Gi kotoigi awansi pe sma de
1 Foe di na apostel Paulus ben sabi a ròl di a jeje foe Gado ben prei ini en diniwroko, meki a ben taki: „Gado ben tan meki a gro.” A ben erken toe: „Wi na kompe wrokoman foe Gado” (1 Kor. 3:5-9). Disi na wan kefalek moi grani. Fa wi kan sori na poebliki taki wi e warderi en foe de kompe wrokoman foe Gado? Foe di wi e meki a boen njoensoe bekènti gi ala sma di wi miti ini na oso-foe-oso wroko èn na ala tra presi.
2 Wi kisi a komando foe „meki disipel foe sma” (Mat. 28:19). Efoe wi e miti soso wan toe sma nomo te wi e teki prati ini a diniwroko, dan esi-esi wi kan lasi-ati èn feni taki wi doe pikinso nomo. Na a tra sei, wi e njan boen moro foe a diniwroko foe wi te wi man feni foeroe sma èn man taki nanga den. Disi kan de troetroe wan tjalensi, foe di wi foe wi sei moesoe bigin doe wan sani foe go awansi pe den sma de, so taki wi kan miti den.
3 Praktis eksempre: Wi kan gi sma kotoigi na wowojo, na parkeerpresi, na presi pe sma di e rèi langa pasi e stòp foe rostoe noso foe go na toilet, èn na presi pe sma e teki bus. Te joe e rèi nanga bus, joe de srekasreka foe gi kotoigi na pasi? Toe Kotoigi di ben rèi nanga wan bus di ben foeroe nanga sma, foe go na a velddienst konmakandra foe den, ben abi wan takimakandra foe a prenki foe a Paradijs na ini a Sabi-boekoe, èn ben taki foe den pramisi foe Gado di abi foe doe nanga a ten di e kon. Soleki fa den ben howpoe ben o pasa, wan jonkoeman di ben tanapoe krosibei, ben arki èn den sani di a ben jere ben naki en ati. Bifo a ben gowe libi a bus, a ben teki wan boekoe èn ben aksi taki wan sma kon na en oso.
4 Foeroe preikiman e feni en wan prisiri sani foe gi okasi kotoigi. Wan bakadina wán sisa ben go na a presi pe foeroe wenkri de na ini en birti èn ben taki nanga sma di ben kaba bai sani na wenkri ma di no ben sori foe hasti densrefi. A ben prati ala den boekoe nanga tijdschrift di a ben abi na ini en tas. Wán man di ben e wakti na ini en wagi ben breiti foe kisi den tijdschrift foe en. A ben go na konmakandra fosi, èn a takimakandra di a ben abi nanga a sisa ben wiki en belangstelling baka.
5 A de wan grani foe hei a nen foe Jehovah. Te wi e sori a faja di wi abi gi a preikiwroko, dan dati e sori taki wi no misi a marki foe a no-froedini boen-atifasi foe Gado di a sori gi wi. Foe di „now na a spesroetoe boen ten” foe jepi tra sma, dan meki wi go awansi pe sma de èn gi den kotoigi foe Jehovah en „dei foe froeloesoe”.—2 Kor. 6:1, 2.