Poti den moro prenspari sani na a fosi presi
1 San na wan toe prenspari sani di de prenspari gi a tanboen foe wi na jejefasi? Wan toe foe den seiker ben sa de persoonlijk studie, a fisiti foe konmakandra, doronomo begi, boen demakandra, nanga a kresten diniwroko. Wi no kan tan abi wan boen gosontoe na jejefasi sondro foe tan hori prenspari sani na tapoe a fosi presi na ini wi libi.
2 Ma wi alamala abi wan feti nanga den lostoe foe a skin èn wi abi tranga leri fanowdoe (Gal. 5:17). Noiti wi moesoe denki taki wi ben sa abi moro foeroe winimarki te wi e feti na baka afersi pe wi e prakseri wisrefi nomo (Jer. 17:9). Foe dati ede, efoe wi wani kibri wi ati èn no meki sani kori wi, dan a de toemoesi prenspari foe ondrosoekoe wisrefi doronomo.—Odo 4:23; 2 Kor. 13:5.
3 Ondrosoekoe joe eigi ati: Joe kan doe disi te joe e aksi joesrefi wan toe eerlijk aksi: Mi abi wan tranga lostoe foe leisi Gado Wortoe? (1 Petr. 2:2) Mi e froestan o prenspari a de foe fisiti ala den gemeente konmakandra? (Hebr. 10:24, 25) Mi e horidoro na ini begi? (Rom. 12:12) Mi e soekoe foe de makandra nanga sma di e prakseri jeje sani? (Rom. 1:11, 12) Mi e firi taki misrefi de froeplekti foe meki a boen njoensoe bekènti? (1 Kor. 9:16) Te joe man piki den aksi disi na wan positief fasi, dan dati sa sori taki joe abi na angri foe poti den moro prenspari sani na tapoe a fosi presi.
4 Ondrosoekoe den sani di joe gwenti foe doe ibri dei: Joe moesoe go doro nanga na ondrosoekoe di joe e ondrosoekoe den lostoe foe joe ati, te joe e poti san na den moro prenspari sani di joe sa gebroiki joe ten gi den. Disi wani taki dati joe moesoe poti ten foe leisi bijbel doronomo èn ibri eksemplaar foe A Waktitoren nanga Ontwaakt!, èn so srefi foe sreka gi den konmakandra. Ten moesoe poti na wan sei toe foe studeri èn begi makandra nanga na osofamiri. Taki omeni ten nomo moesoe gebroiki gi telefisi noso a computer. Teki a fasti bosroiti foe fisiti ala den gemeente konmakandra, èn meki a fisiti foe konmakandra de na tapoe a fosi presi te joe e poti ten gi tra afersi. Sreka sani foe meki a heri osofamiri abi wan prati na a velddienst ibri wiki.
5 Seiker, te wi e poti den moro prenspari sani na tapoe a fosi presi na ini wi libi, dan dati sa gi wi prisiri.