’Tan sondro flaka, sondro doti, èn ini vréde’
„Doe ala joe moeiti foe den feni joe te foe kaba sondro flaka èn sondro doti èn ini vréde.” — 1 PETRUS 3:14.
1, 2. San na santafasi?
JEHOVAH GADO de santa. En Manpikin Jezus Kristus, ben taki foe en ini begi leki „Santa Tata” (Johannes 17:1, 11). Èn foe den jeje mekisani na ini hemel den e taki dati den e bari taki: „Santa, santa, santa Jehovah foe den legre de” (Jesaja 6:3). Ma san na santafasi?
2 Den wortoe „santa” nanga „santafasi” di poeroe komoto foe den Hebrew wortoe di a roetoe foe en wani taki kande „krin, njoen, fris sondro flaka ofoe krin”. Na ini den Santa Boekoe den e gebroiki den wortoe disi moro foeroe na ini moreel ofoe jejefasi. Na Hebrewtongo biginbigin ben tjari na prakseri kon ooktoe na fesi foe poti joesrefi aparti, de joe wawan, ofoe santafasi gi na santa Gado, Jehovah. Na ini den Kristen Griki Boekoe den wortoe di vertaal nanga „santa” nanga „santafasi” e sori ooktoe na tapoe a poti di wan sma poti ensrefi aparti gi Gado. Den e tjari den wortoe disi ooktoe na tapoe santafasi leki wan égifasi foe Jehovah, èn ooktoe na tapoe soifrifasi ofoe volmaaktifasi na ini wan sma persoonlek libi nanga waka. Santafasi wani taki soboen krinfasi, soifrifasi èn wan toestand pe wan sma de santa.
Den e aksi santafasi foe Jehovah pipel
3. Foe san-ede Jehovah moesoe kisi, krin anbegi?
3 San den e bedoel dan nanga a ferklari di komoto foe hemel: „Santa, santa, santa Jehovah Gado na Almaktiwan de”? (Openbaring 4:8). Wel, den wortoe disi e ferteri foe santafasi, krinfasi foe Jehovah Gado na ini a moro hé narki di de! Foe dat’ede meki Jehovah, „na Moro Santawan”, moe kisi krin anbegi (Odo 9:10). Foe dat’ede Jehovah Gado ben komanderi na proféti Mozes foe taigi den Israëlsma san e kon now: „Oen moe sori taki joe do santa, bika mi, Jehovah, oen Gado, de santa.” — Leviticus 19:1, 2.
4. Fa wawan wi kan dini Jehovah tapoe wan fasi di a e teki?
4 Ibriwan sma di e taki dati a e doe dienst gi Jehovah di ai teki, aladi ai doe sani di no krin, de wan tegoe sani ini en ai, bikasi wan sma kan dini en soso na tapoe wan fasi di ai teki, te wan sma e doe disi nanga koni foe Gado èn ini santafasi (Odo 20:25; 21:27). Di Gado ben taki a fesi dati a ben sa meki a pasi kon krin gi a pipel foe en di ben de na ini katibo, sodati den ben sa kan drai komoto foe Babylon go na ini Jeruzalem a ben taki foe dat’ede: „Na pasi foe santafasi den sa kari dati. Na sma di no krin no sa waka psa en” (Jesaja 35:8). Na fikapisi di ben drai baka ini 537 bifo G.T. ben doe disi nanga santa bewégi foe ati nanga na marki foe meki na troe anbegi foe „na Moro Santawan” kon boen baka. Èn den Israëlsma ben kan sori dati den de santa te den ben e gi jesi na Gado. Ma den ben misi te joe loekoe en foe en sé foe tan santa, sondro flaka. — Teki gersi nanga Jakobus 1:27.
5. Fa Paulus ben sori dati den jeje Israëlsma moesoe anbegi Jehovah ini santafasi?
5 Den jeje Israëlsma, ofoe den salfoe kristen moe begi Jehovah ooktoe na ini santafasi (Galacia 6:16). Na ini a pis tori disi na apostel Paulus begi kompe-bribiman tranga ’foe pristeri den skin leki wan ofrandi di de na libi, di de santa èn di switi na Gado’. Foe kan doe disi dan den bribi sma disi ben moe kon sabi séker dati den ben e doe a wani foe Gado, bikasi ai taki disi moro fara: „No gersi moro langa na seti foe sani disi ma kon kenki foedi joe e kenki joe jeje, sodati joe kan sabi séker san de na boen èn switi èn volmaakti wani foe Gado.” — Romeini 12:1, 2.
6. Foe san ala kristensma moe kibri densrefi?
6 Na ini a ten disi foe gro dan foeroe njoen sma e hari go na ini Jehovah organisaatsi. Ooktoe den e anbegi Jehovah ini santafasi. Fa ai meki den kolokoe foe abi na ferwakti a den fesi foe pasa libilibi na „bigi benawtoe” èn foe prisiri na ini Gado regtvaardiki èn njoen seti na ini tégo libi tapoe wan paradijs grontapoe! (Mattéus 24:21; Lukas 23:43) Ma efoe den sma di abi wan hemel howpoe èn na „bigi ipi” foe sma di abi grontapoe ferwakti wani prisiri na ini tego libi, dan den moe loekoe boen nanga gwenti di kan doti den ofoe san a kan de ooktoe di de kontrari na bijbel moraal nanga leri. — Openbaring 7:9, 14.
7. San Petrus ben taki di e poti krakti na tapoe na fanowdoe foe de wan eksempre „ini santafasi foe doe”?
7 Na apostel Petrus ben sori na tapoe wi ten di a ben skrifi: „A dé foe Jehovah sa kon leki wan foefoeroeman, pe den hemel [grontapoe tiri] nanga wan babari sa pasa gwe, bika den elementi [grontapoefasi, nanga pasi], sa kon faja srefsrefi, èn sa kon loesoe, èn na grontapoe, [na libisma maatschappij di kon de vreemd foe Gado] nanga den wroko di de a tapoe, sa tjari kon na krin” èn sa sori dati den de sani di leki „den hemel” èn „den elementi” kan bron na ini na „faja” foe Jehovah dé di e pori sani. Petrus e taki foe dat’ede moro fara: „Foedi ala den sani disi sa loesoe a tapoe sowan fasi, dan sortoe sma oen moe de, dan na ini santafasi foe libi èn doe foe gi oensrefi krinkrin na a dini foe Gado, e ferwakti èn hori boen na ini prakseri na de-noja foe na dé foe Jehovah, te den hemel sa bron kon loesoe èn den elementi, kon faja srefsrefi sa smelter!” Ija, ala kotoigi foe Jehovah moe de wan eksempre na „ini santafasi foe, libi”. Èn den sma di e kibri na santafasi foe den, kan ferwakti foe go na wan boen presi na ini Gado regtvaardiki ’njoen hemel nanga njoen grontapoe’ (2 Petrus 3:7, 10-13). Fa disi de wan blesi ferwakti na wi fesi!
8. San wan kristen moesoe doe efoe a wai komoto foe na pasi foe santafasi?
8 Fa a de nanga wan kristen te wan pisten a go boen nanga en na ini a dienst foe Jehovah ma bakaten a e kweki gwenti di no de krin ofoe e handri kontrari na bijbelleri ofoe moraal? Dan a wai komoto foe na pasi foe santafasi èn a moe sori opregti berow èn doe joisti sani di kan meki a kon boen baka. Paulus ben taki foe disi gi kompe salfoewan: „Foedi wi abi den pramisi disi oen lobiwan, meki wi krin wisrefi foe ala no-krinfasi foe skin èn jeje, èn ini na frede foe Gado tjari santafasi kon de volmaakti” (2 Korinte 7:1). Ibri kristen di moe kenki en tranga ede libifasi, sa ondrofeni dati a bijbel rai di e kon foe lobi opziener e tjari foeroe blesi kon. — Odo 28:13; Jakobus 5:13-20.
9. Sortoe aksi e kon na fesi te wi loekoe 2 Petrus 3:14?
9 Bakadi Petrus ben sori na tapoe a regtvaardiki njoen seti foe sani, a ben taki moro fara: „Oen lobiwan, foedi oenoe e ferwakti den sani disi, doe ala oen moeiti foe den [Jehovah Gado] feni oenoe te foe kaba sondro flaka èn sondro doti èn na ini vréde” (2 Petrus 3:14). Den wortoe disi ben taki gi salfoe kristen, ma te joe loekoe en boen dan ala kotoigi foe Jehovah den ’moe feni sondro flaka, sondro doti èn ini vréde’. So boen, san wi moe doe?
„Sondro flaka èn sondro doti”
10. Fa den memre foe na „bigi ipi” ben meki den „krosi” kon krin na ini Jezus broedoe?
10 Wi moesoe doe ala wi moeiti foe den feni oenoe „sondro flaka èn sondro doti”. Den memre foe na „bigi ipi” ben „wasi den langa krosi foe den èn ben meki den kon weti na ini a broedoe foe na Lam”. Wan dé den ben de wan pisi foe na sondoe grontapoe disi èn den krosi di ben meki sma kon sabi den ben fisti èn den ben doti na ini na ai foe Jehovah. Fa den ben meki den krosi kon de weti fanfan na ini „broedoe foe na Lam”, Jezus Kristus? Foedi na ini publiki den sori a bribi foe den dati ’pardon no e gi efoe broedoe no e lon’ èn dati Jezus „de a Lam foe Gado, di e teki na sondoe foe grontapoe gowe” (Openbaring 7:9, 14; Hebrewsma 9:22; Johannes 1:29, 36). Disi den ben doe foedi sondro wan kondisi den ben gi den libi abra na Gado èn ben symboliseer na gi di den gi densrefi abra nanga jepi foe na dopoe, wan go na ondro watra krinkrin. Sowan gi di den gi densrefi abra na Gado ben moe psa nanga jepi foe Jezus Kristus èn nanga na overtoigi dati na broedoe di ben lon e meki a de mogelek gi Gado foe pardon den sondoe foe den èn meki den kon de sma di ini En ai a kan teki den.
11. Na ini sortoe toestand wi moe tan foe di na vréde foe wi nanga Jehovah e kon broeja nanga sondoe?
11 Den memre foe na „bigi ipi” moe tan hori den „krosi” foe den weti foe di a no e kon kisi flaka nanga grontapoe fasi, sodati den ben sa lasi na kristensma di den moe de èn a sabi di ala sma moesoe kon sabi den leki kotoigi di Jehovah e feni boen. Ija, ala troe kristen moe hori ensrefi farawe foe den kon doti na a fasi èn na denki èn na libifasi foe na grontapoe. Foedi na vréde foe wi nanga Jehovah e kon broeja nanga na sondoe, dan den kan feni wi boen te a „bigi dé foe Jehovah” sa kon soso na ini vréde, efoe wi tan ini wan toestand pe den sondoe foe oenoe kan verzoen. Flaka no moe de na wi leki wan bakapisi foe falsi kerki doe ofoe foe na hoeroedoe foe na grontapoe disi
12. Fa wi kan tjari 2 Petrus 2:13 srefi kon na tapoe situwasi di kan sori den srefi na ini na kristen gemeente?
12 Foe de sondro flaka èn sondro doti, dan wan libi nanga waka èn doe de fanowdoe di de kontrari di foe „falsi letiman”, foe soema Petrus ben skrifi: „Den e si wan goedoeman libi na déten leki wan prisiri. Den de flaka nanga doti, e gi densrefi abra na den bidrigi leri foe den na ini prisiri di no skotoe aladi den e njan-pré nanga oenoe makandra!” (2 Petrus 2:1, 13). Ija srefi na inisé na kristen gemeente wi moe loekoe boen foe falsi leriman di „e si wan goedoeman libi na déten leki wan prisiri”. Na déten, te someni sani kan doe gi na jeje boen foe trawan dan sma di no abi jejefasi, e hori densrefi kande bezig nanga ogridoe, makandra nanga werdri fesaprisiri èn njan èn dringi pasa marki. Kande den sa proberi foe kenki prisiri demakandra soleki trowoso kon ini okasi di abi na marki foe pokoe di e wiki lostoe, fisti dansi njan pasamarki èn dringi sopi pasamarki. Den sortoe sani disi no moe kisi pasi foe de a mindri Jehovah pipel. — Jesaja 5:11, 12; loekoe Na Wachttoren, 15 juli 1984, blz. 1-6.
13. San na sma di orga wan fesa kan doe sodati wan prisiri demakandra kan de wan sani di e bow trawan na jejefasi?
13 Na sma di kari sma kon foe fisiti wan prisiri demakandra de frantwortoe foe san e psa drape. Foe meki na okasi de wan okasi di e bow a bribi foe sma, a de wan boen sani foe loekoe dati disi kan hori na ini anoe te joe loekoe a bigi foe en èn dati nowan sma kisi kari foe kon di kande séker wan krakti sa komoto foe en di no de gesontoe. Soleki den wortoe foe Paulus na ini 2 Timotéus 2:20-22 e sori, dan a no ala sma di moksi densrefi nanga wan gemeente de kompe di joe sa wani foe de nanga den. Foe dat’ede wan sma di e orga wan fesa no de ferplekti foe kari sma kon, di ala sma sabi den leki sma di no e dwengi den tongo ofoe di abi na gwenti foe njan èn dringi pasa marki. A e hori na ini prakseri taki ’wi, efoe wi e njan ofoe e dringi ofoe wi e doe wan tra sani, moe doe ala sani foe Gado kisi biginen’. — 1 Korinti 10:31.
14. Sortoe bosroiti wi moe teki na ini a tori foe falsi leriman?
14 Soso wantoe de ’flaka nanga doti, di e gi densrefi abra na bidrigi leri ini prisiri’ te den de na ini wi kompani. Ma opziener nanga trawan na ini na gemeente moe de nanga ai èn trowe na wan kraktifasi falsi leriman di kande na wan kibrifasi e boro kon ini a gemeente na ini wan moeiti foe meki hoeroedoe ofoe falsi leri go na fesi (Judas 3, 4). Soso te wi hori na den regtvaardiki markitiki foe Gado sondro foe beni, a sa kan foe hori na gemeente sondro flaka èn sondro doti.
San de fanowdoe foe de „ini vréde”?
15. (a) Fa wan sma kan kisi vréde nanga Gado? (b) Fa wi moe doe foe den feni wi boen na „ini vréde” na a ten foe na kon foe Jehovah bigi dé?
15 Foe den feni den na ini „vréde”, dan Jehovah pipel moe hori vréde nanga en (2 Petrus 3:14). Wi kan prisiri na ini na positsi disi tangi foe Jezus Kristus, foe soema Paulus ben skrifi: „Gado ben feni boen foe meki na heri foeroefasi de na ini en èn nanga jepi foe en foe verzoen ala tra sani baka nanga en foedi ai meki vréde nanga jepi foe na broedoe di a ben meki lon na a pina-oedoe, awinsi a de den sani na grontapoe ofoe di ini hemel” (Kolosse 1:19, 20). Bigi sondoe e doe ogri na a matifasi foe wan sma nanga Jehovah èn e abi leki bakapisi dati a sma foe wan konsensi di e trobi en na inisé de ini broeja, aladi vréde de na goedoe foe den sma di e hori densrefi na den gebod foe Gado (Psalm 38:3; Jesaja 48:18). Foe den kan feni wi na „ini vréde” te na bigi dé foe Jehovah kon, dan wi moe tan na ini wan toestand di Gado e feni boen èn pe a de mogelek dati wi sondoe kon verzoen nanga na broedoe di Jezus ben meki lon na a pina oedoe.
16. Leki fa na apostel Paulus taki, dan fa wi kan feti na baka vréde nanga kompe-bribiman?
16 Wi moe de ooktoe na ini vréde nanga tra anbegiman foe Jehovah. Paulus ben gi na dek’ati: „Meki wi feti na baka den sani di e meki na vréde go na fesi èn den sani di e dini leki a bow foe makandra na ini bribi.” Na kontekst e meki wi si dati wi moe loekoe boen foe no meki kompe-bribiman naki foetoe ini a tori foe njanjan, dringi ofoe sortoe sani a de ooktoe (Romeini 14:13-23). Ma moro de ini a tori, bika Paulus ben taki foe den kristensma ini Efese: „Mi e begi oenoe tranga foe sori dati oen de a kari nanga san a ben kari oenoe warti, nanga sakafasi foe jeje nanga safrifasi nanga langa pasensi dorodoro, e ferdrage makandra ini lobi, e feti sondro foe spotoe foe kibri a wanfasi foe jeje na ini na banti foe vréde di e tjari sani kon na wan” (Efese 4:1-3). Séker wi ben sa wani sori na wanfasi foe wi foe di wi e tan farawe foe wortoe nanga doe di e broeja na vréde èn teki wan krakti bosroiti foe de sma di e hori baka gi na soevereiniteit foe Jehovah.
17. San de leki fa 1 Petrus 3:10-12 taki na ini a „soekoe foe vréde”?
17 Foe ’soekoe vréde’, dan séker wi moe de voorzichtig ini a tori foe wi doe nanga wi wortoe, bika na apostel Petrus ben skrifi: „A sma di lobi a libi èn wani si boen dé, moe dwengi en tongoe foe san de ogri èn en mofoboeba foe a taki foe bidrigifasi, ma meki a drai ensrefi foe na takroe èn doe san de boen; meki a soekoe vréde èn feti na dati baka. Bika den ai foe Jehovah de na tapoe den regtvaardikiwan èn den jesi foe en na na begi foe den; ma na fesi foe Jehovah de kontrari den di e doe takroe sani” (1 Petrus 3:10-12; Psalm 34:12-16). Jehovah loyaal dienstknegti moe go soboen doro tapoe difrentifasi „foe soekoe vréde” foe den kan feni den boen na „ini vréde”.
Fertrow na tapoe na jepi foe Jehovah
18. San wi kan doe efoe na fasi, denki nanga libifasi foe na grontapoe disi abi krakti tapoe wi foe hari wi kon na en?
18 Petrus ben ferteri dati den „elementi” — na grontapoe geest ofoe grontapoe fasi nanga pasi — sa „kon loesoe” ofoe kisi pori na ini Jehovah dé (2 Petrus 3:7, 10). Ma san wi kan doe efoe na fasi, na denki èn na libifasi foe na grontapoe e abi wan krakti na tapoe wi di e hari wi e kon na en? Séker wi moe njan boen dorodoro foe den jeje sani di seti nanga jepi foe Jehovah organisaatsi. Na so wi moesoe studeri Gado Wortoe èn den boekoe di na „getrow èn koni srafoe” e gi (Mattéus 24:45-47). Ooktoe wi moe sori taki wi de tan grantangi gi na seti foe na ferloesoe paiman, Jezus ’diri broedoe, di de leki di foe wan lam di no abi flaka èn di no abi doti’. — 1 Petrus 1:18, 19.
19. Fa begi kan de wan boen sani te grontapoe-fasi abi krakti tapoe wi?
19 Wi moe aksi Gado foe jepi wi te e ’feti na baka regtvaardikifasi’ (1 Timotéus 6:11-14). Efoe wi e ferstan dati grontapoefasi abi krakti tapoe wi ofoe efoe wan lobi kompebribiman tjari disi kon na wi prakseri, dan a ben sa de boen foe ferteri foe a problema disi spesroetoe na ini wi begi èn foe aksi Jehovah foe jepi wi foe wini den firi disi. A ben sa de séker wan sani di fiti foe aksi Gado foe gi wi en jeje èn foe jepi wi, foe kweki na ini wi libi den froktoe foe en jeje, di de so difrenti foe den grontapoe fasi nanga pasi (Galacia 5:16-23; Psalm 25:4, 5; 119:27, 35). Jehovah kan jepi wi foe poti wi prakseri na tapoe regtvaardiki, krin, boen èn warti sani. èn fa a de wan sani di fiti foe seni opregti begi go na en, sodati na „vréde foe Gado” di no de foe teki gersi nanga nowan sani sa kibri wi ati nanga wi jeje krakti! (Filippi 4:6, 7). Dan sorgoe, tesi nanga den sortoe sani disi no sa doro na punt dati den sa wini wi. Na a tra sé wi libi sa abi na marki foe wan rostoe di komoto foe Gado. Ija, „vréde pasamarki de foe den di lobi [Jehovah]”. — Psalm 119:165.
Tan ’sondro flaka, sondro doti, èn ini vréde’
20. Foe san-ede wi kan taki dati a kan foe de ini wan jeje toestand sondro flaka?
20 Kolokoe dati ala sma na ini Jehovah organisaatsi Gado e feni boen makandra nanga den njoen sma di e kon now na ini (Tori foe den Apostel 10:34, 35). Nanga a jepi foe Jehovah a kan ’foe poti godelowsoefasi nanga grontapoe lostoe farawe’ èn foe libi soleki disi fiti troe kristensma (Titus 2:11-14). Aladi wan dé wi ben de leki wan vreemde sma gi Jehovah èn wi jeje ben de tapoe takroe wroko, tokoe wi ben kon de verzoen nanga Gado nanga jepi foe na dede foe Jezus. Na a fasi disi a kan foe de na ini wan jeje toestand sondro flaka, efoe wi e tan ini a bribi èn wi no e gi pasi dati den poeroe wi foe na howpoe foe na boen njoensoe. — Kolosse 1:21-23.
21. Fa wi kan de sma di den feni te foe kaba boen „sondro flaka, sondro doti, èn ini vréde”?
21 Nanga Jehovah, en Wortoe nanga en organisaatsi wi kan tan sondro flaka foe na grontapoe, sondro foe kisi doti nanga na fasi, denki nanga libifasi foe en. Na sofasi ooktoe troe vréde kan de wan pisi foe wi. Ija, te wi e horidoro na ini na santa anbegi foe wi foe Jehovah dan te foe kaba den kan feni wi ’sondro flaka, sondro doti èn ini vréde’.
Fa joe ben sa piki?
◻ Foe san-ede den e aksi santafasi foe a pipel foe Jehovah?
◻ Fa wi kan tan sondro flaka èn sondro doti?
◻ San den e aksi foe de na „ini vréde”?
◻ Na sortoe fasi wi kan sori dati wi e anga foe a jepi foe Jehovah?
[Prenki na tapoe bladzijde 6, 7]
Wantoe sani foe kan de sondro flaka, sondro doti èn ini vréde
Gi joesrefi na ini a dini foe Gado nanga joe heri ati
Kweki den kresten égifasi di wi moe abi
Demakandra a jejefasi di e bow na bribi
Soekoe vréde nanga Gado nanga jepi foe begi