Waka na baka na eksenpre fu Yeyses fu gi yu srefi na ini na dini fu Gado
„Na santa kibritori disi fu na gi di wan sma e gi en srefi na ini na dini fu Gado, so leki sma e erken ini algemeen, de bigi: ’Den ben tyari en [Yeyses] kon a krin na ini skin.’” — 1 TIMOTEYUS 3:16.
1. (a) Sortu aksi moro leki 4000 yari ben de wan sani di no ben kisi wan piki? (b) Oten èn fa a piki ben gi?
A BEN de wan aksi di moro leki 4000 yari ben tan sondro fu kisi wan piki. Fu sensi na momenti di na fosi libisma, Adam, ben misi fu kibri soyfri-retifasi, na aksi ben de: Fa na gi di sma musu gi den srefi na ini na dini fu Gado kan kon a krin a mindri libisma? Te fu kba a piki ben gi na ini na fosi yarihondro G.T. di Gado Manpikin ben kon na grontapu. Ini ibri prakseri, ibri wortu, ibri du Yeyses Krestes ben sori na tay di a ben tayhori na Yehovah. Na so fasi a ben tyari na ’santa kibritori fu na gi di wan sma e gi en srefi na ini na dini fu Gado’ kon a krin èn a sori fa sma di gi den srefi abra ben kan tan sori so wan gi di den musu gi den srefi na ini na dini fu Gado. — 1 Timoteyus 3:16.
2. Fu san-ede te wi e feti na baka na gi di wi e gi wi srefi na ini na dini fu Gado wi musu luku na eksenpre fu Yeyses soyfri?
2 Te wi leki kresten di gi wi srefi abra èn teki dopu e feti baka na gi di wi musu gi wi srefi na ini na dini fu Gado, dan wi e du bun ’fu luku soyfri’ na a eksenpre fu Yeyses (Hebrew sma 12:3). Fu san-ede? Fu tu sani ede. Na ini na fosi presi, na eksenpre fu Yeyses kan yepi wi fu kweki na gi di wi musu gi wi srefi na ini na dini fu Gado. Yeyses ben sabi en Tta moro bun leki sortu tra sma tu (Yohanes 1:18). Èn Yeyses ben waka na baka Yehovah pasi èn eygifasi so soyfri taki a ben kan taki: „A sma di si mi, si na Tta tu” (Yohanes 14:9). Nanga na libi èn na diniwroko fu Yeyses wi kan kisi fu dati-ede wan moro dipi warderi gi Yehovah safu eygifasi èn na so fasi tranga na tay di wi tayhori na wi lobi Mekiman. Yeyses eksenpre ini na di fu tu presi kan yepi wi fu sori na gi di wan sma e gi en srefi na ini na dini fu Gado. A ben gi na volmaakti eksenpre fu wan waka nanga libi fu sori fa wan sma musu gi en srefi na ini na dini fu Gado. Wi e du fu dati-ede bun fu luku san wi kan du fu ’weri Krestes’, dati wani taki, teki en leki wan model, waka na baka en eksenpre. — Rome 13:14.
3. San musu de na ini na programa fu wi fu persoonlijk studi, èn fu san-ede?
3 A no ala sani san Yeyses ben taki nanga ben du, tan kibri fu di den skrifi den poti na ini buku (Yohanes 21:25). San ben skrifi ondro krakti fu santa yeye, musu abi wi spesrutu belangstelling fu dati-ede. Tapu wan programa fu persoonlijk beybristudi wi musu abi fu dati-ede na leysi di wi musu leysi ala ten den evangelium tori fu Yeyses libi. Ma efu so wan leysi-programa wani yepi wi ini na feti di wi e feti na baka na gi di wan sma e gi en srefi na ini na dini fu Gado, dan wi musu teki na ten fu denki nanga warderi fu san wi e leysi. Wi musu si sani gaw tu so taki wi e puru moro na ini san wi e leysi leki soso san de so fu si.
Leki fa a Ppa de, na so a Pikin de
4. (a) San e sori taki Yeyses ben de wan sma fu waran èn dipi firi? (b) Fa Yeyses ben teki fesi te a ben e handri nanga tra sma?
4 Luku wan eksenpre fu disi. Yeyses ben de wan man fu waran èn dipi firi. Luku pikinso na ini Markus 10:1, 10, 13, 17 nanga 35 taki sma fu ala libimarki nanga kweki ben feni taki den ben kan go taki nanga en. Moro leki wan tron a ben teki pikin-nengre na ini en anu (Markus 9:36; 10:16). Fu san-ede sma, èn srefi pikin-nengre, ben firi den srefi switi te den ben de na Yeyses? Fu di a ben abi opregti belangstelling di de sondro hoygrifasi gi den (Markus 1:40, 41). Disi ben de krin fu si ini disi, taki furutron a ben teki fesi fu go na tra sma di ben abi yepi fanowdu. Na so wi e leysi taki „a ben kisi fu si” na weduwe fu Naïn di den ben e tyari en dede manpikin gwe. Dan a ben „kon krosibey” èn wiki na boy baka fu dede, èn a no skrifi srefisrefi taki wan sma ben aksi en fu du dati (Lukas 7:13-15). So srefi a ben teki fesi fu dresi wan malengri uma èn wan man di ben abi watrasiki, sondro taki wan sma ben aksi en dati. — Lukas 13:11-13; 14:1-4.
5. San den tori disi fu Yeyses diniwroko e leri wi fu Yehovah eygifasi nanga pasi?
5 Te yu e leysi fu den sortu tori disi, stòp dan èn aksi yu srefi: ’Mi sabi taki Yeyses ben waka volmaakti baka en Tta, sobun, san den tori disi e fruteri mi fu Yehovah eygifasi nanga pasi?’ Den musu dyaranti wi taki Yehovah de wan Gado nanga waran èn dipi firi. Na bigi fu en belangstelling di e tan gi na libismafamiri ben meki a teki fesi fu bumuy nanga den. A no ben de fanowdu fu wan sma ben taki nanga en tranga fu tyari en go so fara fu gi en Manpikin „leki wan lusuprèys ini na presi fu furu sma” (Mateyus 20:28; Yohanes 3:16). A e luku na okasi fu ’tayhori’ na den di wani dini en fu lobi ede (Deuteronomium 10:15). Na beybri e taki: „[Yehovah] ay e go na a heri grontapu lontu fu sori en tranga fu na bun fu den di na ati fu den de sondro pratifasi na en fesi.” — 2 Kronieken 16:9.
6. San e de na bakapisi efu wi e go denki fu Yehovah waran èn dipi firi so leki disi e kon a krin na ini na eksenpre fu en Manpikin?
6 Te wi e denki na a fasi disi fu Yehovah waran èn dipi firi, so leki wi e si disi ini na eksenpre fu en Manpikin, dan yu ati sa seki, èn kon furu nanga moro bigi warderi gi en safu èn switi eygifasi. Disi baka sa hari yu kon na en. Disi sa buweygi yu fu kon na en ini begi na wan frifasi tapu ibri momenti èn ondro ala omstandigheid (Psalm 65:2). A sa tranga na tay di yu e tayhori na en.
7. Sortu aksi wi musu aksi wi srefi te wi e denki fu Yehovah waran èn dipi firi èn fu san-ede?
7 Ma tyari kon na ini prakseri taki na gi di wan sma e gi en srefi na ini na dini fu Gado wani taki moro leki soso wan firi fu anbegi. So leki na beybri koniman R. Lenski e taki, ’a e wani taki wi heri yeyefasi fu respeki nanga anbegi èn den du di e kon fu dati’. (Wi e skrifi skoynsi.) Baka te yu go prakseri fu Yehovah waran èn dipi firi so leki disi de fu si na ini na eksenpre fu Yeyses, dan yu musu aksi yu srefi sobun: ’Fa mi kan gersi Yehovah moro bun na ini disi? Tra sma e feni taki den man kon taki nanga mi?’ Efu yu de wan ppa ofu mma, dan yu pikin musu man fu taki nanga yu. Èn efu yu de wan gemeente-owruman dan sma seyker musu man kon na yu. San sa meki a de moro makriki fu sma kon taki nanga yu? Waran nanga dipi firi. Yu musu kweki wan opregti belangstelling sondro hoygrifasi gi trawan. Te yu e broko ede trutru gi trawan èn de klari fu gi yu srefi fu na bun fu den, dan den sa si disi èn firi taki yu e hari den kon.
8. (a) San yu musu hori na ini prakseri efu yu e leysi beybritori di e go fu Yeyses? (b) San wi e leri fu Yehovah fu den tori di kari na ini futuwortu?
8 Hori na prakseri te yu e leysi beybritori di e go fu Yeyses taki yu kan kon sabi furu fu Yehovah leki persoon ini den sani di Yeyses ben taki èn ben du.a Èn te na warderi fu yu gi den eygifasi fu Gado so leki den de fu si na ini Yeyses, buweygi yu fu pruberi fu gersi En moro bun, dan yu e sori na gi di wan sma e gi en srefi na ini na dini fu Gado.
Na sori di wan sma e sori na gi di a e gi en srefi na ini na dini fu Gado fu na bun fu famiriman
9, 10. (a) Fa Yeyses, ben sori lobi nanga broko-ede gi en mma, Mariya leti bifo a ben dede? (b) San ben de te yu luku en bun na reyde taki Yeyses ben gi na sorgu fu Mariya abra na a apostru Yohanes èn no na wan fu en eygi brada na skinfasi?
9 Na libi nanga diniwroko fu Yeyses Krestes e tyari furu sani kon a krin fu na fasi fa sma musu sori na gi di den e gi den srefi na ini na dini fu Gado. Wan eksenpre di e seki yu ati skrifi na ini Yohanes 19:25-27 pe wi e leysi: „Ma na a pinapostu fu Yeyses en mma nanga na sisa fu en mma ben tanapu; Mariya, na uma fu Klopas, èn Mariya Magdalena. Di Yeyses si now en mma èn na disipri di a ben lobi [Yohanes] tanapu, a ben taygi en mma: ’Uma, luku, yu manpikin!’ Dan a ben taygi na disipri: ’Luku, yu mma!’ Èn fu na yuru dati na disipri ben teki en na en oso.”
10 Go prakseri pikinso! Leti bifo Yeyses gi en grontapu libi abra, en lobi nanga broko-ede ben pusu en fu gi a sorgu fu en mma, Mariya (di ben tron weduwe now), na a lobi apostru Yohanes. Ma fu san-ede Yohanes èn no wan fu Yeyses eygi brada na skinfasi? Fu di Yeyses no ben broko en ede wawan fu den fanowdu fu Mariya na skinfasi ma spesrutu fu na yeye tanbun fu en. Èn na apostru Yohanes (kande a ben de wan neef fu Yeyses) ben sori na bribi fu en, ala di no wan buweysi de taki Yeyses brada na skinfasi tapu na momenti dati ben de bribiman kba. — Mateyus 12:46-50; Yohanes 7:5.
11. (a) Fa wan kresten leki fa Paulus taki kan sori na ini en eygi osofamiri a gi di a e gi en srefi na ini na dini fu Gado? (b) Fu san-ede wan tru kresten e sorgu gi grani ppa nanga mma?
11 We, fa disi ben de wan sori fu na gi di wan sma e gi en srefi na ini na dini fu Gado? Na apostru Paulus e tyari kon a krin: „Respeki weduwe di trutru de weduwe. Ma efu wan weduwe abi pikin ofu granpikin, meki den dati leri dan fosi fu sori na ini den eygi osofamiri na gi di wan sma musu gi en srefi na ini na dini fu Gado èn tan pay wan payman di fiti na den mma nanga ppa èn gransma fu den, bika disi de switi na ini na ay fu Gado” (1 Timoteyus 5:3, 4). Fu respeki ppa nanga mma fu di te a de fanowdu yu e gi yepi na skinfasi, so leki Paulus e taki, na wan sori fu na gi di wan sma e gi en srefi na ini na dini fu Gado. Fa so? Yehovah, na Sma di na seti fu osofamiri feni en bigin na en, e komanderi pikin fu respeki den ppa nanga mma (Efesiya sma 3:14, 15; 6:1-3). Na tru kresten e erken sobun taki na sorgu gi den sortu famiri-frantiwortu disi no e sori wwan lobi gi den ppa nanga mma ma so srefi tu e sori respeki gi Gado èn e sori taki wan sma e gi yesi na en gebod. — Teki gersi Kolose sma 3:20.
12. Fa yu kan sori na gi di yu e gi yu srefi na ini na dini fu Gado fu na bun fu grani ppa nanga mma, èn san musu de na buweygi fu ati?
12 Fa yu kan sori fu dati-ede na gi di yu musu gi yu srefi na ini na dini fu Gado fu na bun fu oso-famiriman? Disi seyker sa wani taki fu seti sani fu sorgu gi den fanowdu fu grani ppa nanga mma na yeyefasi èn skinfasi, so leki Yeyses ben du. Fu poti disi na wan sey ben sa sori wan mankeri fu na gi di wan sma musu gi en srefi na ini na dini fu Gado. (Teki gersi 2 Timoteyus 3:2, 3, 5.) Na kresten di gi en libi abra e sorgu gi en mofina ppa nanga mma no wwan fu bunfasi ofu fu plekti ede, ma fu di a lobi en famiri èn a e erken taki Yehovah e poti bigi waarde na a sorgu fu so wan frantiwortu. Na sorgu di wan sma e sorgu gi grani ppa nanga mma de sobun wan sori fu na gi di wan sma e gi en srefi na ini na dini fu Gado.b
13. Fa wan kresten ppa musu sori taki a e gi en srefi na ini na dini fu Gado fu na bun fu en osofamiri?
13 Tra fasi de ete fa na gi di wan sma e gi en srefi na ini na dini fu Gado kan sori na ini oso. Wan kresten ppa fu eksenpre abi na frantiwortu fu sorgu gi en osofamiri na skinfasi, emotioneel nanga yeyefasi. Fu dati-ede, boyti na sorgu gi sani fu yepi na skinfasi, a e seti sani na wan lobifasi fu abi wan ala ten osofamiri-beybristudi. A e poti ten na wan sey fu abi ala ten baka wan prati na a velddienst nanga en osofamiri. A e de ini balans èn e erken tu na fanowdu fu den fu abi rostu nanga ontspanning. Èn tapu wan frustanfasi a e poti san de moro prenspari na fesi èn no e gi pasi taki gemeente aktiviteit meki a libi en osofamiri na wan sey (1 Timoteyus 3:5, 12). Fu san-ede a e du ala disi? No wwan fu na firi fu plekti ede ma fu lobi ede gi en osofamiri. A e erken na prensparifasi di Yehovah e poti tapu na sorgu gi en osofamiri. Te na a fasi disi a e sorgu gi en frantiwortu leki trowmasra nanga ppa, dan a e sori na gi di a e gi en srefi na ini na dini fu Gado na ini libi.
14. Fa wan kresten uma kan sori na oso taki a e gi en srefi na ini na dini fu Gado?
14 Kresten trow-uma abi so srefi na frantiwortu fu sori taki den e gi den srefi na ini na dini fu Gado. Fa? Na beybri e taygi wan uma fu de „wan sma di e saka en srefi” na ondro en trowmasra èn musu „abi dipi respeki” gi en (Efesiya sma 5:22, 33). Srefi efu en trowmasra no de wan bribi sma, toku a musu „saka en srefi” na en ondro (1 Petrus 3:1). Na kresten uma e sori so wan saka di a e saka en srefi leki trow-uma na ondro en masra fu di a e horibaka gi en ini den bosroyti di a e teki, so langa den no de kontrari den weti fu Gado (Tori fu den Apostru 5:29). Èn fu san-ede a e teki na rol disi? No wwan fu di a lobi en man, ma spesrutu fu di a e erken taki „a fiti ini Masra” — dati wani taki, a de na seti fu Gado gi osofamiri (Kolose sma 3:18). Na de di a de klari fu saka en srefi na en masra ondro, de sobun wan sori fu na gi di a e gi en srefi na ini na dini fu Gado.
„Na fu na marki dati mi ben go”
15. Tapu sortu tumusi moy fasi Yeyses ben sori na gi di a e gi en srefi na ini na dini fu Gado?
15 Wan fu den tumusi moy fasi fa Yeyses ben sori na gi di a ben gi en srefi na ini na dini fu Gado, ben de fu di ’a ben meki na bun nyunsu fu na kownukondre bekenti’ (Lukas 4:43). Baka na dopu fu en na ini na Yordaanliba na ini 29 G.T., dan na ini den dri nanga afu yari di ben kon na baka Yeyses ben de fayafaya bezig nanga na tumusi prenspari wroko disi. „Na fu na marki dati mi ben go”, a ben tyari kon a krin (Markus 1:38; Yohanes 18:37). Ma fa disi ben de wan sori fu na gi di a ben gi en srefi na ini na dini fu Gado?
16, 17. (a) San ben pusu Yeyses fu preyki èn leri sma so fayafaya? (b) Fu san-ede Yeyses diniwroko fu preyki nanga fu gi sma leri ben de wan sori fu na gi di a ben gi en srefi na ini na dini fu Gado?
16 Go prakseri pikinso taki na gi di wan sma e gi en srefi na ini na dini fu Gado wani taki libi wan libi di e plisi Gado, fu di yu lobi en èn abi wan dipi warderi gi en moy eygifasi. San ben pusu Yeyses dan ini den lasti yari di a ben de na grontapu fu de so fayafaya bezig fu preyki èn fu leri sma? Soso fu na firi fu wroko ofu plekti ede? A no de wan sani fu degedege taki a ben broko en ede nanga sma (Mateyus 9:35, 36). A ben frustan krinkrin taki na salfu di a ben kisi nanga santa yeye ben poti en na wroko èn ben gi en na komando fu du en diniwroko (Lukas 4:16-21). Toku den buweygi fu ati fu en ben go moro dipi.
17 ’Mi lobi na Tta’, Yeyses ben fruteri en apostru sondro fu kibri wan sani na a lasti neti fu en grontapu libi (Yohanes 14:31). Na lobi dati abi en fondamenti tapu wan tumusi dipi èn frutrow sabi fu Yehovah eygifasi (Lukas 10:22). Fu di dipi warderi ben buweygi en meki Yeyses ben feni prisiri na ini na du fu na wani fu Gado (Psalm 40:8). A ben de en „nnyan” — so fanowdu gi libi, so switi a ben de (Yohanes 4:34). A ben gi na volmaakti eksenpre fu ’suku fosi na kownukondre’ na presi fu poti en eygi belang na fesi (Mateyus 6:33). A ben de sobun no wwan san a ben du ofu srefi omeni a ben du, ma fu san-ede a ben du en — dati ben meki en diniwroko fu preyki èn leri sma de wan sori fu na gi di wan sma e gi en srefi na ini na dini fu Gado.
18. Fu san-ede na abi fu wan prati na ini na diniwroko no a fu de wan sori fu na gi di wan sma e gi en srefi na ini na dini fu Gado?
18 Fa wi kan waka na baka na „model”, Yeyses, na ini a tori disi? (1 Petrus 2:21) Ala sma di e teki Yeyses kari, fu „kon, èn tron mi bakaman”, e kisi wan wroko di kon fu Gado fu preyki na bun nyunsu fu na kownukondre èn fu meki disipri (Lukas 18:22; Mateyus 24:14; 28:19, 20). Disi wani taki taki efu wi abi wan prati ini na meki bekenti fu na bun nyunsu, taki wi e feti baka na gi di wan sma e gi en srefi na ini na dini fu Gado? Disi no a fu de so. Efu tapu wan fasi di de leki wan plekti ofu wan sinbôlfasi wi ben sa teki prati na a diniwroko, noso fu prisiri na ati fu famiriman ofu trawan, dan pikinmoro wi no ben kan si en leki ’wan gi di wi gi wi srefi na ini na dini fu Gado’. — 2 Petrus 3:11.
19. (a) San musu de na fosi reyde fu san wi e du na ini na diniwroko? (b) San musu de na bakapisi te wan dipi lobi gi Gado ben pusu wi?
19 Neleki fa a ben de nanga Yeyses, na so den buweygi fu wi ati musu go moro dipi. Yeyses ben taki: „Unu musu lobi Yehovah unu Gado nanga heri unu ati [den emotie, den lostu nanga na firi fu na inisey sma] èn nanga heri unu sili [yu libi nanga heri du] èn nanga heri unu frustan èn nanga heri unu krakti.” Wan sabiman fu Buku di ben abi wan bun inzicht, ben poti disi a tapu: „Disi . . . de furutron moro warti leki heri bron-ofrandi èn srakti-ofrandi” (Markus 12:30, 33, 34). A no de soso nomo san wi e du ma so srefi fu san-ede wi e du en. Wan lobi gi Gado di en rutu go dipi èn di e hari psa ibri titey fu wi skin, musu de na prenspari reyde fu san wi e du na ini na diniwroko. Te disi de so, dan wi no sa de tevrede nanga soso wan sinbôlis prati, ma bun reyde sa de fu sori na dipi fu na gi di wi e gi wi srefi na ini na dini fu Gado fu di wi e du ala san wi kan (2 Timoteyus 2:15). Na a srefi ten, te lobi gi Gado de na sani di e pusu wi, dan wi no sa suku fowtu èn no sa teki wi diniwroko gersi nanga di fu trawan. — Galasiya sma 6:4.
20. Fa wi kan nyanbun dorodoro fu na eksenpre fu Yeyses ini na feti na baka na gi di wan sma e gi en srefi na ini na dini fu Gado?
20 Fa wi kan de grantangi taki Yehovah tyari na santa kibritori fu na gi di wan sma e gi en srefi na ini na dini fu Gado kon a krin! Te wi e stuka soyfri san Yeyses ben taki èn ben du, èn te wi e pruberi fu waka na en baka, dan wi sa kisi yepi fu kweki èn so srefi fu sori na gi di wan sma e gi en srefi na ini na dini fu Gado moro soyfri. Yehovah sa blèsi wi srefisrefi efu wi leki kresten di gi den srefi abra èn teki dopu e waka baka Yeyses eksenpre na ini na feti di wi e feti fu gi wi srefi na ini na dini fu Gado. — 1 Timoteyus 4:7, 8.
[Foetoewortoe]
a Fu ete wantu eksenpre yu kan luku san wi e leri fu Yehovah fu den tori di e kon: Mateyus 8:2, 3; Markus 14:3-9; Lukas 21:1-4 nanga Yohanes 11:33-36.
b Fu wan moro fini takimakandra fu san de na ini na tori fu na gi di wan sma e gi en srefi na ini na dini fu Gado fu na bun fu grani famiriman, luku Na Waktitoren fu 1 juni 1987, blz. 13-18.
Yu kan memre disi ete?
◻ Fu san-ede wi musu luku na eksenpre fu Yeyses te wi e feti baka na gi di wan sma e gi en srefi na ini na dini fu Gado?
◻ San wi e leri fu Yehovah fu na waran èn dipi firi di Yeyses ben sori?
◻ Fa wi kan sori na gi di wi e gi wi srefi na ini na dini fu Gado fu na bun fu oso-famiriman?
◻ San musu de na buweygi fu ati fu meki wi diniwroko de wan sori fu na gi di wi e gi wi srefi na ini na dini fu Gado?
[Prenki na tapoe bladzijde 15]
Wan kresten ppa abi na frantiwortu fu sorgu gi en osofamiri na skinfasi, emotioneel nanga yeyefasi
[Prenki na tapoe bladzijde 17]
„Ma efu wan weduwe abi pikin ofu granpikin, meki den dati . . . tan pay wan payman di fiti na den ppa nanga mma nanga gran sma fu den.”