Yu e hori yu ai krin?
1. San a wani taki fu abi wan ’krin ai’?
1 Den sani di wi ai e si, abi krakti tapu a fasi fa wi e handri. Dati meki den wortu disi fu Yesus fiti trutru: „Fu dati ede, efu yu ai krin, dan yu heri skin sa brenki”! (Mat. 6:22) Te wi ai „krin” soleki fa Yesus ben taki, dan wi o poti prakseri na wàn sani nomo, èn dati na fu du a wani fu Gado. Wi e poti a Kownukondre na a fosi presi na ini wi libi èn wi no e meki grontapu gudu noso tra sani di no de fanowdu puru wi prakseri fu wi diniwroko.
2. San kan meki taki wi no e si sani krin moro, ma san o yepi wi?
2 A de fanowdu fu ondrosuku wisrefi: Den sani di wi e si na ini reklame tapu telefisi noso na ini koranti, èn den sani di trawan abi, kan meki taki wi no e si krin moro fu di wi o denki taki wi abi den sani disi fanowdu tu. Fosi wi du wani sani, noso fosi wi bai wan sani di o teki furu fu wi ten, wi moni, nanga wi krakti, a ben o bun fu „teri den kostu”. Fu dati ede, a ben o bun fu aksi wisrefi: ’A sani disi o meki taki mi o man du moro na ini a diniwroko fu Yehovah, noso a o tapu mi fu du dati?’ (Luk. 14:28; Fil. 1:9-11) A de wan koni sani tu taki ten na ten wi e luku fa wi kan kenki wan tu sani na ini wi libi so taki wi kan du moro na ini a diniwroko.—2 Kor. 13:5; Ef. 5:10.
3. San wi kan leri fu wan sisa di tyari kenki kon fu di a ben libi soso nanga den sani di a abi trutru fanowdu?
3 Di wan sisa bigin du a gewoon pionierwroko, dan a tan wroko heri wiki, aladi a ben o man sorgu bun gi ensrefi ete efu a ben e wroko wan tu dei na ini a wiki nomo. Te fu kaba a taki: „Nowan sma kan dini tu masra leki srafu. Mi ben musu luku bun sortu sani mi ben abi fanowdu trutru, na presi fu bai iniwan sani di mi wani. Mi kon frustan taki den sani di mi ben bai e kon owru, èn baka wan pisi ten mi no ben poti prakseri moro na den. Efu mi ben o tan feti baka den gudu disi, dan mi ben o kon weri srefisrefi.” A sisa disi tyari kenki kon na ini en libi fu di a go luku san a abi trutru fanowdu, èn a suku wan tra wroko, so taki a ben man tan du a pionierwroko.
4. Fu san ede a de tumusi prenspari fu tan hori wi ai krin?
4 A prenspari ten di wi e libi na ini e meki taki wi musu du moro muiti fu hori wi ai krin. Ibri dei di e pasa, e tyari wi kon moro krosibei na a kaba fu a sistema disi, èn na a bigin fu a nyun grontapu fu Gado (1 Kor. 7:29, 31). Te wi e tan poti prakseri na a preikiwroko, dan wi kan kisi frulusu èn sosrefi den sma di e arki wi.—1 Tim. 4:16.