Waka baka a bribi foe den
1 Na apostel Paulus ben taki foe bribi leki „a seiker froewakti foe sani di sma e howpoe tapoe, a krinkrin demonstrâsi foe sani di de troe, ala di sma no man si den”. A ben taki toe dati ’sondro bribi wan sma no man plisi Gado na wan boen fasi’ (Hebr. 11:1, 6). Paulus ben gi wi tranga foe kweki bribi, èn foe abi foeroe bribi, èn foe soekoe en. — 2 Kor. 4:13; Kol. 2:7; 2 Tim. 2:22.
2 Foeroe toemoesi moi eksempre foe bribi skrifi na ini bijbel. Na ini Hebrewsma kapitel 11 Paulus e gi wan langa lijst foe kotoigi di ben sori tranga bribi. So srefi tapoe a lijst disi na Abel, di ben de a fosiwan di sma kiri foe en bribi ede. Noa de tapoe a lijst bika foe en bribi ede a ben sori a frede gi Gado di ben de fanowdoe foe kibri en osofamiri. Bijbel e prèise Abraham foe en bribi èn foe a gi di a gi jesi ede. Den e prèise Moses bika foe en bribi ede a ben tan stanfaste, neleki a ben si a Sma di wi no kan si. A lijst foe sma di de leki eksempre ben langa so kefalek dati Paulus ben taki dati a no ben sa abi ten nofo foe froeteri foe den alamala. Fa wi de nanga tangi taki wi kan meki wi bribi kon moro tranga foe di wi e leisi baka foe den „santa waka nanga libi èn doe foe sma di gi densrefi na ini a dini foe Gado”! — 2 Petr. 3:11.
3 Na ini a fosi jarihondro Jesus ben poti na aksi: „Te a Manpikin foe libisma doro, dan a sa feni bribi troetroe na grontapoe?” (Luk. 18:8) We dan, wi abi eksempre foe sma nanga bribi di de na libi na wi mindri na ini a ten disi? Wi e si man nanga oema, so srefi jongoewan nanga owroewan, di e sori tranga bribi na ini Jehovah leki fa dati ben de troe nanga a pipel foe Gado na ini bijbel ten?
4 Eksempre foe sma nanga bribi na ini a ten disi: Toemoesi moi eksempre foe sma nanga bribi de foe feni na ala sei lontoe wi! A bribi foe den owroeman di e teki fesi na wi mindri de warti foe waka na baka (Hebr. 13:7). Ma a no soso den wawan de wan eksempre na ini bribi. Na ini ibri gemeente loyaal sma de di abi wan langa historia foe diniwroko na wan getrowfasi gi Jehovah, èn foeroe tron diniwroko di den e doe na ondro boen moeilek situwâsi.
5 Wi moesoe abi warderi gi den getrow sisa foe wi di e njan pina someni jari langa foe masra di e gens den. Papa noso mama di de den wawan kisi foe doe nanga a tjalensi foe kweki pikin. Weduwe di moro owroe, de na wi mindri di no e misi noiti na den gemeente aktiviteit, ala di kande den no abi wan osofamiri foe jepi den. (Teki gersi Lukas 2:37.) Wi e froewondroe foe a bribi foe den wan di abi foe doe nanga problema na gosontoe sei di no e kaba. Foeroe foe den e tan dini loyaal ala di den abi sani di e skotoe den foe kan kisi moro grani na ini a diniwroko. Jongoe Kotoigi de, di ben sori bribi tapoe wan deki-ati fasi ala di den e kisi gens na skoro. A gi di wi e gi wisrefi na Gado e kon moro bigi te wi e si getrow pionier di e horidoro jari baka jari, ala di den abi foeroe problema. Neleki Paulus, wi no ben sa abi ten nofo efoe wi ben sa proeberi foe froeteri ala den ondrofenitori na ini a Kownoekondre diniwroko èn sani di den brada nanga sisa ben doe di ben sori a bribi foe den!
6 Den eksempre disi foe getrow-wan e gi wi trowstoe nanga deki-ati (1 Tes. 3:7, 8). Na wan boen sani te wi e waka baka a bribi foe den, bika „den wan di e doe sani na ini getrowfasi de wan prisiri gi [Jehovah]”. — Odo 12:22.