Den konmakandra e gi deki-ati foe doe boen wroko
1 Toe prenspari pisi foe wi anbegi, na a fisiti foe den konmakandra èn a prati di wi abi ini a velddienst. Den toe dati na tara nanga jantji. A wan abi krakti na tapoe a trawan. Den kresten konmakandra e gi deki-ati foe doe boen wroko, èn a moro boen wan na a Kownoekondre-preikiwroko èn a wroko foe meki disipel (Hebr. 10:24). Efoe wi ben sa tapoe foe fisiti den konmakandra, dan heri esi wi ben sa kan tapoe foe preiki, bika wi no ben sa kisi a deki-ati foe doe dati.
2 Na den alawiki konmakandra wi e kisi bodoi foe jeje afersi di e boeweigi wi foe go preiki. Doronomo den e meki wi froestan o prenspari a ten disi de, èn dati e poesoe wi foe tjari a bijbel boskopoe di e gi libi, go na tra sma. Wi e kisi deki-ati nanga tranga foe horidoro na ini a preikiwroko (Mat. 24:13,14). Te wi e gebroiki den okasi foe gi komentaar na tapoe den konmakandra, dan wi e kon gwenti moro nanga moro foe taki fesi tra sma foe a bribi foe wi (Hebr. 10:23). Te wi e gi wi nen na a theokrasia diniwroko-skoro, dan wi e kisi leri foe de moro boen bedinari èn foe meki den bekwaamfasi di wi abi foe gi leri, kon moro boen.—2 Tim. 4:2.
3 Fa den diniwroko-konmakandra e gi wi deki-ati foe preiki: Wi alamala e kisi a deki-ati foe loekoe a materiaal na ini Wi Kownoekondre Dienst, langa ten na fesi. Dan a bodoi disi e poti moro dipi na ini wi froestan te wi e fisiti a diniwroko-konmakandra èn te wi e si fa den e demo den pristeri na tapoe a podium. Te wi de na ini a velddienst, dan wi kan prakseri baka foe Wi Kownoekondre Dienst, ala di wi e memre den pristeri di ben demo, èn nanga dati wi kan gi wan moro boen kotoigi. Disi ben de na ondrofeni foe foeroe preikiman.
4 Baka den diniwroko-konmakandra, son wan e meki mofo nanga trawan foe wroko makandra na ini a diniwroko. Den velddienst penti de krinkrin ete na ini a prakseri foe den preikiman èn dati e boeweigi den foe proeberi den penti bika den konmakandra disi gi den deki-ati foe abi wan prati na ini a preikiwroko ibri wiki.
5 No wan sani no de di kan teki a presi foe wi kresten konmakandra, pe wi e kon makandra nanga kompe anbegiman èn pe wi e kisi deki-ati foe doe boen wroko. Efoe a diniwroko foe wi moesoe go na fesi, dan wi moesoe fisiti den gemeente konmakandra doronomo. Meki wi sori warderi gi a toemoesi moi sani disi di Jehovah seti, foe di wi „no libi a kon di wi e kon makandra”.—Hebr. 10:25.