A nyun spesrutu dei konmakandra programa

Wi ai meki na wan tumusi wondru fasi (Ps. 139:14). Toku, wi man si wán sani nomo, ibri leisi te wi e luku nanga wi ai. Disi de tru, awansi wi e taki fu wi trutru ai, noso wi ai na agersi fasi. Efu wi wani taki na ai fu wi na yeye fasi de krin, dan wi musu poti ala wi prakseri na a du di wi e du a wani fu Gado. Fu di a grontapu fu Satan abi moro nanga moro sani di e puru wi prakseri, meki a fiti taki a nen fu a spesrutu dei konmakandra fu a dienstyari 2006 na „Hori yu ai krin!”​—Mat. 6:22.

San wi kan du fu kisi blesi fu Yehovah? (Odo 10:22) Wi sa go luku na aksi disi na ini a lezing „Kisi blesi fu di yu e hori yu ai krin”. Den interview di sa hori nanga sma, sa sori wi fa wi kan kisi wini te wi e fiti wisrefi na den Bijbel gronprakseri. A fosi lezing fu a fisiti takiman abi leki nen „Tan hori yu ai krin na ini na ogri grontapu disi”. A lezing disi sa gi wi a warskow fu luku bun nanga sani di kan meki taki wi abi furu fu du na ini wi libi, èn te fu kaba den sani dati kan meki taki wi no e go na fesi na yeye fasi. Wi sa leri sosrefi san a wani taki fu „teki a bun pisi”.​—Luk. 10:42.

Fa papa, mama, nanga trawan kan gi yongu Kresten a deki-ati fu poti yeye marki gi densrefi? Na ini den lezing di nen „Papa nanga mama di e meki den peiri fu den doro a yoisti marki”, nanga „Yonguwan di e du muiti fu doro marki na yeye fasi”, a sa kon na krin san papa nanga mama èn sosrefi yonguwan e taki fu a prenspari aksi disi (Ps. 127:4). Na a lasti lezing di a fisiti takiman sa hori, a sa poti prakseri na a fasi fa wisrefi, wi osofamiri, nanga a gemeente kan go na fesi makandra nanga Yehovah en organisâsi.

Awansi wi kon sabi a waarheid no so langa pasa noso efu wi e dini Yehovah someni tenti yari kaba, toku a de tumusi prenspari fu ’hori wi ai krin’. A programa fu a spesrutu dei konmakandra sa yepi wi fu du dati.