Feti leki dopu kresten na baka na gi di yu musu gi yu srefi na ini na dini fu Gado

„Ma yu, o sma fu Gado, . . . feti na baka regtfardikifasi, na gi di yu e gi yu srefi na ini na dini fu Gado.” — 1 TIMOTEYUS 6:11.

1. San yu ben sa piki na tapu na aksi san de na moro prenspari dey na ini yu libi? Fu san-ede yu e piki so?

SAN na a moro prenspari dey na ini yu libi? Efu yu de wan dopu kotoygi fu Yehovah, dan sondro fu degedege yu sa piki: ’A no de fu taki, na dey di mi ben teki dopu!’ Èn fu tru, na dopu na wan tumusi prenspari stap na ini yu libi. A de wan sinbôl di de fu si, taki yu gi yu srefi krinkrin abra na Yehovah fu du en wani sondro fu poti wan kondisi. Yu dopu e marki na datum di den poti yu leki wan bedinari fu na Moro Hey Gado, Yehovah.

2. (a) Sortu eksenpre yu kan gi fu sori taki na dopu no de na lasti stap na ini yu kresten waka nanga libi? (b) Sortu prenspari stap fu sreka sani na fesi yu ben du bifo yu ben teki dopu?

² Ma a dopu de na lasti stap di yu e du ini yu waka nanga libi leki wan kresten? Kwetikweti! Meki unu gi yu wan eksenpre fu disi: Na ini furu kondre te den trow tu sma dan dati e marki na kba fu wan pisiten fu meki plan èn fu sreka sani (èn leki fa a gwenti de fu wan pisiten fu freyri). Na a srefi ten a e marki na bigin fu libi nanga makandra leki trowpaar. Na a srefi fasi yu dopu de na heymarki fu wan pisiten fu sreka sani pe yu ben teki wan lo prenspari stap fu sreka sani. Yu ben kisi sabi fu Gado nanga Krestes (Yohanes 17:3). Yu ben bigin sori bribi na ini Yehovah leki na tru Gado, na ini Krestes leki yu Frulusuman, èn na ini beybri leki Gado Wortu (Tori fu den Apostru 4:12; 1 Tesalonika sma 2:13; Hebrew sma 11:6). Yu ben sori na bribi dati fu di yu ben abi berow fu yu fositen libifasi èn go waka baka wan regtfardiki libifasi (Tori fu den Apostru 3:19). Ne yu ben teki na bosroyti fu gi yu srefi abra na Yehovah fu du en wani (Mateyus 16:24). Te fu kba yu ben teki dopu. — Mateyus 28:19, 20.

3. (a) Fa wi kan meki sma si taki na dopu fu wi e marki na bigin fu wan libi fu dienst di gi abra na Gado? (b) Sortu aksi e kon a fesi, èn fu san-ede den piki musu abi wi belangstelling srefisrefi?

³ Ma na dopu fu yu no de na kba ma na bigin fu wan libi fu santa dienst di gi abra na Gado. So leki wan beybri koniman ben taki, dan sma no mag fu sori finga na tapu na libi fu wan kresten leki ’wan karuwiri-faya di e saka go ini wan lesifasi di e tan go doro’. Fa yu kan sori sobun na yu sey taki dopu no de soso leki ’wan karuwiri-faya’? Disi kan te yu e feti yu heri libi langa baka wan libifasi fu gi yu srefi na ini na dini fu Gado. Fu san-ede a de fanowdu fu feti baka na eygifasi disi? Fa yu kan kweki disi moro soyfri na ini yu libi? Den piki musu abi wi belangstelling srefisrefi, bika fu psa na dey fu Yehovah krutu di e kon krosibey, dan wi musu de sma di den e kon sabi nanga yepi fu „du fu na gi di wan sma e gi en srefi na ini na dini fu Gado”. — 2 Petrus 3:11, 12.

San na gi di wan sma e gi en srefi na ini na dini fu Gado wani taki

4. Sortu ray Paulus ben gi Timoteyus, èn san wi sabi fu Timoteyus?

⁴ Na ini wan sani fu 61 nanga 64 bifo G.T. na apostru Paulus ben skrifi en fosi brifi ondro krakti fu santa yeye gi na kresten disipri Timoteyus. Baka di Paulus skrifi fu den kofar di na lobi fu moni kan tyari kon, a ben skrifi: „Ma yu, ow sma fu Gado, lon komoto gi den sani disi. Ma feti baka na gi di yu musu gi yu srefi na ini na dini fu Gado” (1 Timoteyus 6:9-11). Wan tumusi moy sani ini disi de, taki Timoteyus na a momenti disi ben de kande ini na bigin fu en dritenti yari. A ben waka lontu bun furu kba nanga na apostru Paulus, èn ben kisi na makti fu poti opziener nanga dinari na ini na diniwroko na ini den gemeente (Tori fu den Apostru 16:3; 1 Timoteyus 5:22). Toku ete, Paulus ben gi na lepi kresten man disi di ben gi en srefi abra èn ben teki dopu na ray fu feti baka a gi di a musu gi en srefi na ini na dini fu Gado.

5. San den wortu „na gi di wan sma e gi en srefi na ini na dini fu Gado” wani taki?

⁵ San Paulus ben bedul nanga den wortu „a gi di a musu gi en srefi na ini na dini fu Gado”? Na Griki wortu di ben de biginbigin (eu^.se^.bei’a) kan poti letterlijk abra nanga „e gi respeki bun”. San disi wani taki wi e leysi: „Eusebeia e kon ini inscriptie fu na ten disi sontron ini wan betekenis di e sori tapu a gi di wan sma e gi en srefi krinkrin na ini na dini fu Gado . . . ma na moro algemene betekenis ini na pôpi Grikitongo fu na pisiten fu Rome ben de ’loyalitèyt‘. . . . Gi Kresten sma eusebeia de na moro hey sortu fu na gi di wan sma e gi en srefi ini na dini fu Gado” (Christian Words, fu na anu fu Nigel Turner). So leki den wortu „a gi di wan sma e gi en srefi na ini na dini fu Gado” e kobroyki na ini den Buku, dan a e sori sobun tapu wan gi fu respeki ofu na gi fu yu srefi na Yehovah Gado srefi makandra nanga loyalitèyt.

6. Fa wan kresten e sori na gi di a e gi en srefi na ini na dini fu Gado?

⁶ Ma na gi di wan sma e gi en srefi na ini na dini fu Gado no de soso wan firi nomo fu anbegi. Neleki fa ’bribi sondro wroko na wan dede sani’, na so a gi di wan sma e gi en srefi na ini na dini fu Gado musu kon a krin na ini na libi fu wan sma (Yakobus 2:26). Na ini New Testament Words William Barclay ben skrifi: „[eu^.se^.bei’a nanga tra famiri wortu] no wwan e tyari na firi fu grani nanga respeki kon a fesi, ma den wani taki tu wan anbegi di de ini akruderi nanga na grani dati èn wan libi fu gi yesi fayafaya ini akruderi nanga na grani dati.” Eu^.se^.bei’a den e taki moro fara fu en leki „wan praktis sabi di wan sma e sabi taki Gado de na ini ala pisi fu na libi” (The Second Epistle General of Peter and the General Epistle of Jude, fu na anu fu Michael Green). Na Kresten musu sori sobun taki a tay en srefi hori na Yehovah nanga na fasi fa a e libi. — 1 Timoteyus 2:2; 2 Petrus 3:11.

Tranga muyti de fanowdu

7. San Paulus ben bedul di a ben taki tranga nanga Timoteyus fu ’feti na baka’ na gi di a ben musu gi en srefi na ini na dini fu Gado, ala di a ben dopu?

⁷ Ma san de ini na tori fu kweki èn fu sori na gi di wan sma e gi en srefi na ini na dini fu Gado? A de soso wan afersi fu teki dopu? Go prakseri taki Timoteyus, ala di a ben teki dopu, ben kisi na deki-ati ’fu feti na baka’ dati [letterlijk: ’tan feti na baka’] (1 Timoteyus 6:11, Kingdom Interlinear).a A de krin taki Paulus no ben wani sori taki na disipri Timoteyus no ben abi na fasi fu gi en srefi na ini na dini fu Gado. Na presi fu dati a ben wani en kon frustan bunbun na fanowdu fu tan feti na baka na eygifasi disi nanga seryusufasi èn nanga faya. (Teki gersi Filipi sma 3:14.) A de krin taki disi ben musu de wan sani fu en heri libi langa. Timoteyus leki ala tra dopu kresten ben kan tan go na fesi ini na sori fu na gi di a ben gi en srefi na ini na dini fu Gado.

8. Fa Petrus e meki wi si taki wan kresten di gi en srefi abra èn teki dopu èn di wani feti na baka na gi di wan sma e gi en srefi na ini na dini fu Gado, musu span en srefi tranga?

⁸ Wan kresten di gi en srefi abra èn teki dopu èn di wani feti a baka na gi di a e gi en srefi na ini na dini fu Gado, musu span en srefi tranga. Di na apostru Petrus ben skrifi gi dopu kresten di ben abi na fruwakti ’fu tron sma di ben sa teki prati na a Gado natuur’ a ben taki: „Iya, yoysti fu na reyde disi, fu di leki wan piki fu unu sey unu e du seryusu muyti, moksi na unu bribi bunfasi, na unu bunfasi sabi, na unu sabi dwengi unu srefi, na unu dwengi unu srefi horidoro, na unu horidoro a gi di unu e gi unu srefi na ini na dini fu Gado” (2 Petrus 1:4-6). A de krin, taki wan seyker marki fu bribi ben de fanowdu fu pristeri wi srefi gi na dopu. Ma baka na dopu dan wi no kan tan e drifi nomo, e de tevreyde nanga soso sinbôlis krestendom. Na presi fu dati, te wi e go na fesi ini kresten libifasi, dan wi musu go doro fu kweki tra tumusi moy eygifasi, so leki na gi di wi musu gi wi srefi na ini na dini fu Gado, di dan kan moksi na wi bribi. Disi, na so Petrus e taki, e aksi seryusu muyti fu wi sey.

9. (a) Fa na Griki wortu fu „moksi” e sori na marki fu muyti di de fanowdu fu kweki na gi di wan sma e gi en srefi na ini na dini fu Gado? (b) Petrus e gi wi deki-ati fu du san?

⁹ Na Griki wortu di Petrus e kobroyki gi „moksi na” (e^.pi^.cho^.re’ge^.o) abi wan tumusi moy historiya èn e sori na marki fu muyti di musu du. A e kon fu wan zelfstandig nenwortu (cho^.re’gos) di letterlijk wani taki „na tiriman fu wan koor”. A ben abi fu du nanga wan sma di ben pay ala kostu fu a gi leri èn fu hori wan koor di e singi na ini komediprey na libi. Den sortu man disi ben teki nanga friwani na frantiwortu disi na tapu den fu di den lobi na foto fu den èn ben pay den kostu nanga den eygi moni. A ben de wan grani gi den sortu man dati fu gi furu moni fu sorgu gi ala san de fanowdu fu wan tumusi moy prey. Na wortu ben kon wani taki bakaten „fu gi sorgu psa marki”. (Teki gersi 2 Petrus 1:11.) Petrus e taki fu dati-ede tranga nanga wi, no wwan fu kisi wan seyker marki fu na gi di wi e gi wi srefi na ini na dini fu Gado, ma fu sori na diri eygifasi disi sobun leki wi kan.

10, 11. (a) Fu san-ede a e aksi muyti fu kweki èn fu sori na gi di wan sma e gi en srefi na ini na dini fu Gado? (b) Fa wi kan wini na feti?

¹⁰ Ma fu san-ede a e aksi so wan muyti fu kweki èn fu sori a gi di wi musu gi wi srefi na ini na dini fu Gado? Wan sani de taki wi musu feti nanga na fadon skin. Fu di ’na firi fu libisma ati de takru fu sensi en yongu yari’, meki a no de makriki fu feti na baka wan libi fu gi yesi na Gado fayafaya (Genesis 8:21; Rome sma 7:21-23). „Ala sma di wani libi nanga a gi di a e gi en srefi na ini na dini fu Gado ini wánfasi nanga Krestes Yeyses, sa kisi frufolgu tu”, na apostru Paulus e taki (2 Timoteyus 3:12). Iya, na kresten di e pruberi fu libi so, taki a e plisi Gado, musu de trafasi leki grontapu. A abi tra waarde nanga tra marki di a wani doro. So leki Yeyses ben warskow, dan disi e wiki na ogri-ati fu na ogri grontapu disi. — Yohanes 15:19; 1 Petrus 4:4.

¹¹ Ma toku wi kan wini na feti, bika ’Yehovah sabi fu fri sma di e gi den srefi na ini na dini fu Gado puru fu tesi’ (2 Petrus 2:9). Ma wi musu du na pisi fu wi fu di wi e tan feti na baka na gi di wan sma musu gi en srefi ini na dini fu Gado.

Kweki na gi fu yu srefi na ini na dini fu Gado

12. Fa Petrus e sori san de fanowdu fu kweki na gi di wan sma e gi en srefi na ini na dini fu Gado moro soyfri?

¹² Fa yu kan kweki na gi disi di yu musu gi yu srefi na ini na dini fu Gado moro bun? Na apostru Petrus e gi wan sroto. Na ini 2 Petrus 1:5, 6 pe a e kari den eygifasi di musu moksi na wi bribi, dan a e kari sabi na fesi fu a gi di wan sma musu gi en srefi na ini na dini fu Gado. Na fesi na ini na srefi kapitri, a ben skrifi: „A gado krakti fu en ben gi unu na wan fri fasi ala den sani di de fu belang gi libi nanga na gi di wi e gi wi srefi na ini na dini fu Gado nanga yepi fu soyfri sabi fu na sma di kari wi” (2 Petrus 1:3). Petrus e tyari sobun na gi di wan sma musu gi en srefi na ini na dini fu Gado kon ini akruderi nanga soyfri sabi fu Yehovah.

13. Fu san-ede soyfri sabi de tumusi prenspari na ini na kweki fu na gi di wan sma e gi en srefi na ini na dini fu Gado?

¹³ Te yu luku en bun, dan a de wan sani di no kan fu kweki na gi di wan sma musu gi en srefi na ini na dini fu Gado sondro soyfri sabi. Fu san-ede? We, meki wi tyari kon na prakseri taki na gi di wan sma e gi en srefi na ini na dini fu Gado e du persoonlijk na Yehovah èn e kon a krin ini na fasi fa wi e libi. Soyfri sabi fu Yehovah de sobun prenspari, fu di dati wani taki fu leri sabi en persoonlijk, fu krosibey, kon sabi en fini fini nanga en eygifasi nanga pasi. Moro ete, a wani taki fu feti na baka fu waka na en baka (Efesiya sma 5:1). O moro wi e kon sabi fu Yehovah èn o moro bun wi e sori en pasi nanga en eygifasi na ini wi libi, o moro bun wi e leri sabi en (2 Korente sma 3:18; teki gersi 1 Yohanes 2:3-6). Disi e abi moro fara leki bakapisi wan moro dipi warderi gi Yehovah diri eygifasi, wan moro bigi marki fu na gi di wan sma e gi en srefi na ini na dini fu Gado.

14. Efu wi wani kisi soyfri sabi, dan san na programa fu wi fu persoonlijk studi musu abi na ini dan, èn fu san-ede?

¹⁴ Fa yu e kisi so wan soyfri sabi? No wan boropasi de. Fu kisi soyfri sabi dan wi musu de fayafaya na ini na stuka fu Gado Wortu èn den buku di abi den fondamenti tapu na beybri. Na so wan stuka nanga wi srefi yu abi wan fasti programa fu leysi beybri tu, so leki dati de tapu na schema fu na teyokrasiya diniwrokoskoro (Psalm 1:2). Fu di na beybri de wan kado fu Gado, dan san e du ini na tori fu persoonlijk beybristudi, de wan sori fu omeni wi e warderi na kado disi. San den gwenti fu yu fu persoonlijk studi e sori fu na dipi fu yu warderi gi den yeye sani di Yehovah seti? — Psalm 119:97.

15, 16. (a) San kan yepi wi fu kisi wan yeye apeteyti gi persoonlijk studi? (b) Efu wi persoonlijk beybristudi musu abi leki bakapisi taki wi kweki na gi di wan sma e gi en srefi na ini na dini fu Gado, dan san musu du baka te wi leysi wan pisi fu beybri?

¹⁵ Wi e agri, taki leysi nanga stuka no de wan makriki sani gi son sma. Ma nanga ten èn muyti yu kan wiki wan yeye apeteyti gi persoonlijk beybristudi (1 Petrus 2:2). Te yu go denki nanga warderi fu ala san Yehovah du, e du èn sa du ete gi yu, dan yu ati sa buweygi yu fu wani sabi someni leki a kan fu en. — Psalm 25:4.

¹⁶ Ma efu so wan persoonlijk beybristudi musu abi leki bakapisi taki yu e kweki a gi di yu musu gi yu srefi na ini na dini fu Gado, dan na marki fu yu no kan de nomo fu leysi wantu bladzijde di druk ofu fu furu yu frustan nomo nanga tori. Na presi fu dati, te yu e leysi wan pisi fu Gado Wortu, yu musu teki ten fu go denki dipi fu na materiaal èn aksi yu srefi aksi leki: ’San disi e leri mi fu den safu eygifasi èn pasi fu Yehovah? Fa mi kan kon gersi Yehovah moro na ini den kontren disi?’

17. (a) San wi e leri fu Yehovah sari-atifasi fu na buku Hoseya? (b) Fa na denki di wi e denki dipi fu Yehovah sari-atifasi sa abi krakti tapu wi?

¹⁷ Meki wi luku wan eksenpre. Wan pisiten psa kba na beybrileysi-schema fu na teyokrasiya diniwrokoskoro ben tyari unu psa na buku Hoseya. Baka di yu leysi na beybribuku disi, yu ben sa kan aksi yu srefi: ’San mi e leri fu Yehovah leki Persoon — den eygifasi nanga pasi fu en — ini na buku disi?’ Fu na fasi fa beybri skrifiman ben kobroyki na buku Hoseya bakaten, e sori taki wi e leri furu fu Yehovah safu sari-atifasi. (Teki gersi Mateyus 9:13 nanga Hoseya 6:6; Rome sma 9:22-26 nanga Hoseya 1:10 nanga 2:21-23.) Na de di Yehovah ben de klari fu sori Israèl sari-atifasi ben kon na fesi nanga na eksenpre fu fa Hoseya ben handri nanga en uma Gomer (Hoseya 1:2; 3:1-5). Ala di na trowe fu brudu, fufuru, sutadu nanga afkodrey ben de furu na ini Israèl, toku wi e leysi taki Yehovah ’ben taki nanga na ati fu Israèl’ (Hoseya 2:13, 14; 4:2). Yehovah no ben de fruplekti fu sori so wan sari-atifasi, ma ben sa du disi „fu en eygi friwani”, efu den Israèl sma ben sori opregti berow èn ben dray baka gi na sondu libi fu den (Hoseya 14:4; teki gersi Hoseya 3:3). Efu yu e go denki na so wan fasi fu Yehovah tumusi bigi sari-atifasi, dan a sa seki yu ati èn tranga na persoonlijk matifasi fu yu nanga en.

18. San yu ben sa kan aksi yu srefi efu yu ben prakseri fu Yehovah sari-atifasi so leki Hoseya e poti krakti na tapu dati?

¹⁸ Ma moro de fanowdu. „Koloku den sari-atiwan de, bika den sa sori den sari-atifasi”, Yeyses ben taki (Mateyus 5:7). Baka te yu go denki fu Yehovah sari-atifasi, so leki krakti e poti na tapu disi na ini na buku Hoseya, dan yu ben sa kan poti na aksi: ’Fa mi kan waka moro bun na baka Yehovah sari-atifasi na ini na fasi fa mi de nanga tra sma? Efu wan brada ofu sisa di sondu na mi ofu afrontu mi, e aksi mi pardon, mi e gi pardon dan „nanga prisiri”?’ (Rome sma 12:8; Efesiya sma 4:32) Efu yu e dini na ini na gemeente leki wan owruman di den poti ini na wroko dati, dan yu kan aksi yu srefi: ’Te mi e hori krutu afersi fa mi kan waka moro bun na baka Yehovah ini na fasi fa a e gi pardon, spesrutu te wan sma di du ogri trutru e sori opregti berow?’ (Psalm 86:5; Odo 28:13) ’Na san mi musu luku efu wan gron de fu kan sori sari-atifasi?’ — Teki gersi Hoseya 5:4 nanga 7:14.

19, 20. (a) San na a bakapisi te beybristudi e du tapu wan finifini fasi? (b) San na wan yepi moro fara fu kweki na gi di wan sma e gi en srefi na ini na dini fu Gado?

¹⁹ O fa na stuka nanga yusrefi e tyari wini kon te yu e du en na so wan soyfrifasi! Yu ati sa kon furu nanga warderi gi Yehovah diri eygifasi. Èn te ala ten baka yu e feti fu waka na baka den eygifasi disi ini yu libi, dan yu sa meki na matifasi fu yu nanga en kon moro tranga. Na a fasi dati yu sa feti na baka na gi di yu e gi yu srefi na ini na dini fu Gado leki wan dopu dienstknekti fu Yehovah di gi en srefi abra. — 1 Timoteyus 6:11.

²⁰ Moro yepi na ini na kweki fu na diri eygifasi disi wi kan feni na ini Yeyses Krestes — na volmaakti eksenpre fu na gi di wan sma musu gi en srefi na ini na dini fu Gado. Fa na waka na baka na eksenpre fu Yeyses Krestes sa de wan yepi gi yu, ini na kweki èn ini na sori fu na gi di yu e gi yu srefi na ini na dini fu Gado? Na artikel na tapu bladzijde 12 sa taki fu na afersi disi nanga trawan.

[Foetoewortoe]

San yu ben sa piki?

◻ Fu san-ede na dopu no de na lasti stap di yu e du na ini yu kresten waka nanga libi?

◻ San na gi di yu e gi yu srefi na ini na dini fu Gado wani taki, èn fa yu e sori disi?

◻ Fu san-ede krakti muyti de fanowdu fu kweki na gi di yu musu gi yu srefi na ini na dini fu Gado?

◻ Fa yu kan kweki na gi di yu e gi yu srefi na ini na dini fu Gado moro bun?