Switi takimakandra kan doro na ati
1 Wi kan taki foe wan takimakandra leki wan „kenki foe prakseri foe di sma e taki nanga makandra”. Te wi e bigin nanga switi takimakandra foe wan thema foe sani di e gi tra sma broko-ede, dan wi kan hari a belangstelling foe den èn a kan jepi wi foe doro na ati foe den nanga a Kownoekondre boskopoe. Ondrofeni sori taki a moro boen foe meki sma abi wan switi nanga moi takimakandra leki foe hori wan lezing gi den.
2 Fa foe bigin wan switi takimakandra: A man di wi man foe hori takimakandra nanga trawan no wani taki dati wi abi foe taki foe foeroe penti èn leisi bijbel tekst baka makandra. A wani taki nomo foe kisi a sma foe taki nanga wi. Foe eksempre, te wi abi wan switi takimakandra nanga birtisma foe wi di e libi leti na wi sei, a no strak. Wi no e prakseri san wi sa taki, ma wi e piki nomo soleki fa wi gwenti tapoe den idea di a e tjari kon na fesi. A sori di wi e sori opregti belangstelling gi san a e taki kan gi en deki-ati foe tan taki nanga wi. Na so a moesoe de te wi e gi trawan kotoigi.
3 Wi kan gebroiki thema soleki takroedoe, den problema di jongoewan abi, tori di abi foe doe nanga a kondre, den grontapoe situwâsi, noso srefi a weer wi kan gebroiki foe bigin switi takimakandra. Tori di abi langalanga foe doe nanga a libi foe sma, boen srefisrefi foe wiki a belangstelling foe den. Te wan takimakandra bigin kaba, wi kan drai en na wan switi fasi go tapoe a Kownoekondre boskopoe.
4 A abi di wi abi wan takimakandra di no strak, no wani taki dati a sreka na fesi no de fanowdoe. A de fanowdoe. Ma a no de fanowdoe foe hori wisrefi strak na wan sani di skrifi na tapoe papira noso foe hori wan lezing di wi leri na ede, foe di a ben sa abi wan takimakandra leki bakapisi di no makriki, èn di joe no man kenki foe fiti na a fanowdoe foe a sma tapoe a momenti dati. (Teki gersi 1 Korentesma 9:20-23.) Wan toemoesi boen fasi foe sreka wisrefi, na foe teki wán noso toe bijbel thema, nanga a marki foe bow den takimakandra lontoe den. A loekoe di wi e loekoe den thema di de foe feni na ini a Redeneren-boekoe (Taki-go-taki-kon-boekoe) baka, sa sori foe de wan jepi gi disi.
5 Den eigifasi di de fanowdoe gi wan switi takimakandra: Te wi e taki nanga trawan, wi moesoe abi waran firi èn de opregti. Wan prisiri fesi èn wan fasi pe sma e si taki wi breiti, e sori den eigifasi disi. Wi abi a moro boen boskopoe na grontapoe; moro foeroe a e hari sma di abi wan ati di opregti. Efoe den e si taki a belangstelling foe wi gi den abi leki gron wan opregti wani foe prati a boen njoensoe nanga den, dan dati kan boeweigi den foe arki. — 2 Kor. 2:17.
6 Wan takimakandra di wi abi nanga sma moesoe de wan prisiri sani. Foe dati ede, wi moesoe abi switifasi èn abi takt te wi e pristeri a Kownoekondre boskopoe (Gal. 5:22; Kol. 4:6). Doe moeiti foe meki a sma abi wan positief loekoe tapoe den Kotoigi foe Jehovah te wi e gowe. Na so wan fasi, srefi efoe wi no abi wan boen bakapisi a fosi tron foe doro en ati, a kan meki a wani arki moro esi-esi a tra leisi te wan Kotoigi e taki nanga en.
7 Foe kan bigin wan switi takimakandra a no a bakapisi foe a sabi di wi sabi wan moeilek lezing boen. A de a wiki di wi e wiki belangstelling nomo gi wan thema foe wan sani di e gi a sma broko-ede. Te wi sreka wisrefi na fesi, dan wi sa de klariklari foe abi switi takimakandra nanga sma. Meki wi doe tranga moeiti foe doro den ati foe den wan di wi e miti, foe di wi e prati nanga den a moro boen njoensoe di de foe feni, a di foe den têgo Kownoekondre blesi. — 2 Petr. 3:13.