Hori yu ai krin
1. San a wani taki fu abi wan krin ai, èn fu san ede dati de prenspari?
1 Yesus ben sori na ini a Bergitaki fu en, o furu krakti na agersi ai fu wi kan abi tapu wi heri libi. A ben taki: „Fu dati ede, efu yu ai krin, dan yu heri skin sa brenki; ma efu yu ai takru, dan yu heri skin sa dungru” (Mat. 6:22, 23). Wan sma di abi wan krin ai e hori wán sani nomo na prakseri, namku fu du a wani fu Gado. Sowan sma no e broko en ede nanga gudu, fu di a no wani taki a sani dati puru en prakseri (Mat. 6:19-21, 24-33). San kan yepi wi fu tan abi wan krin ai?
2. Sortu deki-ati Gado Wortu e gi wi, di abi fu du nanga a fasi fa wi musu si gudu?
2 Leri fu de tevrede: Bijbel e sori taki wan sma abi a frantwortu fu sorgu gi den sani di en osofamiri abi fanowdu (1 Tim. 5:8). Ma disi no musu meki taki wi e tan suku fu kisi den moro bun sani èn den moro nyun sani (Odo 27:20; 30:8, 9). Na presi fu dati, dan den Buku fu Bijbel e gi wi deki-ati fu de tevrede nanga den prenspari sani di wi abi fanowdu na ini a libi, namku „nyanyan, krosi, nanga wan presi fu tan” (1 Tim. 6:8; Hebr. 13:5, 6). Te wi e poti prakseri na a rai disi, dan dati kan yepi wi fu hori wi ai krin.
3. San kan yepi wi fu no poti hebi gi wisrefi?
3 A de wan koni sani fu no meki paiman di no de fanowdu, èn fu no feti baka gudu, noso tra sani di e teki furu fu wi ten. Den sani disi kan de neleki wan hebi gi wi (1 Tim. 6:9, 10). Fa wi kan wai pasi gi den sani disi? Te yu e prakseri fu du wan sani, begi fu a tori èn no kori yusrefi te yu e si taki a sani dati o meki taki yu no sa man poti nofo prakseri na yeye afersi moro. Abi a fasti bosroiti fu poti yeye afersi na a fosi presi na ini yu libi.—Fil. 1:10; 4:6, 7.
4. Fu san ede wi musu suku fasi fu libi nanga den sani di de fanowdu trutru?
4 Leri fu libi nanga den sani di de fanowdu: Wan tra sani di sa yepi wi fu no lobi gudu, na te wi e suku fu libi nanga den sani di de fanowdu trutru. Wan brada di kon si taki en osofamiri ben kan libi wan bun libi sondro furu gudu, ben taki: „Now mi kan du moro furu na ini a gemeente fu dini mi brada nanga sisa. Mi abi na overtoigi taki Yehovah e blesi ala den futuboi fu en, te den e poti a tru anbegi na a fosi presi na ini den libi.” Yu ben sa man libi nanga den sani di de fanowdu trutru, so taki yu kan kisi moro bigi blesi?
5. Fu san ede wi musu meki muiti doronomo fu hori wi ai krin?
5 Wi musu meki muiti doronomo fu man kakafutu gi a krakti fu Satan, gi a grontapu fu en di lobi gudu, èn gi wi eigi sondu skin. Meki wi no gi pasi taki tra sani puru wi prakseri, ma meki wi tan du a wani fu Gado, èn tan poti prakseri na a moi howpu di wi abi fu kisi têgo libi.—Odo 4:25; 2 Kor. 4:18.