A nyun Spesrutu Dei Konmakandra programa

Efu wi e si, noso wi e yere wan sani di e warskow wi taki wan rampu o pasa, ma wi no e gi yesi na a warskow dati, dan dati kan abi takru bakapisi gi wi. Wan sani di de moro prenspari srefi, na fu du san Yehovah e taigi wi te a e gi wi rai. Disi sa kon na krin na a Spesrutu Dei Konmakandra fu a dienstyari di e kon. A thema na „Poti prakseri na a fasi fa unu e arki”.—Luk. 8:18.

Na ini a fosi lezing fu en, a fisiti takiman sa taki fu a rai di Gado ben meki Paulus skrifi na ini den fosi kapitel fu a brifi gi den Hebrewsma. A takiman sa sori san a rai dati abi fu du nanga wi na ini a ten disi. Na ini a lasti lezing di nen „Poti prakseri doronomo na a rai fu Gado”, a fisiti takiman sa yepi wi alamala fu ondrosuku efu wi e gi yesi trutru na Yehovah, na en Manpikin, èn na „a getrow èn koni srafu”.—Mat. 24:45.

Wan tu pisi fu a programa sa abi bun rai spesrutu gi osofamiri. A lezing „Osofamiri di e arki Gado Wortu sondro taki sani puru den prakseri” sa yepi wi fu no meki taki sani fu grontapu e tapu wi fu gro na yeye fasi. A lezing disi sa abi interview na ini fu sma di tyari kenki kon, so taki den ben kan poti yeye afersi na a fosi presi. A lezing „Te yonguwan e arki bun san Gado Wortu e taki, dan den e kisi deki-ati” sa abi interview na ini fu yonguwan di tan hori densrefi na a waarheid di den ben de na skoro, noso makandra nanga tra yonguwan, noso na ini a preikiwroko. A lezing „Pikin-nengre di e arki Gado èn di e teki leri” sa yepi wi fu no abi a denki taki pikin-nengre no man leri sani. Den interview di sa hori nanga yonguwan èn den papa nanga mama fu den, sa yepi wi fu si sortu bun bakapisi a abi te wi e leri yonguwan den pasi fu Yehovah te den pikin ete.

Aladi Satan „e kori sma na heri grontapu”, Yehovah e sori den getrow dinari fu en a yoisti pasi di den musu waka (Openb. 12:9; Yes. 30:21). Te wi e arki a rai fu Yehovah bun èn te wi e fiti dati na ini wi libi, dan wi sa de koni sma, wi sa de koloku, èn wi sa kisi têgo libi te fu kaba.—Odo 8:32-35.