Fa wan kresten moesoe tjari ensrefi na skoro
1 Efoe joe na wan kresten jongoewan di e go na skoro ete, dan joe abi tranga bribi fanowdoe foe tan hori joe soifri retifasi. Joe e kon na ini situwâsi pe takroe kompe kan abi krakti na joe tapoe, nanga situwâsi di kan de wan tesi tapoe joe bribi. A de prenspari taki joe doe wan sani na tapoe a rai foe Petrus foe „tjari [joe]srefi na wan toemoesi boen fasi na mindri den nâsi, so taki . . . leki wan bakapisi foe den toemoesi boen wroko foe [joe], foe san den de aikotoigi, den kan gi Gado grani” (1 Petr. 2:12). Joe abi deki-ati nanga wan fasti bosroiti fanowdoe foe man kakafoetoe gi den tjalensi disi.
2 Tapoe skoro noso baka skoro, doronomo joe e kisi foe doe nanga den takroe gwenti di abi krakti di e pori, di abi foe doe nanga sekslibi fosi joe trow, doti-taki, tabaka, nanga a fowtoe gebroiki foe drug. Ala dei joe e kisi foe doe nanga tesi di kan meki a boen nen di joe abi leki wan sma nanga boen maniri, kon ini kefar. Neleki bigisma, joe toe moesoe „feti wan tranga feti foe a bribi” efoe joe wani foe horidoro na ondro den sortoe tesi dati.—Jud. 3; loekoe A Waktitoren foe 15 juli 1991, bladzijde 23-26.
3 Na skoro, joe abi nationalistis ceremonia nanga grontapoe fesa. Joe sabi sortoe fesadei foe a kondre nanga relisi fesadei den e meki go na fesi tapoe joe skoro? Efoe wan situwâsi di de wan tjalensi e opo ede kon, dan joe ben kan „hori wan boen konsensi, so taki . . . den sma kan kisi sjen, di e taki takroe foe a boen fasi fa joe e tjari [joe]srefi”.—1 Petr. 3:16.
4 Den aktiviteit leki sport noso tra sani di no de wan pisi foe joe skoroprograma kan de wan tesi di kan kori joe. Joe moesoe loekoe boen foe si fa den sani disi, di gersi sani di joe kan feni prisiri na ini den, no meki taki joe e skeki nanga joe bribi. A de fanowdoe foe froekisi kompe nanga soema joe kan njan boen foe „a gi foe deki-ati a wan na a trawan”, èn ibriwan foe wi e kisi tranga nanga jepi foe a bribi foe a trawan.—Rom. 1:12.
5 Joe kan horidoro, nanga jepi foe Jehovah: Satan e tesi joe bribi nomonomo. Den tesi di joe moesoe pasa, kan hebi, ma den pai di joe sa kisi e meki taki a de warti foe horidoro (1 Petr. 1:6, 7). Joe no kan horidoro joe wawan; joe moesoe loekoe go na Jehovah foe jepi joe. Jesus ben gi den disipel foe en tranga foe: „Tan na ai èn begi doronomo, foe oenoe no kon na ini tesi” (Mat. 26:41). Tranga leri nanga a dwengi di joe moesoe dwengi joesrefi de tranga fanowdoe.—1 Kor. 9:27.
6 Memre alaten taki joe moesoe gi frantiwortoe na Jehovah foe a fasi fa joe e tjari joesrefi (Preik. 11:9). Awansi trawan kande no e si san joe e doe, tokoe Jehovah sabi san joe e doe èn a sa kroetoe joe (Hebr. 4:13). Wan opregti angri foe plisi Jehovah moesoe boeweigi joe foe ’wroko tranga foe kan kisi froeloesoe, ala di [joe] e frede èn e beifi’ (Fil. 2:12). A leisi di joe e leisi Gado Wortoe ala dei, na wan bigi jepi. A lai nanga kefalek boen rai, nanga toemoesi boen eksempre foe waka na den baka.—Hebr. 12:1-3.
7 Mama nanga papa, joe abi wan toemoesi prenspari ròl. Joe moesoe tiri joe pikin, e sabi den problema di den e miti, èn gi jepi te a de fanowdoe. Joe abi wan boen nen na joe pikin? Joe prani na ini den pikin foe joe a sabi foe den wet nanga den markitiki foe Gado na so wan fasi taki den kan warderi dati. Te joe pikin kisi kwinsi noso tesi, den de tranga, noso den e gi abra esi-esi? Den e lasi-ati foe di den moesoe difrenti foe den speri foe den? Leki mama nanga papa, joe abi a frantiwortoe foe jepi den (Deut. 6:6, 7) Efoe joe doe joe wroko boen, dan joe kan jepi den foe de winiman na ini a feti foe a bribi.—Odo 22:6.