Joe ai de „soifri”?

„Te joe ai de dan soifri, dan joe heri skin sa de krin.” — MATTÉUS 6:22.

1. Foe san-ede wi kan taki dati na ai de wan wondroe foe a meki foe sani nanga wan ferstan?

SMA e si ini algemeen den ai di wi e si nanga den leki a moro diri nanga a moro prenspari sani di de — spesroetoe den sma di no e si moro. Koniman e ferteri oenoe dati ibri seconde tin biljoen pisi foe a leti e psa den popki foe a ai foe wi. Te den doro na netvlies, dan hondro miljoen cel, den sokari pikin tiki nanga lontoelontoe sani, e teki den. Den senwe cel disi, di kisi wan poesoe nanga a leti, e bigin seni elektrik marki go na den ede tonton. Drape wan boen bigi pisi foe den hondro miljard neuronen e bigin wroko foe kon sabi krin na sani di den ben kisi djonsro èn fa den moesoe doe nanga en. A sani disi e feni presi ini soso wan pikin pisi foe wan seconde. Ija, na ai de wan eksempre di e gi joe frede foe na wondroe foe a meki foe sani di kon foe wan ferstan. — Psalm 139:14.

2. Sortoe sani foe den ai di e si sani e tan gi koniman te leki now ete wan lai-tori?

² Aladi koniman sabi boen foeroe foe na biologis wroko foe na ai nanga den ede tonton, tokoe den sabi pikinso foe na fa èn na foe san-ede wi e doe sani tapoe san wi e si. Den no e ferstan foe eksempre krinkrin fa wan sma lobi redi moro leki blaw aladi na tra sma e teki blaw moro esi leki redi, ofoe foe san-ede difrenti kloroe e abi difrenti krakti tapoe oenoe. Na kroederi di de na mindri a si foe wan sani èn fa wi e teki en e tan wan lai tori. Jehovah, na Mekiman foe na ai, èn en Manpikin nanga kompewrokoman Jezus Kristus, sabi heri boen na dangra bow foe na letterlek ai, èn en sabi fa na ai e abi krakti na tapoe oen doe èn na tapoe oen libi.

„Na lampoe foe na skin”

3. Fa na ai de „na lampoe foe na skin”?

³ Jezus ben taki dati ’Na lampoe foe na skin de na ai’ (Mattéus 6:22). Sma e gebroiki wan lampoe foe meki wan doengroe presi kon krin, sodati wi sabi pe wi de, fa wi moe handri, na sortoe sé wi moe go, nanga so moro fara. Te wi e meki leti kon na inisé foe wi skin, dan den ai foe wi e doe asrefi wroko leki wan lampoe. Den e jepi wi foe de ini krosbé kontakti nanga na grontapoe lontoe wi èn foe doe sani tapoe wan ferstan èn aparti fasi tapoe disi na presi dati wi e firfir, naki foetoe fadon èn kande gi oen skin skinati.

4. Sortoe krakti na kondisi foe na ai abi na tapoe wi?

⁴ Ma o fara na ai kan dini leki wan lampoe gi na skin e hanga moro foeroe foe na kondisi foe na ai. Foe dat’ede Jezus ben taki moro fara: „Te dan joe ai de soifri, den joe heri skin sa de krin; ma te joe ai de ogri, dan joe heri skin sa doengroe. Efoe na leti di de na ini joe, de troetroe doengroe, o bigi na doengroe dati de dan!” (Mattéus 6:22, 23) Foe disi wi kan leri sortoe bigi krakti na ai abi tapoe na heri waka nanga libi foe wi, foe na boen ofoe foe na ogri foe wi.

Na krakti foe na ai

5. Na ini o fara na ai ben abi foe doe nanga na kori di Satan ben tjari kon tapoe Eva?

⁵ Meki wi go loekoe na geval foe na fosi oema Eva pikinso. Na o fara na ai ben abi krakti tapoe en doe, e kon a krin na ini a tori di a bijbel e gi foe na miti di a ben miti nanga na koriman, Satan, na Didibri (2 Korinte 11:3; 1 Timotéus 2:14). Satan ben taki dati ’en ai séker ben sa kon opo’ efoe a ben poti a gebod foe Gado gewoon a wansé èn ben sa teki na froktoe foe „na bon foe boen nanga ogri” èn ben sa njan dati. Fa a ben doe tapoe disi? A bijbel e ferteri wi: „Leki wan bakapisi foe dati na oema ben si dati na bon ben boen leki njanjan èn dati a ben de wan sani pe na lostoe foe den ai ben go na en, ija na bon ben de wan sani di joe kan loekoe nanga angri na en.” A ben gi pasi dati na ai foe en ben tan loekoe wan sani di no ben mag gi en. Na a fasi dati a ben gebroiki en ai foe espresi a tapoe wan fowtoefasi. San ben de a bakapisi? „A ben teki dan foe en froktoe èn ben njan.” — Genesis 2:17; 3:4-6.

6. Fa na ai abi akti na tapoe den doe foe wi?

⁶ A no de foe taki, dati disi no ben de a fositron, di Eva ben si „na bon foe sabi boen nanga ogri” ofoe a froktoe foe en. Ma now wan tra sani ben psa. A tron disi a bon ben gersi „wan sani . . . pe na lostoe foe den ai ben e go na en” èn a ben de „wan sani foe loekoe nanga angri na en”. Lostoe nanga angri de te joe loekoe en boen no den égifasi foe na ai, ma foe na ati. Ma nanga san a ai a si, den lostoe nanga na angri foe na ati e kon so tranga dati disi kan tjari wan sma go doe wan sani. Na ini a tori foe Eva den doe disi no ben abi wawan wan takroe bakapisi gi ensrefi nanga en man, Adam, ma ooktoe gi ala den bakapikin foe en di boo kon ete, pe wi na ini a ten disi de na ini toe. — Romeini 5:12; Jakobus 1:14, 15.

7. Fa na ai ben abi foe doe na ini na di foe dri moeiti foe Satan foe kori Jezus, èn san ben de na bakapisi?

⁷ Ma leki bewijsi dati a kan foe kakafoetoe gi ibri krakti di e tjari oen go ini ogri èn di ben sa kan doro na wi nanga jepi foe na ai, dan wi ben sa kan loekoe na eksempre foe Jezus Kristus. Agen na srefi Koriman, Satan, ben de ini a tori. Na ini a di foe dri moeiti di a ben doe foe poeroe Jezus foe doe a wani foe Gado, „Didibri ben teki en go na wan toemsi hé bergi, èn a ben sori en ala kownoekondre foe grontapoe nanga na glori foe den”. Loekoe pikinso dati Satan no wawan nanga mofo ben pristeri Jezus ala makti èn glori foe a grontapoe na ini a presi foe wan doe foe anbegi. A „ben sori en” den sani disi, èn a ben wroko boen nanga a bigi krakti foe na ai. Ma foedi na moi pristeri no ben poeroe na ai foe Jezus tapoe san a ben poti na en fesi ma en ai ben de srapoe na tapoe en matifasi nanga en hemel Tata, Jehovah, meki Jezus ben man foe meki na triki foe Satan tron noti. — Mattéus 4:8-10.

8. San wi kan leri foe na eksempre foe Eva èn di foe Jezus?

⁸ San wi kan leri foe den eksempre di kari dja na tapsé? Na ini a fosi presi, dati a sani tapoe san wi e poti oen ai, kan tranga den boen ofoe takroe lostoe foe wi ati. Disi kan tjari wan libifasi kon di sa tjari blesi ofoe rampoe kon tapoe wisrefi èn trasma. Na ini a di foe toe presi a de krin dati Satan e kori nanga ala prisiri den sma di a wani kisi foedi a e wroko tapoe den ai. Foe ala den methode di Satan e gebroiki foe kori libisma, a gersi dati den wan di e kon a tapoe a ai de wan foe den moro boenwan di e doro en marki. — 2 Korinte 2:11.

9. Fa Satan e meki „a lostoe foe den ai” go a fesi na ini a ten disi?

⁹ Ini a ten disi Satan e meki gebroiki te now ete foe na srefi taktik ini den ogri plan foe en foe poeroe libisma na ini a doe foe a wani foe Gado. Nanga jepi foe den moimoi èn brenki sani foe na grontapoe di no abi waarde, Satan e meki „na lostoe foe na skin èn na lostoe foe den ai èn na meki bigi nanga den sani di wan sma abi foe tan a libi” go na fesi (1 Johannes 2:16). Disi e kon krin a fesi foe den reclama di na bisnis grontapoe e gebroiki. A no de so dati reclama pe den e gebroiki na ei foe sma foe si sani boen, e waka moro boen? Den doesoendoesoen moi kloroe prenki nanga reclama nanga moi faja, den prenki di druk na tapoe redi papira na ini tijdschrift èn reclama koranti èn den toemsi moi televisi spot — èn ooktoe den miljard koloe di e gebroiki foe meki den — e kotoigi alamala dati reclama abi krinkrin a marki „foe wiki a lostoe foe den ai” foe na baiman.

10. San na bisnis grontapoe e meki go na fesi troetroe?

¹⁰ Aladi foeroe foe den reclama boskopoe disi kande no e libi foeroe gi joe abra foe sabi san den wani taki, tokoe wan moro fini krakti de di te joe loekoe en boen den no wawan e meki reclama gi sani foe bai ma ooktoe foe wan libifasi. Nofotron den e sori den artikel leki sani di den moro barinen man, den moro maktiwan den moro kolokoewan èn den wan di na dorosé loekoe moi e gebroiki. Na boskopoe de dati efoe na klanti e gebroiki na sani dati dan en „sani di a abi foe tan na libi” e poti en automatis ini wan foe den groepoe dati. Sma di e meki reclama sabi dati te wan sma teki wan bepaalde fasi foe libi, weiniki sani de fanowdoe foe tjari en go sofara foe teki den sani èn bisnis artikel, di de ini a tori. Ini a pisi tori disi dan a de séker boen foe teki na rai na ini Hebrewsma 13:5 na ati! Wi e lési drape: „Meki joe libifasi de fri foe na lobi foe moni, èn de tevréde nanga den disiten sani.”

Hori na ai „soifri”, no meki a kon „ogri”

11. Tjari kon na krin san den wortoe „soifri” nanga „ogri” wani taki na ini den wortoe di Jezus taki foe na ai?

¹¹ Foedi aladé wi abi foe doe nanga wan lo sani di e switi wi ai èn e kori en, meki wi kan ferstan moro foe san-ede Jezus Kristus ben gi wi tranga foe hori wi ai „soifri” èn no meki a kon „ogri” (Mattéus 6:22, 23). San dati wani taki? „Soifri” de dja na vertaling foe na Griki wortoe ha-plous’, di te joe loekoe en boen wani taki wan jeje di no prati ofoe a gi di wan sma e gi ensrefi na wán enkri marki. „Ogri” na a trasé de na ini na fosfosi Grikitongo po-ne-ros’ èn abi na méne foe takroe, sondro waarde, ogri. Na presi dati na ’soifri ai’ e meki ala san e psa poeroe en poti tapoe wan tra sani ofoe tapoe wan sépasi a e poti en prakseri soso na tapoe wán sani. Kontrari disi dan na ’ogri ai’ de makriki foe poeroe poti na tapoe wan tra sani, de nanga triki èn nanga big’ai; èn degedege èn doengroe sani e hari en kon.

12. Loekoe sjatoe èn ferklari na kontekst foe a takmakandra foe Jezus.

¹² Ma tapoe sortoe sani wi moe hori wi ai sodati ’na heri skin sa de krin’? Te wi go loekoe na kontekst dan wi sa kisi jepi foe kon sabi na piki. Na ini den vers a fesi Jezus ben taki foe „goedoe na grontapoe” èn „goedoe ini hemel”. A ben taki dati ’pe joe goedoe de, na dape ooktoe joe ati sa de’. Bakadi a taki foe na ai, a ben poti krakti agen, fa a de fanowdoe foe sori taki wan sma abi soso wán marki na en fesi foedi a ben taki: „Nowan sma kan dini toe masra,” Gado nanga na goedoe, „leki srafoe.” Na ini den tra vers a ben gi rai foe na fasi fa wan sma moe loekoe na den aladé fanowdoe foe a libi, èn baka dati a ben tapoe nanga na dek’ati: „Tan soekoe dan fosi na kownoekondre nanga en regtvaardikifasi, èn ala den tra sani disi joe sa kisi a tapoe.” — Mattéus 6:19-34.

13. Tapoe san wi moe poti oen ai sodati ’oen heri skin sa de krin’? Foe san-ede?

¹³ San wi kan ferstan foe ala den sani disi? Jezus e taki djaso foe marki di wan sma e poti ini a libi èn e sori na tapoe na sosofasi foe na feti na baka goedoe èn den blesi foe na kweki foe belangstelling gi jeje afersi. A e ferteri wi krin taki efoe wi de poti wi ai soso a tapoe den kownoekondre afersi, wi „heri skin sa de krin”. Foe san-ede? Foedi efoe wi poti a doe foe a wani foe Gado leki a marki foe wi na ini a libi, dan wi sa soekoe foe sori na ini ibri pisi foe wi libi na glori boen njoensoe. Dan no wawan wi kan loekoe na fesi foe na kon foe wan moi tamara, ma wi kan kon fri ooktoe foe den doengroe èn bakabaka sani di e kon foe wan libi di de soso foe feti na baka sani pe wi e prakseri wisrefi nomo. — 2 Korinte 4:1-6.

14. Fa wi kan taki dati a abi leki bakapisi „doengroe” te wan sma poti en ai a tapoe goedoe?

¹⁴ Na apostel Paulus ben poti krakti na den wortoe foe Jezus di a ben tjari kon na krin: „Den sma . . . di teki na bosroiti foe kon goedoe, e fadon go na ini tesi èn wan trapoe èn foeroe soso èn ogri lostoe, di e trowe den sma go na ini pori èn dede” (1 Timotéus 6:9). Den wortoe disi séker wani taki foeroe sani! A njoensoe de foeroe nanga tori foe assamblé man, nanga komsarsi, kroetoebakra, driktoro foe bank, hé-man foe a bisnis libi èn tra sma di den kisi di den ben gi densrefi abra na weti — borki ogridoe, di, soleki wan rapport e taki, soso kaba na ini den Verenigde Staten foe Amerkankondre ’moro pikinso toe hondro miljoen dala’ de ini a tori. Na ’tesi nanga trapoe’ foe kon goedoe, ben kenki foeroe sma di den ben respeki wan dé kon tron abani nanga ogridoeman. Séker wi ben sa wani tan farawe foe fadon go na ini ’pori nanga dede’ èn foe kon na ini „doengroe” di Jezus ben warskow foe en. — Loekoe Odo 23:4, 5.

15, 16. (a) Sortoe tra „lostoe foe den ai” wi moe tan farawe foe en? (b) Fa joe ben kan tjari na rai na ini Odo 27:20 kon a tapoe a takmakandra foe wi?

¹⁵ Ma na soso sma di ben poti den ai na tapoe na kisi foe goedoe, e kan kon na ini a kefar foe waka na ini doengroe? Nono, bika „na lostoe foe den ai” abi foeroe moro na ini en. Tjari Jezus wortoe na ini Mattéus 5:28 kon pikinso na ini prakseri: „Ibriwan sma di e tan loekoe wan oema nanga angri foe en, ben doe soetadoe kaba nanga en na ini en ati.” Na warskow disi séker sa tjari kon ooktoe na tapoe sma di e gi pasi dati en ai e tan loekoe na materiaal di abi leki marki foe tigri ofoe wiki agri nanga lostoe di no mag.

¹⁶ Dan joe abi na brok’ede di abi foe doe nanga njan, dringi, nanga krosi, di Jezus ben taki foe den (Mattéus 6:25-32). Aladi den sani disi de fanowdoe, tokoe wan toemsi bigi lostoe foe abi alaten na laste, na moro diri èn na moro boen sani di ala sma wani, kan tjari wi jeje èn wi ati kon ini katibo (Romeini 16:18; Filipi 3:19). Srefi na ini ontspanning, hobby, sport, bewégi foe na skin, nanga so moro fara joe moe abi wan joisti balans èn loekoe boen dati rages nanga modo foe na grontapoe no hari joe gwe. Ini ala den kontren disi a ben sa boen gi wi foe hori den koni wortoe na ini prakseri di skrifi na ini Odo 27:20: „Sjeool nanga a presi foe pori noiti den bere e foeroe; noiti den ai foe wan libisma abi nofo.” Ija, wi moe dwengi wisrefi, sodati wi no tjari wi jeje libi kon na ini kefar foedi wi e proberi foe meki wi ai njan èn bere foeroe.

Blesi di e kon foedi wi ai „solfri”

17. Fa na hori „soifri” foe na ai ben jepi son sma foe doe den kownoekondre afersi?

¹⁷ Den sma di hori den ai „soifri” èn e poti en leti a tapoe a kownoekondre foe Gado nanga den pramisi, ben kisi foeroe blesi foe Jehovah. Disi e kon na fesi nanga den ondroefenitori foe sma foe ala rang nanga stand na alape na grontapoe. Loekoe pikinso na den eksempre di e ko now:

„Di mi ben e dini na ini Columbia, na ini Zuid-Amerika, pe na fanowdoe ben bigi, mi ben moe libi foe wan pismoni foe sowan $100 ini wan moen. Mi ben bigin nanga pionierwroko, ma na ini a bigin foe a moen mi ben fadon broko mi aifoetoe. Den kostoe di ben kon foe dati foe datrabehandeling ben fadon kon hebi na tapoe na mini di mi ben abi èn pas na a kaba foe a moen mi ben sa kisi moni baka. A ben doro a ten baka foe gi mi bijdrage na a Kownoekondrezaal, ma efoe mi ben sa gi a moni, mi no ben sa abi noti di mi ben sa kan psa a tra moen. Baka di mi go denki na tori wan toe dé langa, mi ben teki a bosroiti foe poti na moni na ini na bijdrage bus, di mi ben sabi dati a joeroe foe na zaal ben moe pai. Na tra mamanten kaba mi ben kisi wan brifi foe wan sisa ini den Verenigde Staten di ben fisiti mi na ini Columbia. Na ini a brifi foe en a ben poti wantoe Columbiaans moni na ini di a ben hori abra foe na fisiti foe en. A ben de precies a moni di mi ben poti na ini na bijdrage bus.”

Tapoe wan waran toedewroko bakadina Ki, di abi na ini Taechun, Korea, wan kliniek ben kisi a kari foe dri kompewrokoman foe go bakadina nanga den na sekanti. Aladi na prakseri ben de wan moi wan foe go, dan Ki ben sabi, dati en, efoe tokoe a ben go, no ben sa de biten baka foe go a neti dati na a gemeente boekoestudie. Foe datmeki a no teki a kari. Wantoe momenti a baka dati den dri ben tjari kon na a kliniek — dede! Den ben kisi wan kefarlek oto-ongolokoe wantewante baka di den ben libi na kliniek. Ki ben sari foe na ongolokoe, ma a ben prisiri dati a ben tan a libi bika a ben hori na a boen gwenti di a ben teki na ini den jari di psa. — Hebr. 10:24, 25.

18. Fa wi kan gi leri na jongoewan foe hori den ai „soifri”?

¹⁸ Srefi jongoesma kan kisi leri dati den moe hori den ai tapoe den kownoekondre afersi, soleki na tra ondrofenitori e tjari kon na krin:

„Di wi ben kisi foe jere foe toe fisitiman dati brada ini dri gemeente tapoe den Filipijnen ben moe tjari $1000 ini wan gemeente kon makandra — wan boen bigi moni gi den foe bow na kownoekondrezaal baka di ben bron, dan a man foe mi nanga mi ben teki a bosroiti foe gi wan bijdrage. Fa a ben de nanga den pikin foe wi foe fo moen te go miti siksi jari? Ibri wiki efoe mi man ben kisi en moni di a ben wroko a ben bai gi ibri pikin wan solfroe dala. Mi man ben prati den moni, sodati ibri pikin kan si omeni a ben abi. Wi ben taki ooktoe foe wantoe sani di den ben poti den prakseri a tapoe èn di den ben wani bai nanga na moni. Ma a piki ben de alaten asrefi — wi wani gi a moni na den brada”. Nanga den $99 den pikin ben seni ooktoe wan eenvoudig brifi go. Na lobi nanga na fasi foe lobi foe gi sani ben boewégi den brada nanga sisa tapoe den Filipijnen dati foeroe foe den no ben kan hori den watra-ai di den ben lési a brifi.

19. Tapoe san wi moe hori wi ai a tapoe foe kan de séker foe wan toemsi moi tamara?

¹⁹ „Foe na sé foe joe ai, let’opoe den moe loekoe, ija, joe égi brenki ai moe loekoe let’opoe na fesi joe nanga prakseri di span” (Odo 4:25). Fa a de wan ferstan sani foe teki na rai dati na ati èn foe no gi pasi dati oen ai wakawaka, sodati den teki poeroe poti na tapoe tra sani! „Loekoe boen fa joe e waka, no leki don sma, ma leki koni sma”, na rai foe Paulus ben de, „bai na joisti ten gi joesrefi, foe di den dé de godelowsoe.” Ooktoe a ben gi na dek’ati: „Tan ondrosoekoe san na wani foe Jehovah de” (Efese 5:15-17). Te wi e doe disi, dan wi kan de séker dati wi sa man foe hori wi ai „soifri” èn nanga foeroe fertrow wi kan loekoe na a kon foe wan toemsi moi tamara — tégo libi ini na njoen seti foe sani di Gado pramisi. — Teki gersi nanga 2 Korinte 4:17, 18.

Joe kan tjari disi kon na krin?

◻ Fa na ai de „na lampoe foe na skin”?

◻ Fa na ai abi krakti na tapoe den doe foe wi, soleki e kon na krin foe na eksempre foe Eva èn foe Jezus?

◻ Tapoe sortoe fasi Satan e wroko na ini a ten disi „na tapoe den lostoe foe na ai”?

◻ San wi moe doe foe hori wi ai „soifri”?

◻ Tapoe san wi moe poti wi ai now?

[Prenki na tapoe bladzijde 3]

Tapoe san wi e poti wi ai kan tranga a lostoe foe a ati