Hori oso-bijbelstudie di e meki go na fesi
1 Sortoe sani wan zuster na Tansania, wan jongoe oemapikin na Argentina, nanga wan mama na Latfia abi a srefi? A Jaarboek 1997 (bladzijde 8, 46, nanga 56) e froeteri taki den ala dri ben go esi-esi na fesi nanga den oso-bijbelstudie foe den, foe di den ben abi a wani foe doe moro leki wán pisi ibri wiki na ini a Sabi-boekoe. Wi rikomanderi taki te a kan, den preikiman moesoe doe moeiti foe doe wán kapitel foe a boekoe ibri leisi te den e hori a studie. Ma, son sma e feni taki a moeilek foe doe dati. Ala di foeroe sa anga foe den omstandigheid èn foe a fasi fa ibri studenti man teki leri, tokoe den leriman di abi ondrofeni abi boen bakapisi di den ben gebroiki den rai disi di e kon now.
2 Soleki fa wi ben taki na ini na inlegvel foe Wi Kownoekondre Dienst foe juni 1996, a de fanowdoe foe leri den studenti foe joe foe sreka densrefi na tapoe a studie. Na a bigin kaba, a ben sa boen foe tjari kon na krin èn foe demo fa disi e doe. Sori den joe persoonlijk studie eksemplaar foe a Sabi-boekoe. Sreka a fosi lès makandra nanga en. Jepi den studenti foe feni den prenspari wortoe noso lin di e gi piki wantewante na tapoe na aksi di skrifi èn poti wan marki na ondro den piki. Wan toe preikiman gi den studenti foe den srefi wan kloroe pen. Gi den deki-ati foe soekoe ala den tekst te den e sreka densrefi gi a studie. Te joe e doe disi, dan joe sa leri den toe foe sreka densrefi foe fisiti a gemeente boekoestudie nanga a Waktitoren-studie.—Luk. 6:40.
3 Wan boen leriman sa meki a studenti taki na wan fri fasi èn ensrefi no sa taki toemoesi foeroe. A no sa meki taki den penti di no de so prenspari poeroe en prakseri. Pikinmoro noiti a ben sa tjari penti kon na ini a studie di no skrifi na ini a boekoe. Na presi foe dati, a e poti krakti na tapoe den moro prenspari penti foe a lès. Son preikiman gi den studenti tra poeblikâsi foe jepi den foe feni piki na tapoe aksi. Moro fara, den sma di abi belangstelling sa kisi moro finifini leri te den e fisiti den gemeente konmakandra.
4 A no abi foe de fanowdoe foe soekoe ala den tekst di kari na ini a lès. Wan toe prenspari penti ben sa kan froeklari kaba nanga jepi foe den tekst di skrifi na ini a paragraaf. Na a overzicht, poti krakti na tapoe den prenspari tekst di joe ben taki foe den èn gi a studenti a deki-ati foe hori den na ede.
5 O langa ibri studie moesoe hori?: A studie no abi foe hori na ini wán joeroe nomo. Wan toe ososma abi ten èn kande den wani foe studeri moro langa. Noso a studenti wani kande foe studeri moro leki wán leisi na ini wán wiki. Disi ben sa abi winimarki gi den sma di kan doe dati.
6 Soleki fa Jesaja 60:8 e taki, na ini a ten disi foeroe hondrohondro doesoen njoen prèiseman foe Jehovah „e frei kon neleki wan wolkoe, èn neleki doifi na den olo foe den doifikoi foe den” na ini den gemeente foe en pipel. Meki wi alamala doe wi pisi foe di wi e wroko krosibei nanga Jehovah, ala di a e meki a tjari di wi e tjari sma kon na makandra di wi kan teki gersi nanga skapoe, go moro esi.—Jes. 60:22.