroe njoenwan abi na angri disi toe. Wi kan de wan blesi gi den, te wi e jepi den foe abi wan prati na a velddienst na ini augustus.

⁸ A nen foe Jehovah e kon moro bigi, a gemeente e kon moro tranga, èn trawan e kisi wini te wi e tan doe „toemoesi boen wroko” na wan serjoesoe fasi (1 Petr. 2:12). Meki a de so taki wi de a sortoe sma dati alaten.