Fa joe e handri na tapoe a mi-no-ke fasi foe sma?
1 Mi-no-ke fasi na a firi di sma no e firi wan fasi, na a abi di sma no abi belangstelling noso taki den no e broko den ede nanga sani. A de wan foe den moro foeroe èn moro moeilek fasi foe denki di wi e miti na ini a diniwroko. Fa joe e handri na tapoe dati? A meki taki joe go doe joe diniwroko moro safrisafri? Fa joe kan wini en so taki joe kan gi sma a Kownoekondre boskopoe?
2 Fosiwan, kon sabi foe san ede den sma na ini joe kontren abi wan mi-no-ke fasi. Den abi wan mi-no-ke fasi foe di den politiek nanga relisi fesiman foe den broko den saka? Den e denki taki wan loesoe no de gi den problema di den abi? Den e tweifri na den pramisi taki sani sa kon moro betre? Den no wani prakseri foe jeje afersi, boiti te den kan si den materia winimarki di e kon foe dati wantewante?
3 Poti prakseri na tapoe a Kownoekondre howpoe: No wan problema no de di a Kownoekondre no man loesoe. So boen, te wi man wi moesoe taki foe den Kownoekondre pramisi ala di wi e taki sani di de na ini den Boekoe foe bijbel, srefi efoe wi no man noso a no e fiti foe sori wan bijbeltekst (Hebr. 4:12). Ma fa wi kan meki a takimakandra kon so fara taki wi e taki foe den Kownoekondre pramisi?
4 Sma moesoe froestan foe san ede wi e fisiti den. Den moesoe froestan taki wi kon na den foe di wi abi lobi gi den sma na wi sei èn taki wi abi belangstelling gi a libimakandra. Wi ben kan poti wan aksi di wi ben prakseri boen foe en fosi, soleki: „San joe e denki, san na a loesoe gi a problema foe [wan problema di abi krakti na tapoe a libimakandra]?” Te a fasi disi foe bigin no e wroko, proeberi wan trawan.
5 Na ini wan kontren pe den sma goedoe srefisrefi èn pe den ososma abi wan mi-no-ke fasi gi a Kownoekondre boskopoe, den preikiman ben meki moeiti foe feni wan inleiding di ben sa wiki a belangstelling. Di wan trowpaar ben pristeri a Sabi-boekoe, den ben proeberi na inleiding disi: „Joe denki taki wan boen skoroleri de prenspari foe abi boen bakapisi na ini grontapoe na ini a ten disi? Joe e agri taki wan hei skoroleri moesoe abi a sabi foe bijbel na ini toe?” Na ini wán bakadina den ben prati dri boekoe èn wán den ben prati gi wan oema di ben taki bakaten taki a ben leisi a heri Sabi-boekoe èn a ben wani wan bijbelstudie.
6 Te joe miti nanga mi-no-ke fasi, proeberi wan tra fasi foe bigin takimakandra, poti aksi di e meki a sma e denki, èn gebroiki a krakti foe a Wortoe foe Gado. Na so fasi joe sa man jepi tra sma foe teki a toemoesi moi Kownoekondre boskopoe foe wi.