Moksi na oen horidoro a gi di oenoe e gi oensrefi na a dini foe Gado
„Moksi na oen bribi . . . horidoro, na oen horidoro a gi di oenoe e gi oensrefi na a dini foe Gado.” — 2 PETRUS 1:5, 6.
1, 2. (a) San ben pasa nanga Jehovah Kotoigi ini kondre di den Nasisma ben tiri foe bigin foe den jari baka 1930 èn foe san ede? (b) Fa a ben go nanga a pipel foe Jehovah na ondro na ogri-ati meshandri disi?
A BEN de wan doengroe pisi ten ini a historia foe a di foe 20 jarihondro. Foe bigin nanga den jari baka 1930, den ben kisi doesoendoesoen Jehovah Kotoigi ini den kondre di den Nasisma ben tiri èn na wan onregtfardikifasi den ben poti den na strafoe-oso èn ben trowe den na ini konsentrâsi kampoe. Foe san ede? Bika den ben prefoeroe foe tan neutraal èn ben weigri foe taki ’heil Hitler’. Fa den ben handri nanga den? „No wan tra groepoe strafoeman . . . ben kisi foe doe nanga so foeroe ogri-ati meshandri foe den SS-sroedati na so wan fasi, leki den Bijbel Ondrosoekoeman [Jehovah Kotoigi]. A ben de wan sortoe ogri-ati meshandri di ben abi leki a marki foe pina den doronomo, na skin fasi èn na froestan sei, wan pina di ben de so takroe, taki no wan enkri fasi de di joe man taki foe en.” — Karl Wittig, wan man di fosi ben de wan Doisri ofsiri foe lanti.
2 Fa a ben go nanga den Kotoigi? Doctor Christine E. King ben skrifi ini en boekoe The Nazi State and the New Religions: Five Case Studies in Non-Conformity: „Soso nanga den Kotoigi [tra fasi leki den tra kerki groepoe] lanti no ben man doe san a ben wani.” Ija, leki groepoe Jehovah Kotoigi ben tanapoe kánkan, srefi di disi ben wani taki gi hondrohondro foe den, taki den ben moesoe horidoro te na dede.
3. San ben meki Jehovah Kotoigi ben man horidoro na ondro hebi tesi?
3 San ben meki taki Jehovah Kotoigi ben man horidoro na ondro den sortoe tesi dati, no wawan na Nasi Doisrikondre, ma na heri grontapoe toe? Den hemel Tata ben jepi den foe horidoro, bika den ben gi densrefi na a dini foe Gado. „Jehovah sabi fa foe froeloesoe sma di gi densrefi na a dini foe en, poeroe den foe tesi”, na so na apostel Petrus e froeklari (2 Petrus 2:9). Moro na fesi ini a srefi brifi, Petrus ben gi den kresten rai: „Moksi na oen bribi . . . horidoro, na oen horidoro a gi di oenoe e gi oensrefi na a dini foe Gado” (2 Petrus 1:5, 6). So boen, horidoro abi foeroe foe doe nanga a gi di wan sma e gi ensrefi na a dini foe Gado. Te joe e loekoe en boen, dan efoe wi wani horidoro te na a kaba, dan wi moesoe ’soekoe foe gi wisrefi na a dini foe Gado’ èn sori dati toe (1 Timoteus 6:11). Ma san, te joe e loekoe en fini, na a gi di wan sma e gi ensrefi na a dini foe Gado?
San na a gi di wan sma e gi ensrefi na a dini foe Gado
4, 5. San na a gi di wan sma e gi ensrefi na a dini foe Gado?
4 Sma kan vertaal a Griki zelfstandig naamwortoe gi „a gi di wan sma e gi ensrefi na a dini foe Gado” (eu·seʹbei·a), troetroe nanga „abi wan joisti dipi lespeki fasi”.a (2 Petrus 1:6, Kingdom Interlinear). A e sori tapoe wan waran firi, di komopo foe na ati, gi Gado. So leki fa W. E. Vine e taki, dan a bijwortoe eu·se·besʹ, di wani taki troetroe „abi wan joisti dipi lespeki fasi”, wani taki „a krakti di dipi santa lespeki gi Gado e tiri, de foe si ini a gi di wan sma e gi ensrefi na a dini foe Gado”. — 2 Petrus 2:9, Int.
5 Den wortoe „a gi di wan sma e gi ensrefi na a dini foe Gado”, e sori foe dati ede tapoe na abi di wan sma abi dipi lespeki gi Jehovah noso a gi di wan sma e gi ensrefi na a dini foe en, di e meki wi doe sani di e plisi en. Disi wi e doe srefi ala di wi e tanapoe na fesi moeilek tesi, bika wi abi wan troetroe dipi lobi gi Gado. A de wan loyaal, persoonlijk firi di wi abi gi Jehovah, di de foe si na a fasi fa wi e libi a libi foe wi. Troe kresten e kisi a deki-ati foe begi taki den kan abi „wan safri èn korostoe libi nanga a gi di den e gi densrefi dorodoro na a dini foe Gado” (1 Timoteus 2:1, 2). So leki fa skrifiman foe wortoeboekoe J. P. Louw èn E. A. Nida e taki, dan „ini foeroe tongo [eu·seʹbei·a] ini 1 Tm 2.2 kan vertaal na wan joisti fasi nanga ’foe libi so leki fa Gado ben sa wani wi foe libi’ noso ’foe libi so leki fa Gado ben taigi wi foe libi’”.
6. San horidoro abi foe doe nanga a gi di wan sma moesoe gi ensrefi na a dini foe Gado?
6 Now wi kan froestan moro boen san horidoro èn a gi di wan sma e gi ensrefi na a dini foe Gado abi foe doe nanga makandra. Bika wi e libi leki fa Gado ben sa wani wi foe libi — nanga a gi di wi e gi wisrefi na a dini foe en — wi e tjari a si di grontapoe no wani si wi na ai, di sontron e tjari tesi kon na tapoe a bribi foe wi (2 Timoteus 3:12). Ma na no wan fasi wi ben sa man foe horidoro na ondro den sortoe tesi dati, efoe a no ben de foe di wi abi a persoonlijk firi gi a hemel Tata foe wi. Boiti dati, Jehovah e doe wan sani na tapoe so wan opregti fasi foe a gi di wan sma e gi ensrefi na a dini foe en. Prakseri nomo fa Gado moesoe firi te a e loekoe foe hemel kon na grontapoe èn e si den sma di e doe moeiti foe plisi en, bika den gi densrefi na a dini foe en, ala di den e kisi ala sortoe gens. A no de foe froewondroe taki a abi a firi foe „froeloesoe sma di gi densrefi na a dini foe Gado poeroe foe tesi”!
7. Foe san ede sma moesoe kweki a gi di den e gi densrefi na a dini foe Gado?
7 Ma wi no gebore nanga a gi di wan sma e gi ensrefi na a dini foe Gado, èn a no foe di wi papa nanga mama e dini Gado, wi e kisi disi foe den (Genesis 8:21). Na presi foe dati, wi moesoe meki na eigifasi dati gro (1 Timoteus 4:7, 10). Wi moesoe doe moeiti foe moksi a gi di wi e gi wisrefi na a dini foe Gado, na wi horidoro èn na wi bribi. Disi, Petrus e taki, wani taki foe doe „serjoesoe moeiti” (2 Petrus 1:5). Fa dan, wi kan kisi a gi di wan sma e gi ensrefi na a dini foe Gado?
Fa wi e kisi a gi di wan sma e gi ensrefi na a dini foe Gado?
8. San na a sroto foe kisi a gi di wan sma e gi ensrefi na a dini foe Gado, so leki fa na apostel Petrus e taki?
8 Na apostel Petrus ben tjari kon na krin san na a sroto foe kisi a gi di wan sma e gi ensrefi na a dini foe Gado. A ben taki: „Meki a no froedini boen-atifasi nanga vrede kon moro foeroe na ini joe nanga jepi foe wan soifri sabi foe Gado nanga Jesus, wi Masra, foe di a gado krakti foe en gi wi ala den sani na wan fri fasi di de prenspari gi libi nanga a gi di wan sma e gi ensrefi na a dini foe Gado nanga jepi foe soifri sabi foe a sma di kari wi nanga jepi foe glori èn boenfasi” (2 Petrus 1:2, 3). So boen, efoe wi wani moksi a gi di wan sma e gi ensrefi na a dini foe Gado na wi bribi èn horidoro, dan wi moesoe gro ini soifri sabi, dati wani taki, heri boen noso dorodoro sabi foe Jehovah Gado nanga Jesus Krestes.
9. Fa wi kan agersi en taki na abi di wan sma abi wan soifri sabi foe Gado nanga Krestes wani taki moro leki soso a sabi di wan sma sabi soema na den?
9 San a wani taki foe abi soifri sabi foe Gado nanga Krestes? A de krin taki a wani taki moro leki soso foe sabi soema na den. Foe agersi disi: Joe sabi kande soema na joe birman èn kande joe e bari en odi na en nen srefi. Ma joe ben sa leni en wan bigi moni? No te leki joe sabi troetroe sortoe sma a de. (Teki gersi Odo 11:15.) So a de toe, taki foe sabi Jehovah èn Jesus soifri noso dorodoro wani taki moro leki soso foe bribi taki den de èn foe sabi a nen foe den. Efoe wi wani horidoro na ondro tesi foe den nen ede, srefi te na dede, dan troetroe wi moesoe sabi den heri boen (Johanes 17:3). San disi wani taki?
10. Sortoe toe sani de na ini na abi di wan sma abi soifri sabi foe Jehovah nanga Jesus èn foe san ede?
10 A abi foe soifri noso dorodoro sabi foe Jehovah nanga Jesus wani taki toe sani: (1) foe leri sabi den leki sma — den eigifasi, den firi èn den fasi foe den — èn (2) foe waka baka na eksempre foe den. A gi di wan sma e gi ensrefi na a dini foe Gado wani taki wan dipi persoonlijk firi gi Jehovah èn a de krin foe si na a fasi fa wi e libi a libi foe wi. Foe dati ede, foe kisi na eigi fasi disi, wi moesoe leri sabi Jehovah persoonlijk èn kon sabi dorodoro san na a wani nanga den fasi foe en, so fara leki wan libisma man doe dati. Foe sabi Jehovah troetroe, a sma di ben meki wi na a fasi fa en tan, dan wi moesoe gebroiki a sabi dati èn doe moeiti foe de leki en (Genesis 1:26-28; Kolosesma 3:10). Èn foe di na wan volmaaktifasi Jesus ben waka na Jehovah baka ini san a ben taki èn doe, dan foe sabi Jesus soifri na wan warti jepisani foe kweki a gi di wi e gi wisrefi na a dini foe Gado. — Hebrewsma 1:3.
11. (a) Fa wi kan kisi soifri sabi foe Gado nanga Krestes? (b) Foe san ede a de prenspari foe prakseri dipi foe san wi leisi?
11 Ma fa wi kan kisi so wan soifri sabi foe Gado nanga Krestes? Foe di wi e studeri bijbel nanga den poeblikâsi di abi den fondamenti na tapoe bijbel, fajafaja.b Ma efoe wi persoonlijk bijbel studie moesoe abi leki bakapisi taki wi man gi wisrefi na a dini foe Gado, dan a de prenspari taki wi e teki ten foe prakseri dipi foe san wi e leisi, dati wani taki foe loekoe sani finifini noso prakseri boen foe den. (Teki gersi Josua 1:8.) Foe san ede disi prenspari? Memre taki a gi di wi e gi wisrefi na a dini foe Gado na wan waran, dipi firi gi Gado. Na ini den Boekoe foe bijbel, a prakseri di wan sma e prakseri dipi foe sani, abi foe doe ibritron baka nanga na agersi ati — a sma foe inisei (Psalm 19:14; 49:3; Odo 15:28). Te wi e loekoe sani finifini foe man froestan san wi leisi, dan a e saka go na a sma di wi de foe inisei, so boen a e wiki den firi foe wi èn a abi krakti na tapoe wi denki. Soso na a fasi dati studeri kan krakti a persoonlijk firi di wi abi gi Jehovah èn boeweigi wi foe libi na wan fasi di e plisi Gado srefi te wi e tanapoe na fesi moeilek omstandigheid noso tesi.
A gi di wan sma e gi ensrefi na a dini foe Gado, na oso
12. (a) Fa wan kresten kan doe a gi di a moesoe gi ensrefi na a dini foe Gado na oso, so leki fa Paulus ben taki? (b) Foe san ede troe kresten e sorgoe gi papa nanga mama di kon owroe?
12 A gi di wan sma e gi ensrefi na a dini foe Gado moesoe doe na oso fosi. Na apostel Paulus e taki: „Efoe wan weduwe abi pikin noso granpikin, meki den dati leri fosi foe gi densrefi na a dini foe Gado ini den eigi osofamiri èn tan pai wan paiman di fiti na den mama nanga papa èn granpapa nanga granmama foe den, bika disi switi na ini na ai foe Gado” (1 Timoteus 5:4). Foe sorgoe gi owroe papa nanga mama, so leki fa Paulus taki, na wan fasi foe sori a gi di wan sma e gi ensrefi na a dini foe Gado. Troe kresten e gi a sorgoe dati no soso foe di den e firi froeplekti foe doe so, ma bika den lobi a papa nanga mama foe den. Ma boiti dati, den e erken a prensparifasi di Jehovah e poti na a sorgoe di wan sma moesoe sorgoe gi en osofamiri. Den sabi heri boen taki te den e drai den baka gi a papa nanga mama foe den ini wan ten foe nowtoe, taki dati ben sa de a srefi leki foe ’drai den baka gi a kresten bribi’. — 1 Timoteus 5:8.
13. Foe san ede a gi di wan sma moesoe gi ensrefi na a dini foe Gado na oso, kan de wan troetroe tjalensi, ma san na den bakapisi di e gi satisfaksi te wan sma e sorgoe gi en papa nanga mama?
13 Wi moesoe erken taki, a no ala ten a de makriki foe wi gi wisrefi na a dini foe Gado na oso. Osofamiri memre kan de aparti foe makandra, foe di den e libi boen fara foe makandra. Den pikin di kon bigi e sorgoe gi den eigi osofamiri kande èn den e feti foe tan na libi na ekonomia sei kande. A fasi fa noso omeni sorgoe wan papa noso mama abi fanowdoe, kan aksi foeroe foe a gosontoe foe a skin, a denki èn den firi foe a sma di moesoe gi a sorgoe dati. Ma tokoe troetroe satisfaksi kan de te den sabi taki a sorgoe dati gi a papa nanga mama foe den, no wani taki wawan „wan paiman di fiti”, ma a e plisi a Sma toe „foe soema ibri famiri na hemel èn grontapoe kisi den nen”. — Efeisesma 3:14, 15.
14, 15. Froeteri foe wan eksempre foe a sorgoe di pikin ben sorgoe gi wan papa na a fasi di Gado lobi?
14 Go loekoe wan eksempre di e naki sma ati troetroe. Ellis nanga feifi foe den brada nanga sisa foe en ben abi wan troetroe moeilek wroko foe sorgoe gi a papa foe den na oso. „Ini 1986 mi papa ben kisi wan boeroertoe, di ben lan en krinkrin”, Ellis e tjari kon na krin. Den siksi pikin prati a sorgoe di den moesoe sorgoe gi den sani di a papa abi fanowdoe, foe a wasi di den e wasi en te nanga a sorgoe di den e sorgoe taki doronomo den e drai en ini en bedi, so taki a bedi no e gi en soro foe di a didon toemoesi langa na a wan sei. „Wi e leisi gi en, taki nanga en, prei pokoe gi en. Wi no de seiker efoe a sabi san e pasa lontoe en, ma wi e doe nanga en neleki a sabi ala sani heri boen.”
15 Foe san ede den pikin e sorgoe a papa foe den, so leki fa den e doe? Ellis e go doro: „Baka a dede foe a mama foe wi ini 1964, pâ wawan sorgoe wi. Na a ten dati wi ben abi 5 te nanga 14 jari. A ben de klariklari foe jepi wi; now wi de klariklari foe jepi en.” A de krin, taki a no makriki foe gi so wan sorgoe, èn den pikin e lasi-ati sontron. „Ma wi e froestan taki a kondisi foe a papa foe wi a no foe ala ten”, Ellis e taki. „Wi e wakti a ten te a papa foe wi sa kisi wan boen gosontoe baka èn wi kan de makandra baka nanga a mama foe wi” (Jesaja 33:24; Johanes 5:28, 29). Foe troe, so wan troetroe lobi gi wan papa noso mama moesoe waran na ati foe a Sma di e gi pikin a komando foe gi grani na den papa nanga mama!c — Efeisesma 6:1, 2.
A gi di wan sma e gi ensrefi na a dini foe Gado èn a diniwroko
16. San moesoe de a moro prenspari reide di e meki wi doe a diniwroko?
16 Te wi e teki a kari foe Jesus foe ’waka doronomo na en baka’, dan wi e kon na ondro wan wroko di Gado gi wi foe preiki a boen njoensoe foe a Kownoekondre èn foe meki disipel (Mateus 16:24; 24:14; 28:19, 20). A de krin, taki foe abi wan prati ini a diniwroko na wan kresten froeplekti ini den „lasti dei” disi (2 Timoteus 3:1). Ma a reide di wi abi foe preiki èn foe gi sma leri, moesoe de moro leki soso wan firi foe doe wan wroko noso wan froeplekti. Wan dipi lobi gi Jehovah moesoe de a moro prenspari reide gi san wi e doe èn omeni wi e doe ini a diniwroko. „Foe san di de pasa marki na wi ati, na foe dati wi e taki”, Jesus ben taki (Mateus 12:34). Ija, te wi ati abi lobi pasa marki gi Jehovah, dan wi e firi a krakti foe gi kotoigi foe en na trawan. Te a lobi gi Gado na a sani di e boeweigi wi, dan a diniwroko foe wi de wan warti fasi foe sori a gi di wi e gi wisrefi na a dini foe Gado.
17. Fa wi kan kweki a joisti boeweigi foe ati gi a diniwroko?
17 Fa wi kan kweki a joisti boeweigi foe ati gi a diniwroko? Loekoe finifini foe man froestan, den dri reide di Jehovah gi wi foe lobi en. (1) Wi lobi Jehovah foe san a doe kaba gi wi. A no ben kan sori moro bigi lobi leki foe sorgoe gi a loesoe paiman (Mateus 20:28; Johanes 15:13). (2) Wi lobi Jehovah foe san a e doe now gi wi. Wi de fri foe taki nanga Jehovah, di e piki den begi foe wi (Psalm 65:2; Hebrewsma 4:14-16). Te wi e poti den Kownoekondre afersi na a fosi presi, dan wi sa abi den sani di wi abi fanowdoe ini a libi (Mateus 6:25-33). Doronomo wi e kisi njanjan na jeje fasi di e jepi wi foe kakafoetoe gi den problema di e miti wi (Mateus 24:45). Èn wi abi a blesi taki wi de wan pisi foe a kresten bradafasi na heri grontapoe di e poti wi troetroe aparti foe a tra pisi foe grontapoe (1 Petrus 2:17). (3) Wi lobi Jehovah toe foe san a sa doe ete gi wi. Bika foe a lobi foe en, wi „graboe hori a troetroe libi boen steifi” — têgo libi ini a ten di de na wi fesi (1 Timoteus 6:12, 19). Te wi e loekoe a lobi di Jehovah abi gi wi, dan foe troe na ati foe wi sa boeweigi wi foe abi wan troetroe prati foe froeteri trawan foe en èn den diri marki di a abi na prakseri! Trawan no sa abi foe froeteri wi san foe doe noso omeni wi moesoe doe ini a diniwroko. Na ati foe wi sa boeweigi wi foe doe san wi kan.
18, 19. Sortoe hendri wan sisa ben wini foe man teki prati na a diniwroko?
18 Srefi nanga moeilek omstandigheid na wi fesi, wan ati di e kisi deki-ati nanga jepi foe a gi di wi e gi wisrefi na a dini foe Gado, sa boeweigi wi foe taki. (Teki gersi Jeremia 20:9.) Disi wi e si ini a kefal foe Stella, wan kresten oema di ben sjen srefisrefi. Di a ben bigin fosi foe studeri bijbel, a ben prakseri: ’Noiti mi sa man go oso foe oso!’ A ben tjari kon na krin: „Ala ten mi ben de tiri srefisrefi. Noiti mi ben man go na trawan foe bigin wan takimakandra nanga den.” Di a ben go doro foe studeri, en lobi gi Jehovah ben gro, èn a ben kweki wan fajafaja angri foe taki foe en nanga trawan. „Mi e memre taki mi ben froeteri a sma di gi mi leri foe bijbel: ’Mi wani foe taki troetroe, ma mi no man, èn nanga dati mi e broko mi ede srefisrefi.’ Noiti mi sa frigiti san a taigi mi: ’Stella, de grantangi taki joe wani taki.’”
19 Heri esi Stella ben feni ensrefi e gi kotoigi na en birfrow. Baka dati a ben doe wan sani di ben de wan toemoesi bigi sani gi en foe doe — fositron a ben go na a oso-foe-oso diniwroko (Tori foe den Apostel 20:20, 21). A e memre: „Mi ben skrifi a pristeri foe mi tapoe wan pisi papira. Ma mi ben frede so foeroe, taki, ala di mi ben abi a papira na mi fesi, mi senwe ben e trobi mi someni taki mi no ben man loekoe na san mi ben skrifi!” Now, moro leki 35 jari baka dati, Stella de wan toemoesi sjensjen sma ete. Ma tokoe, a lobi a velddienst èn a e go doro foe abi wan warti prati na dati.
20. Sortoe eksempre e sori taki srefi froefolgoe noso a poti di den e poti den na strafoe-oso no kan tapoe a mofo foe Kotoigi foe Jehovah di gi densrefi na a dini foe en?
20 Srefi froefolgoe noso a poti di den ben poti den na strafoe-oso no kan tapoe den mofo foe den Kotoigi foe Jehovah, di gi densrefi na a dini foe en. Loekoe na eksempre foe Ernst nanga Hildegard Seliger foe Doisrikondre. Foe a bribi foe den, makandra den ben de moro leki 40 jari ini Nasi konsentrâsi kampoe nanga komunist strafoe-oso. Srefi ini strafoe-oso, den ben horidoro foe gi kotoigi na tra strafoeman. Hildegard e memre: „Den basi foe a strafoe-oso ben si mi leki toemoesi kefarlek, bika, so leki fa wan oema-waktiman ben taki en, heri dei mi ben taki foe bijbel. Foe dati ede den ben poti mi na wan doengroe-oso kamra te na ondrogron.” Baka di brada nanga sisa Seliger te foe kaba ben kisi a fri foe den baka, den ben gi ala den ten na a kresten diniwroko. Den ala toe ben dini getrow te na a dede foe den, brada Seliger ini 1985 èn a wefi foe en ini 1992.
21. San wi moesoe doe foe moksi a gi di wi e gi wisrefi na a dini foe Gado na a horidoro foe wi?
21 Foe di wi e studeri a Wortoe foe Gado fajafaja èn e teki ten foe prakseri dipi nanga foeroe warderi foe san wi e leri, wi sa gro ini a soifri sabi foe Jehovah Gado nanga Jesus Krestes. Disi sa abi leki bakapisi, taki wi e kisi wan dorodoro marki foe a diri eigifasi disi — a gi di wi e gi wisrefi na a dini foe Gado. Sondro a gi di wi e gi wisrefi na a dini foe Gado, no wan fasi de taki wi man horidoro na ondro den difrenti tesi di wi leki kresten e kisi. Foe dati ede, meki wi waka baka a rai di Petrus ben gi wi foe go doro foe ’moksi na wi bribi horidoro èn na wi horidoro a gi di wi e gi wisrefi na a dini foe Gado’. — 2 Petrus 1:5, 6.
[Foetoewortoe]
a William Barclay e taki foe a wortoe eu·seʹbei·a: „Na a seb- pisi [a roetoe] foe a wortoe di wani taki abi dipi lespeki gi noso anbegi. Eu na a Griki wortoe gi boen; foe dati ede, eusebeia na anbegi, abi boen dipi lespeki èn di gi na wan joisti fasi.” — New Testament Words.
b Foe kon sabi san taki kaba foe a tori fa foe studeri foe kan kisi moro sabi foe Gado Wortoe, loekoe A Waktitoren foe 1 augustus 1993, bladzijde 19-24.
c Foe kon sabi dorodoro san taki foe a fasi fa wan sma moesoe gi ensrefi na a dini foe Gado foe di a e sorgoe owroe papa nanga mama, loekoe A Waktitoren foe 1 juni 1987, bladzijde 6-10.
San na joe piki?
◻ San na a gi di wan sma e gi ensrefi na a dini foe Gado?
◻ San horidoro abi foe doe nanga a gi di wan sma e gi ensrefi na a dini foe Gado?
◻ San na a sroto foe kisi a gi di wan sma e gi ensrefi na a dini foe Gado?
◻ Fa wan kresten kan gi ensrefi na a dini foe Gado na oso?
◻ San moesoe de a moro prenspari reide di e meki wi doe a diniwroko?
[Prenki na tapoe bladzijde 31]
Den Kotoigi foe Jehovah di den ben poti na ini den Nasi konsentrâsi kampoe na Ravensbrück, ben sori horidoro nanga a gi di den ben e gi densrefi na a dini foe Gado