Getrowfasi e kisi pai
1 Hebrewsma 11:6 e taigi wi taki Gado „e tron a sma di e pai den wan di e soekoe en serjoesoe”. Wán fasi fa a e pai den foetoeboi foe en di e gi densrefi ini a dini foe en èn di de ’getrow ini pikinso sani’, na foe ’poti den foe loekoe foeroe sani’ (Mat. 25:23). Nanga tra wortoe, foeroetron Jehovah e pai wroko di doe nanga faja foe di a e gi den getrow kotoigi foe en moro grani na ini a diniwroko.
2 Na apostel Paulus ben kisi pai foe a getrowfasi foe en, foe di a kisi wan diniwroko di ben tjari en go na den foto nanga den dorpoe foe Europa nanga Pikin Asia (1 Tim. 1:12). Ala di foeroe moeiti ben de fanowdoe foe doe en diniwroko dorodoro, tokoe Paulus ben si a grani di a ben kisi leki wan kefalek warti sani (Rom. 11:13; Kol. 1:25). A ben sori na opregti warderi foe en foe di na wan serjoesoe fasi a ben soekoe okasi foe preiki. Na wan krin fasi a ben sori nanga en fajafaja wroko taki a ben libi akroederi a bribi foe en. Na eksempre foe en e boeweigi wi foe warderi den grani di wi abi foe a diniwroko.
3 Jehovah gi wi wan diniwroko: Fa wi e sori taki wi e si a grani disi na a srefi fasi leki fa Paulus ben si dati? Wi e soekoe fasi foe abi wan moro bigi prati na ini a diniwroko. Wi e meki boen gebroiki foe ibri okasi foe gi kotoigi na wan informeel fasi èn so srefi oso foe oso. Wi e go baka na ala sma di no ben de na oso èn e tjari gobaka na ala sma di abi belangstelling. Èn wi e hori wisrefi na den mofo di wi meki foe hori oso-bijbelstudie.
4 Paulus ben froemane ini a tori foe a diniwroko foe wi: „Doe en leki wan sani di de toemoesi prenspari” (2 Tim. 4:2). Wan sani di de toemoesi prenspari moesoe kisi prakseri wantewante. Wi e doe a diniwroko foe wi na wan fasi di e sori taki a de toemoesi prenspari èn wi e si en leki a moro prenspari sani na ini wi libi? Foe eksempre, wi no ben sa wani meki ontspanning nanga tra persoonlijk sani di wi e doe na a kaba foe a wiki, kon na mindri a ten di wi ben moesoe gi na a velddienst. Foe di wi abi na overtoigi taki a kaba foe a seti disi e kon krosibei esi-esi, meki wi abi na overtoigi toe taki a preiki di wi e preiki a boen njoensoe foe a Kownoekondre na a moro prenspari wroko di wi kan doe.
5 Te wi de opregti èn loyaal na Gado èn de doronomo ini a wroko di a gi wi foe doe, dan dati e sori taki wi de getrow na en. Meki a de so, taki wi e doe a diniwroko foe wi dorodoro, so taki Jehovah sa pai a getrowfasi foe wi foeroe.