Fa fu preiki moro bun​—Bigin taki wan tori nanga wan sma fu kan feni na okasi fu preiki gi en

Yesus ben feni okasi fu preiki gi wan uma fu Samaria, fu di a bigin taki wan tori nanga en. San o meki en moro makriki gi wi fu bigin wan tori nanga sma di wi no sabi?

• Sori switifasi èn taki nanga sma. Aladi Yesus ben weri, toku a bigin taki wan tori nanga wan uma. A aksi en pikinso watra fu dringi. Kande yu kan gi wan sma wan switi odi, èn baka dati yu kan taki wan sani fu a weer, noso fu wan tra sani di pasa. Hori na prakseri taki yu no wani preiki wantewante gi a sma, sobun, taki fu iniwan sani di kan hari a prakseri fu en. Efu a no piki yu, dan pruberi fu taki nanga wan tra sma. Aksi Yehovah fu gi yu deki-ati.​—Ne 2:4; Tor 4:29.

• Gebroiki ibri okasi fu taki nanga sma fu a bun nyunsu, ma teki yu ten fu du dati. Efu yu e feti fu preiki gi a sma, dan kande a o bigin firi fruferi èn a no o wani taki moro nanga yu. Yu no abi fu lasi-ati efu yu no e feni okasi fu preiki gi en. Efu yu feni en muilek fu bigin taki fu a bun nyunsu na ibri okasi, dan pruberi fu taki tori nanga sma sondro taki yu e suku fu preiki gi den. [Prei felem 1 èn taki fu en.]

• Suku wan okasi fu preiki gi a sma. Kande yu kan taki wan moi sani fu a bribi fu yu di kan meki taki a o wani sabi moro. Fu di den sani di Yesus ben taki, ben e hari a prakseri fu na uma, meki a poti aksi gi Yesus. Di Yesus ben e piki den aksi fu na uma, dan fu taki en leti a ben e fruteri en fu a bun nyunsu. [Prei felem 2 èn taki fu en. Baka dati, prei felem 3 èn taki fu en.]